Ամուսինները հակված են տառապել նույն հիվանդություններով․ գիտնականներ

Ճապոնիայում և Նիդերլանդներում ամուսնական զույգերի ուսումնասիրությունը պարզել է, որ ամուսինների առողջությունը սերտորեն կապված է, հաղորդում է Вести պարբերականը։ Ի վերջո, ամուսիններն իրենց կանանց հետ կիսում են ոչ միայն ապրելակերպը, այլև վատ սովորությունները: Բացի այդ, ամուսինները հաճախ նման են մարմնի քաշի, զարկերակային ճնշման մակարդակի և նույնիսկ որոշակի հիվանդությունների զարգացման հավանականության առումով:

Պարբերականը նշում է, որ նախորդ հետազոտություններն արդեն ցույց էին տվել, որ կյանքի ուղեկցի ընտրությունը մեծապես պայմանավորված է գենետիկայով: Մենք անգիտակցաբար ընտրում ենք մեզ գենետիկորեն նման զուգընկերոջ: Կենսաբանության մեջ այս երևույթը կոչվում է «ասորտատիվ խաչասերում», և այն բնորոշ է ոչ միայն մարդկանց:

Մարդիկ ընտրում են իրենց նման զուգընկերների, իհարկե՝ չհիմնվելով գենետիկական հետազոտության արդյունքների վրա: Նույն սոցիալական դասի մարդիկ, կրթության նույն մակարդակով, նման քաշով և ծագմամբ, ակամայից ձգտում են միմյանց: Ի վերջո, նրանք միմյանց մեջ շատ ընդհանրություններ են տեսնում:

Միևնույն ժամանակ, հոգեբանները պնդում են, որ միմյանց չափազանց շատ նման մարդիկ հազվադեպ են լավ հարաբերություններ ունենում: Փոքր տարաձայնություններն ու հակասություններն ամեն դեպքում անհրաժեշտ են, որպեսզի հարաբերությունները չափազանց միապաղաղ չթվան:

Նոր հետազոտությանը մասնակցել է 5391 ամուսնական զույգ Ճապոնիայից և 28 265 ամուսնական զույգ Նիդերլանդներից: Գիտնականները պարզել են, որ զուգընկերները վարում են նման ապրելակերպ և կիսում նույն վատ սովորությունները, ինչպիսիք են ծխելը և խմելը, նրանք ունեցել են իրանի նույն չափերը և մարմնի զանգվածի ինդեքսը:

Յուրաքանչյուր զույգի առողջական տվյալների հետագա ուսումնասիրությունը ցույց է տվել, որ ամուսիններն ունեն զարկերակային ճնշման, խոլեստերինի և արյան մեջ տրիգլիցերիդների նույն մակարդակը: Բացի այդ, զուգընկերները հաճախ տառապել են նույն հիվանդություններով, ինչպիսիք են հիպերտոնիան և նյութափոխանակության սինդրոմը և գիրությունը:

Ընդ որում, նմանություններ են նկատվել նաև այն զույգերի մոտ, որոնք գենետիկորեն նման չեն միմյանց: Այս հատկությունը հուշում է, որ համատեղ ապրելակերպը շատ ավելի է ազդում զույգի առողջության վրա, քան ժառանգականությունը:

Գիտնականներն առաջարկում են օգտագործել այս հետազոտության արդյունքները՝ դրդելու ամուսիններին առողջ ապրելակերպ վարել: Ամուսնական զույգի առողջ մրցակցային ոգին կարող է օգտագործվել՝ ամուսիններին խրախուսելու փոխել սննդակարգը կամ թողնել վատ սովորությունները: Եթե ամուսիններից մեկին առաջարկվել է սննդակարգում որևէ փոփոխություն կամ, օրինակ, ֆիզիկական ակտիվություն, բժիշկները կարող են նույնը վստահաբար խորհուրդ տալ նրա զուգընկերոջը: Հետևաբար, եթե ամուսիններից մեկը պլանավորում է անցնել առողջության ստուգում, լավ կլինի հրավիրել զուգընկերոջը միանալ իրեն: Միասին, ամենայն հավանականությամբ, ամուսինները կկարողանան ավելի արագ անցնել առողջ ապրելակերպի: