«Լսել եմ, որ Պավել Մանուկյանը «մոզի» է ասել, բայց ում է ասել՝ չգիտեմ». դատական կարադրիչ

«Ինչ որ եղել է, ես չեմ հիշում, ինչ որ կատարվել է ամիսներ առաջ, ես չեմ հիշում», – ասաց վկա Արարատ Սահակյանը, ով որպես դատական կարգադրիչ է աշխատում Աջափնյակ-Դավիթաշեն վարչական շրջանների ընդհանուր իրավասության դատարանում: Այն  օրը, երբ Պավել Մանուկյանն, ըստ մեղադրանքի,  դատավոր Արտուշ Գաբրիելյանին «ցռան մոզի» անվանեց, ուժեղացված ծառայություն էր կատարում Ավան-Նոր Նորք վարչական շրջանների ընդհանուր իրավասության դատարանում:  

 «Ո՞վ ու՞մ ասեց  մոզի,- պետական մեղադրողի ճշտող հարցին, պատասխանեց.«Լսել եմ, որ ասել է «մոզի», բայց  ու՞մ ասեց՝  չգիտեմ»: Վկան նշեց, որ դատական նիստի մանրամասները չի հիշում, քանի որ իր կարծիքով արտասովոր ոչինչ չի եղել: «Արտահայտությունը հիշում եմ, բայց ինչ-որ մեկին ուղղված չէր»,- կրկնեց վկան: «Էսօրվա  նիստը վաղը արդեն չեմ հիշում »,- վստահեցրեց վկան: 

Դատավորը հարցեր չտվեց  դատական կարգադրիչ Արարատ Սահակյանին, քանի որ վկան բոլոր հարցերին պատասխանում  էր, թե՝ չի հիշում: Դատարանը հակասություններ  նկատեց  նախաքնական ցուցմունքների և  դատարանում հնչած ցուցմունքների միջև և սկսեց հրապարակել վկայի  նախաքննական ցուցմունքները: 

Ըստ դրանց՝ Պավել Մանուկյանը նշված դատական նիստի ժամանակ  ցանկացել է հայտարարություն անել, դատավորն արգելել է առանց  թույլտության խոսել: Մանուկյանը շարունակել է խոսել: Դատավորը սանկցիա է կիրառել, Մանուկյանն ասել է՝ «Այդ  դեպքում ես էլ Ձեր նկատմամբ եմ սանկցիա կիրառում և անվանում եմ Ձեզ Ցռան Մոզի»: 

  Մյուս  վկաները՝ Էդգար Սաֆարյանը,Ռաֆայել Խաչատրյանը ևս դատական  կարգադրիչներ են:Նրանք նույնպես  կրկնեցին, ըստ էության, այն ամենը, ինչն արդեն դատարանին հայտնի էր միջադեպի վերաբերյալ: Միայն թե  վկա  Էդգար Սաֆարյանն ասաց, որ այդ դատական նիստի ժամանակ «աժիոտաժ» սկսվեց, նիստի բնականոն ընթացքը խախտված էր, և այդ ժամանակ է հնչել այդ արտահայտությունը: Այդ պահին չի հասկացել, թե կոնկրետ ում էր ուղղված արտահայտությունը:  

Հիշեցնենք՝ միջադեպը տեղի է ունեցել 2017 թվականի հունիսի 26-ի դատական նիստի ժամանակ: Ամբաստանյալ Պավլիկ Մանուկյանը, չենթարկվելով նիստի կարգապահությանը, շարունակում էր խոսել առանց դատավորի թույլտվության, և  ենթարկվեց 10 ժամով նիստից հեռացման սանկցիայի։ Ի պատասխան՝ Մանուկյանը դատավորին անվանել էր «ցռան մոզի»։ Ամբաստանյալը հրաժարվել էր ծանոթանալ քրեական գործին, չէր ստորագրել որևէ փաստաթղթի տակ, ցուցմունք չէր տվել։

  Նշենք, որ Պավել Մանուկյանին առաջադրված մեղադրանքը  ընդամենը 2 տող է՝ մեղադրանք է առաջադրվել այն բանի համար, որ նա դատական նիստի ժամանակ անհարգալից վերաբերմունք է ցույց տվել դատարանի նկատմամբ, որը դրսևորվել է պաշտոնեական լիազորությունների իրականացման առնչությամբ դատավորին վիրավորելով: