Գյումրիի պոլիկլինիկաներում COVID-19-ի դեմ պատվաստվողների թիվն ավելացել է

Հանրապետությունում կրկին նկատվում է կորոնավիրուսով վարակվածության դեպքերի թվի աճ: Մասնագետները սա  համարում են հանգստի սեզոնին բնորոշ ներքին տեղաշարժի հետևանք, նաև քաղաքացիները չեն պահպանում հակահամաճարակային կանոնները։ Lաբորատորիաներում ավելացել  է նաև թեստավորումների հետազոտությունների քանակը:

Գյումրիի պոլիկլինիկաներում պատվաստել ցանկացողների թիվն ավելացել է: 55-ից բարձր տարիքի, ռիսկի խմբում գտնվող խրոնիկ հիվանդներից բացի, վերջին մեկ  ամսվա ընթացքում պոլիկլինիկաներ են դիմում երիտասարդ ու միջին տարիքի քաղաքացիները, մեծ մասը  ստանում է արդեն պատվաստանյութի երկրորդ չափաբաժինը:

«Օրական մինչև 60-70 քաղաքացիների ենք  հիմա պատվաստում, ապրիլ ամսից մինչ օրս մեր պոլիկլինիկայում պատվաստել ենք մոտ 1200 քաղաքացիների, միայն հուլիս ամսվա ընթացքում 450 պատվաստում ենք արել»,-SHANTNEWS-ի հետ զրույցում ասել է Գյումրիի «Սուրբ Գրիգոր Նարեկացու» անվան պոլիկլինիկայի իմունային կաբինետի բուժքույր Մագդա  Ղազարյանը։

Պատվաստվումների դիմելիության ակտիվացմանը զուգահեռ պոլիկլինիկաներում  վերջին օրերին պատվաստանյութերի առաջին չափաբաժինների պակաս է նկատվում։ Իմուն կաբինետներում վակցինաները պահեստավորել են այն  քաղաքացիների համար, որոնք սահմանված ժամկետներում պետք է ստանան երկրորդ չափաբաժինը։

«Մինչև մենք վստահ չլինենք, որ հաջորդ խմբաքանակը երկիր կմտնի և մեզ կհասնի ժամանակին, այսինքն՝ արդեն պատվաստվածների մոտ չպետք է պատվաստումը ուշանա, մենք եղած պատվաստանյութը  պահում ենք։ Որ ասում են չկա, ամեն ինչ կա, պարզապես դրանք պահված են երկրորդ պատվաստանյութը ստացողների համար»,- SHANTNEWS-ի հետ զրույցում պարզաբանել է  ՀՎԿԱԿ Շիրակ մասնաճյուղի փոխտնօրեն Արմինե Անդրյանը։

Հիվանդությունների վերահսկման և կանխարգելման ազգային կենտրոնի Շիրակ մասնաճյուղը առաջիկա օրերին մարզի բոլոր  բուժհաստատություններին կբաժանի պատվաստանյութերի նոր խմբաքանակ։

Նոր հանձնարարականով, մինչև  ուսումնական տարվա  մեկնարկը, կպատվաստվեն  մարզի բոլոր 160 դպրոցների և 51 մանկապարտեզների  աշխատակիցները։Առաջիկայում կպատվաստվեն նաև ոստիկաններն ու զինվորական երդման արարողությանը մեկնող քաղաքացիները։ Մինչ այս թեստավորվել են ճամբար մեկնող  7-13 տարեկան բոլոր երեխաները։

«Շիրակի մարզում 7-13 տարեկան շուրջ 48օ ճամբարականներ ենք մենք թեստավորել պետպատվերի շրջանակներում, չունեցանք ոչ մի դրական արդյունք»,-նշել է Արմինե Անդրյանը։

Թեստավորումների  թիվն ավելացել է նաև արտագնա և ներգնա տուրիզմով պայմանավորված։ Անցած 7 ամիսների ընթացքում մարզում կատարվել է 10․481 թեստավորում, հաստատվել է 3015 դրական դեպք։ Հանրապետությունից մեկնող կամ ժամանող բոլոր քաղաքացիների համար թեստավորումը պարտադիր է, եթե քաղաքացին չունի պատվաստումը հավաստող սերտիֆիկատ կամ QR կոդ հավելվածում հաստատող տվյալներ։

Համաճարակաբանների կանխատեսումները հիմնված են նաև սովորաբար աշնանը սպասվող  վիրուսների ակտիվացմամբ, ըստ այդմ, ինչպես ամբողջ աշխարհում, այստեղ էլ սպասվում համավարակի չորրորդ ալիք։ Իսկ հարևան պետությունների հետ սերտ շփումը հաշվի առնելով, ենթադրվում է, որ այս անգամ  մասնագետները գործ կունենան վիրուսի նոր ու առավել վտանգավոր շտամի հետ։ Այս պահին մարզի միջին ծանրության ու ծանր հիվանդները  բուժում են ստանում մայրաքաղաքի կլինիկաներում։

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։