Շիրակի մարզում հակակարկտային կայաններն ապակոնսերվացվում են

Շիրակի մարզում սկսվել է հակակարկտային կայանների ապակոնսերվացումը: Մայիսը և հունիսը մարզի համար համարվում են կարկտաբեր ամիսներ, և մինչ այդ կայանները պետք է պատրաստ լինեն գործարկման: Կայանները, որպես վտանգավոր օբյեկտներ, պետք է փորձաքննության ենթարկվեն, գազի բալոնները լիցքավորվեն:

Հացիկ գյուղի կայանները ապակոնսերվացման հերթում առաջիններից են: Մայիսի վերջին արդեն Հացիկում կարկուտի վտանգը կա: Շտապել են կայանները սարքին վիճակի բերել։

Անցած տարի Հացիկի դաշտերը կարկուտից տուժել են: 3 կայան է տեղադրված գյուղի տարածքում, որոնք մասամբ են ցանքերն ապահովում: Գյուղը 650 հեկտար վարելահող ունի, որի համար ընդամենը 3 հակակարկտայինը շատ քիչ է:

«Մեր ունեցած կայանների թիվը 3-ն է ու դա շատ քիչ է: Ահագին պետք է, որ գյուղը ծածկի: Մոտ 10 հատ կայան է անհրաժեշտ, որպեսզի ամբողջ գյուղի վարելահողերն ապահովագրվեն: Հարևան Շիրակ գյուղում նախորդ տարիներին կայան չկար, հիմա կա: Կայաններ են ավելացել նաև Կարմրաքար ու Քեթի գյուղերում: Բոլորը միասին որոշակի շղթա են կազմում և վարելահողերն ապահովագրում են»,- SHANTNEWS-ին ասել է Հացիկ գյուղի վարչական ղեկավար Կարեն Պետրոսյանը:

Տարեցտարի Շիրակի մարզում տեղադրվող հակակարկտային կայանների թիվն աճում է: 50 կայան անցած տարի է տեղադրվել: Հիմա արդեն 149 կայան կա մարզում, ևս 60-ն այս տարի է սուբվենցիոն ծրագրով տեղադրվելու: Քանակը շատ է, արդյունավետությունը՝ քիչ: Մասնագետն է բացատրում՝ պատճառը հակակարկտայինների տեղադրման դիրքն է: Ըստ մասնագետի՝ խոշորացված համայնքներում հակակարկտայինի տեղադրման դիրքի ընտրությունը կատարելիս ոչ թե արդյունավետությամբ են առաջնորդվում, այլ համայնքի կազմում գտնվող գյուղերին չնեղացնելու սկզբունքով: Այսինքն՝ Շիրակի մարզում տեղադրված հակակարկտայինների քանակը ակնկալվող արդյունավետությունը չի ապահովում:

«Կայանները տեղադրվում են ցաքուցրիվ: Օրինակ՝ Աշոցքում  կայաններ չկային, անցած տարի 8 կայան տեղադրվել է Սարապատ, Թորոս և հարևան համայնքներում: Դրանց հեռավորությունը միմյանցից 5.8 կամ 4 կմ է: Եթե դա արդյունավետություն է ապահովում, ես էլ ոչինչ չունեմ ասելու: Նույնը Ամասիայում է․ կայաններ են տեղադրվել Ամասիայում, Արեգնադեմում, Բանդիվանում, ինչ է թե՝ ամեն համայնքի տարածքում կայան լինի տեղադրված, բայց եթե ասես ու պարտադրես, որ ավելի լավ է ոչ թե ձեր համայնքի տարածքում լինի, այլ այնպես տեղադրենք, որ կարկտաբեր ամպերի առաջին գիծը ծածկի  ու արդյունավետությունը բարձր լինի, ոչ մեկը չի համաձայնի»,- SHANTNEWS-ին ասել է Լոռու ռադիալոկացիոն կայանի պետի տեղակալ Սուրեն Ղազարյանը:

Կայանները համայնքային սեփականություն են: Տնօրինողը, շահագործման ու անվտանգության համար պատասխանատուն գյուղապետերն են: Շահագործող մասնագետն էլ մարզում միակն է, որի հետ պայմանագրային հիմունքներով են աշխատում: Կայանների թվի ավելացումը դժվարացրել է ապակոնսերվացումն ու շահագործումը: Միակ մասնագետը պետք է հասցնի կայանները շահագործելի վիճակի բերել մինչև կարկտահարության սեզոնի մեկնարկը:

Բոլոր կայանները պետք է պատրաստ լինեն մինչև մայիսի վերջ: Կարկտաբեր ամպերը ներթափանցում են հիմնականում Թուրքիայի սահմանից: Սահմանին մոտ հատվածներում կայանների տեղադրում չի թույլատրվում:

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։