Գյումրիում կուսակցությունների և դաշինքների շտաբներն ակտիվացել են

Արտահերթ խորհրդարանական ընտրություններին մասնակցող քաղաքական ուժերը քարոզարշավի ակտիվ նախապատրաստական աշխատանքների մեջ են: Գյումրիում կենտրոնական հատվածներում տարբեր կուսակցությունների նախընտրական շտաբներ են բացվել, մեծ ու փոքր պաստառներն էլ վաղուց փակցված են: Ընտրակարգը համամասնական է և Շիրակի մարզից տարբեր կուսակցությունների համամասնական ցուցակներում ընդգրկված թեկնածուներն աշխատելու են թիմային՝ քաղաքական ուժի համար հնարավորինս շատ ձայներ ապահովելու համար: Սրանից է կախված յուրաքանչյուր թեկնածուի խորհրդարանում հայտնվելու հավանականությունը:

«Բարգավաճ Հայաստան» կուսակցությունը Շիրակի մարզում նոր դեմքերով է ներկայանում: Համենայնդեպս,նախորդ ընտրությունների արդյունքներով Բարգավաճ Հայաստանից պատգամավոր ընտրված անձինք համամասնական ցուցակում ընդգրկված չեն:

«Պատիվ ունեմ» դաշինքը համամասնական ցուցակում մարզից մի քանի թեկնածու է առաջադրել, բայց չեն թաքցնում առանցքային թեկնածուն քաղաքականություն վերադարձած նախկին պատգամավոր Մարտուն Գրիգորյանն է, նա առաջին տասնյակում է ընդգրկված: Ընտրակարգը համամասնական է, բայց անձերի դերն էլի որոշիչ է:

«Հայաստան» դաշինքը Գյումրիում նախընտրական երեք շտաբ է ձևավորել: Մեկը ՝ «Վերածնվող Հայաստան» կուսակցության գրասենյակն է, մյուսը՝ Քոչարյանի աջակիցների Շիրակի մարզային շտաբը և երրորդը՝ՀՅԴ Շիրակի մարզային գրասենյակը: Շիրակի մարզից «Հայաստան» դաշինքի համամասնական ցուցակում ընդգրկվելու առաջարկ շատերին է եղել:

«Ազգային ժողովրդավարական բևեռի» համամասնական ցուցակում Շիրակի մարզից 10 թեկնածու է ընդգրկված: «Ազգային ժողովրդավարական բևեռը» ընտրությունների է գնում երկրում տիրող իրավիճակին իրավաքաղաքական գնահատական տալու ծրագրով ու 100-ից ավելի թեկնածուներով:

Գործող պատգամավորները Շիրակի մարզում ստանձնել են նախընտրական քարոզչության կազմակերպչական աշխատանքները: «Լուսավոր Հայաստան» կուսակցության ցուցակում 15 թեկնածու են Շիրակի մարզից ընդգրկվել, մարզային շտաբի աշխատանքները համակարգում է գործող պատգամավոր Սարիկ Մինասյանը։

Նախընտրական քարոզչության կազմակերպչական աշխատանքները կատարելու պարտականությունը կիսում են նաև «Քաղաքացիական պայմանագիր» կուսակցության գործող պատգամավորները: Ըստ ընտրատարածքների գրասենյակներ են ձևավորել, իսկ մարզային շտաբի ղեկավարումը վստահվել է Շիրակի մարզպետիՀովհաննես Հարությունյանին, նա ևս թեկնածու է:

Ընտրությունների անցկացման և  արդյունքների վերահսկողության մեխանիզմը տեղամասային հանձնաժողովներում նախագահի, քարտուղարի ու անդամների պաշտոն ունենալն է, ինչի իրավունքն ունեն խորհրդարանական ուժերը, այսինքն՝ 3 կուսակցություն: Իսկ արտախորհրդարանական կուսակցությունների ու դաշինքների համար միակ տարբերակը վստահված անձինք են:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։