Շիրակի մարզում այս տարի ճանապարհաշինական ծրագրերի բյուջեն կազմում է 24 մլրդ 350 մլն դրամ

Շիրակի մարզում այս տարի իրականացվող ճանապարահաշինական աշխատանքների բյուջեն կազմում է 24 մլրդ 350 մլն դրամ: Այս գումարային հաշվարկում Գյումրիի փողոցաշինական ծրագիրն է, ինչպես նաև Հյուսիս-հարավի Տրանշ 3-ը: Այս տարի կհիմնանորոգվեն նաև մի շարք մարզային, տեղական նշանակության ճանապարհներ: Հավելյալ 3 ճանապարհահատվածի հիմնանորոգման հարցը քննարկվում է ըստ ֆինանսական միջոցների առկայության: Խոսքը Գյումրի-Հացիկ,Վարդաքար-Այգաբաց, Նոր Կյանք-Փանիկ-Փոքր Մանթաշ հատվածների մասին է:

Գյումրի-Հացիկ ճանապարհի հարթեցումը 30տարի պարտադիր ամենամսյա գործ է դարձել, որին նաև գյուղացիներն են մասնակցում, գիտեն, որ գյուղի ճամփան անցանելի պահելու միակ տարբերակն է:

Հիմնանորոգման նախագծանախահաշվային աշխատանքներն անցած տարի են կատարվել: Պարզել են անհրաժեշտ գումարի չափը: Հաշվարկը կարևոր է ճանապարհը հիմնանորոգման ծրագրերում ընդգրկելու համար:

«30 տարի անմխիթար վիճակում է: Ոչ  մի անգամ հիմնանորոգման ծրագրերում չի ընդգրկվել: 2012 թվականին է ընդգրկվել պետական ծրագիր, որով ավազակոպճային հարթեցում է կատարվել ու ընդամենը դա է եղել: Իսկ անցած տարի նախահաշիվ են արել: Ըստ այդմ, պարզվեց, որ ճանապարհի հիմնանանորոգումը կարժենա 350-400 մլն դրամ»,-SHANTNEWS-ի հետ զրույցում ասել է Հացիկ գյուղի վարչական ղեկավար Կարեն Պետրոսյանը:

Համաշխարհային բանկի կենսական նշանակության ճանապարհների բարեկարգման ծրագրում ճանապարհահատվածները հերթի են դրվում: Հացիկի ճամփան էլ այդ հերթում է: Շիրակի մարզպետարանի տրանսպորտի բաժնի պետը նշում է՝ անցած տարի նույն ծրագրում Կամո գյուղի ճանապարհահատվածն ընդգրկվեց: Աշնանը հին ասֆալտը հեռացվեց, հիմա էլ նորի համար հիմքն են կառուցում:

Կամոյի ճանապարհը մինչև աշուն ասֆալտապատ կդառնա: Իսկ նույն ծրագրում ընդգրկված Հացիկի ճամփան հնարավոր է ավելի շուտ բարեկարգվի, բայց արդեն ոչ թե Համաշխարհային բանկի, այլ պետական ծրագրով:

«Գյումրի-Հացիկ, Վարդաքար-Այգաբաց և Նոր Կյանք-Փանիկ-Փոքր Մանթաշ ճանապարհների հիմնանորոգումը քննարկվում է: Նախագծանախահաշվային փաստաթղթերն անցած տարի են կատարվել, դրանք պատրաստ են: Անցած տարի, ելնելով ֆինանսական սղությունից, դուրս էին մնացել, բայց նորից այդ հարցը քննարկվում է: Մրցութային գործընթացն ավարտելուց հետո մնացորդային գումարների շրջանակներում  կքննարկվի 3 ճանապարհների հարցը և հնարավոր է ընդգրկվեն 2021-ի ծրագիր »,-SHANTNEWS -ին ասել է Շիրակի մարզպետարանի տրանսպորտի և ճանապարհաշինության բաժնի պետ Խաչատուր Խնձրցյանը:

Երեք ճանապարհների հիմնանորոգումը կախված է նրանից, թե այս տարվա ծրագրում ընդգրկված ճանապարհների մրցութային փուլից հետո, ինչքան գումար կավելանա: Շինմրցույթների առաջին փուլն ավարտված է: Հստակ հիմնանորոգման աշխատանքներ կսկսվեն Վարդաքար-Աշոցք, Աշոցք-Ամասիա, Գյումրի-Կապս-Ամասիա ճանապարհի Արեգնադեմի հատվածում, ինչպես նաև Արթիկ-Պեմզաշեն և Անուշավան-Փանիկ ճանապարհներին:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։