Փաստաբանները կրկին գործադուլ են հայտարարել

Փաստաբաններն այսօր դարձյալ գործադուլ են հայտարարել և հավաքվել են՝ հերթական անգամ հիշեցնելու, որ իրենց համար անընդունելի է առաջարկվող այն փոփոխությունը, ըստ որի`դատավորները իրավունք կստանան սակցիա կիրառել փաստաբանների նկատմամբ: 

«Խնդիրը դարձել է, չակերտավոր ասեմ, պրինցիպի հարց, սկզբունքի հարց: Մեր անվտանգության բարձիկները չեն նախատեսել», – ասել է ՓՊ նախագահ Արա Զոհրաբյան՝ հիշեցնելով, որ երեկ ՀՀ արդարադատության նախարարությունն անդրադարձել է իր հայտարարություններին, և իրենք շարունակում են պնդել, որ փաստաբանների իրավունքները ոտնահարվում են:

 Հիշեցնենք, որ հունվարի 31-ին ևս ՀՀ Փաստաբանների պալատը նիստ էր հրավիրել՝ նպատակ ունենալով քննարկել այն քայլերը, որոնք պետք է ձեռնարկեն փաստաբանի նկատմամբ տուգանքի կիրառում նախատեսող իրավակարգավորման դեմ:

Բանն այն է, որ գործող օրենքով դատավորը փաստաբանի նկատմամբ սանկցիա կիրառելու համար դիմում է Փաստաբանների պալատի խորհուրդ, և խորհուրդն է որոշում պատժել կամ չպատժել փաստաբանին: Խորհրդարան ներկայացված առաջարկ-փոփոխությամբ դատավորն անմիջապես կարող է պատժել փաստաբանին՝ նրան տուգանելով 100 հազար դրամով: 

Հունվարի 31-ին խորհրդարանում կայացած քննարկման ժամանակ ՀՀ արդարադատության նախարար Դավիթ Հարությունյանն ասել է, որ դատական տուգանքները հանվել են Դատական օրենսգրքի նախագծից ու տեղափոխվել Դատավարական օրենսգրքի նախագիծ, այսինքն՝ առաջարկությունը մնում է ուժի մեջ, պարզապես առաջարկվում է Դատական օրենսգրքի փոխարեն այն կիրառել Դատավարական օրենսգրքով: 

Այսօր Արա Զորհրաբյանն ասել է, որ այսօրվանից գործադուլի գնալով՝ փաստորեն ամենածայրահեղ քայլին են գնում, բայց այլընտրանք չկա:

«Եթե իրականություն դարձան տուգանքները, չենք կարողանալու մեր վստահորդների շահերը պաշտպանել: Եթե վաղը դատարանում փաստաբանը հանդիպեց դատավորի վատ տրամադրությանը և տուգանք ստացավ, փաստաբանները կսկսեն զգույշ լինել, զգույշ լինելը կբերի պասիվության», – հավելել է Զոհրաբյանը: 

Ըստ ՓԲ-ի՝ վարքականոնները խախտող փաստաբաններին զգուշացնելու, տուգանելու կարգ արդեն իսկ կա, նոր որևէ բան ավելացնել պետք չէ:  Բոլոր երկրներում էլ մի քանի տասնյակ հազար փաստաբանների մեջ կան մի քանի ոչ կարգապահ փաստաբաններ, որոնց կարգի հրավիրելու համար պետք չէ համընդհանուր քայլեր կիրառել:

Հիշեցնենք, որ փաստաբանները մեկօրյա գործադուլ են հայտարարել, բայց նաև ասել են, որ եթե խնդիրը լուծում չստանա, հնարավոր է որ մեկ օրով չսահմանափակվեն: