Կառնուտի և Սառնաղբյուրի ջրամբարների տեխնիկական վիճակը թույլ չի տալիս պահանջվող քանակի ջուր կուտակել

Շիրակի մարզի Կառնուտի և Սառնաղբյուրի ջրամբարներում պատվարի վերանորոգումները հրատապ են: Դրանց խիստ վթարային լինելու պատճառով ջրամբարներում կուտակվող ջրի մեծ մասը կորչում է: Այսպիսի եզրակացության են եկել ԳԱԱ Երկրաֆիզիկայի և ինժեներային սեյսմաբանության ինստիտուտի մասնագետները, որոնք Շիրակի և Սյունիքի մարզերի ջրամբարներում համալիր երկրաֆիզիկական ուսումնասիրություններ են կատարել: Մասնագետները պարզել են, որ ջրամբարներում առկա են ֆիլտրացիոն երևույթներ, այսինքն՝ ջրամեկուսացման շերտը քայքայված է և ջուրը կուտակվելու փոխարեն կորչում է:

Կառնուտի ջրամբարն այս ոռոգման սեզոնին ջրօգտագործողների ուշադրության կենտրոնում է: Կառնուտից են սնվում մարզի ամենաբերրի հողատարածքները և այս տարի այստեղ բավարար քանակության ջուր չի կուտակվել: Իսկ եղածն էլ կորուստներով է դաշտերին հասնում: Կորուստների պատճառներն ուսումնասիրել են  Երկրաֆիզիկայի և ինժեներային սեյսմաբանության ինստիտուտի մասնագետները: Շիրակի մարզի երեք ջրամբարներում են դիտարկումներ կատարել՝ Արփիում, Կառնուտում և Սառնաղբյուրում: Ամենավատ վիճակն, ըստ մասնագետների, Կառնուտի ջրամբարում է:

«Եթե բույսն աճում է բետոնյա հակաֆիլտրացիոն սալիկների արանքից, նշանակում է այնտեղ ջուրը հանգիստ կթափանցի: Ինչ կուտակման մասին խոսք կարող է լինել, եթե այսպիսի խայտառակ վիճակ է այստեղ տեղի ունենում: Կառնուտում պատվարի տեխնիկական վիճակը  բավական վատ է: Ջրամեկուսիչ գոտին, որը բետոնի սալիկների միջոցով է, գտնվում է անմխիթար վիճակում»,- SHANTNEWS-ին ասել է ԳԱԱ Երկրաֆիզիկայի և ինժեներային սեյսմաբանության ինստիտուտի գիտաշխատող Ռոլան Գասպարյանը:

Ուսումնասիրություններ կատարվել են երեք ջրամբարներում: Արփիում, ըստ մասնագետների, վիճակը փոքր-ինչ լավ է, բետոնյա պատվարը շահագործելի է: Վիճակը վատ է ու պատվարի վերանորոգումը հրատապ է նաև Սառնաղբյուրի ջրամբարում:

Կուտակված ջրի մակարդակը չափվում է, այսպես կոչված, պյեզոմետրական դիտահորերով: Ամբողջ ջրամբարի տարածքում մի քանի նման դիտահոր կա: Դրանցից յուրաքանչյուրում չափիչ սարքերով մասնագետները ստուգում են ջրի մակարդակը, և մասնագիտական լեզվով ասած, կազմում են դեպրեսիոն կոր: Եթե այն բարձր ստացվեց, նշանակում է ֆիլտրացիա՝ ջրի կորուստ կա:

«Այստեղ ջրամբարում 45 % ջրի կորուստ կա՝ ֆիլտրացիայի հետ կապված: Ջրամբարներում մոնիտորինգ կատարվում է, բայց տարվող աշխատանքները լիարժեք չեն: Խոսքը ոչ միայն Շիրակի մարզի, այլև ամբողջ Հայասատանի ջրամբարների մասին է: Պետք է պետական աջակցութուն, որ հատկապես հատուկ նշանակության ջրամբարները լինեն ուշադրության ներքո»,-SHANTNEWS-ին ասել է Երկրաֆիզիկայի և ինժեներային սեյսմաբանության ինստիտուտի տնօրեն Ջոն Կարապետյանը:

Ինչքան ջուր է կուտակվում, ինչքանը օգտագործվում ոռոգման համար և ինչքանը կորչում: Այս հարցերի պատասխանն ունենալու համար անհրաժեշտ է բոլոր ջրամբարներում չափիչ սարքեր ունենալ: Այսինքն, ջրամբարներում տեղի ունեցող երևույթները պետք է մշտական դիտարկման հնարավորություն ունենան: Մասնագետներ կան, սարքեր՝ նույնպես, բայց դրանց տեղադրումն ու շահագործումը ֆինանսավորում են պահանջում:

Մշտադիտարկման համակարգ ունենալու հարցով պատրաստվում են դիմել ջրային կոմիտե: Մասնագետները նշում են՝ մինչև վերանորոգումներ չլինեն ու մշտական ուսումնասիրությունների հնարավորություն չստեղծվի, ոռոգման սեզոնին, ջրակորուստներով պայմանավորված, խնդիրները շարունակվելու են: Ջրամբարների տեխնիկական վիճակն, ըստ նրանց, թույլ չի տալիս պահանջվող քանակի ջուր կուտակել:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։