Հրդեհված դպրոցի տեղում նորն է կառուցվում․ Շիրակի մարզի Բերդաշեն գյուղում սկսվել է մոդուլային դպրոցի շինարարությունը

Մարզի հյուսիսային տարածաշրջանի՝ Արփի խոշորացված համայնքի Բերդաշեն գյուղի աշակերտների համար դպրոց է ծառայում գյուղապետարանի շենքը։ Մինչև 2014 թվականը գյուղն ուներ տիպային դպրոցի երկհարկանի շենք, որը հրդեհից հետո չվերանորոգվեց ու չվերածվեց դպրոցի։ Մինչև հրդեհն էլ դպրոցի վթարային վիճակի մասին են դիմումներ եղել, 10 տարի շենքի մասնակի նորոգման տարբեր ծրագրեր են քննարկվել, մի քանի առաջարկություններ ընդունվել են նախագծային փաթեթներով, որոնք գործնական փուլ չեն հասել։ Այդ ընթացքում աշակերտների մի մասը 2014-ից հարևան Զորակերտի դպրոց հաճախեց, որտեղ հասնելը հեշտ չէր։

Աշակերտներին Զորակերտ հասցնելու հարցն հետո ավելի բարդացավ, երբ վարորդը հրաժարվեց սպասարկել, ստիպված էին 43 դպրոցականների և 16 ուսուցիչների տեղ հարմարեցնել գյուղում։ Անցած տարվանից երկկոմպլեկտ դասարաններով պարապում են գյուղապետարանի շենքում, բնականաբար, դասասենյակային ու դպրոցական միջավայրից հեռու պայմաններում։

Այս պայմաններին ուսուցիչներն ու աշակերտները դեռ երկու տարի հարմարվելու են։ Հրդեհված դպրոցն արդեն չկա, ամբողջությամբ ապամոնտաժված է: Տեղում նոր մոդուլային դպրոցի հիմքերն են գցվել, շինարարները տեղում նոր դպրոց են կառուցում, այն նախատեսված է 70 աշակերտի համար:

Նոր դպրոցի կառուցման աշխատանքների ավարտը 2 տարուց է։ Ավարտի նույն ժամկետներն են սահմանվել նաև մարզի երկու գյուղերի՝ Կապսի և Արեգնադեմի դպրոցների կառուցման համար, թեև երկուսում էլ դեռ շինարարությունը չի մեկնարկել։ Արեգնադեմը տարիներով դպրոցի շենք չի ունեցել, իսկ Կապսի քարաշեն, տիպային դպրոցը խիստ վթարայինների ցանկում է։

«Արեգնադեմի համար 2004 թվականին «Հարավկովկասյան երկաթուղի» ընկերությունը փորձեց կառուցել դպրոց, հիմնային աշխատանքներ կատարվեցին, բայց հիմա դրանք կքանդվեն ու լրիվ նորը կկառուցվի, նույնը վերաբերում է Կապսի դպրոցին՝ նորն է կառուցվելու։ Այժմ մարզում կունենանք վթարային միայն Հովունու դպրոցը և մասնակի վթարային Գեղանիստի դպրոցը։ Մենք փորձում ենք ինչ-որ ծրագրերում այս երկու դպրոցներն էլ ներառել, որ մարզում այլևս չունենանք վթարային դպրոցներ»,- SHANTNEWS.am-ի հետ զրույցում ասել է Շիրակի մարզպետարանի ճարտարապետաշինարարական բաժնի պետի պարտականությունները կատարող Մկրտիչ Ասատրյանը։

Այս տարի մարզում ևս երկու՝ Ազատանի և Արթիկի դպրոցներում են շինաշխատանքներ կատարվելու՝ դարձյալ տարածքային զարգացման հիմնադրամի միջոցներով։

Իսկ 2019-ին մեկնարկած դպրոցաշինական աշխատանքների ավարտն այս տարի է։ Մի մասում կապիտալ, մյուսում մասնակի նորոգումներ են կատարվել։ Հիմնանորոգումները Գյումրիի վարժարաններից մեկում և Արթիկի ավագ դպրոցում ավարտական փուլում են։ Այս երկու  հանրակրթական հաստատությունների  հիմնանորուգումներն իրականացվել են Համաշխարհային բանկի միջոցներով:

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։