Կա գնաճ, կա գրանցված աշխատատեղերի թվի ավելացում. Կառավարության նիստի արձանագրումները

Կառավարության այսօրվա նիստը գործադիրը սկսեց տնտեսական ոլորտին վերաբերող արձանագրումներով՝ 2021 թվականի մարտի տվյալներով գրանցված աշխատատեղերի թիվը Հայաստանում 2500-ով ավելի է՝ նախորդ տարվա նույն ամսին գրանցված տվյաների համեմատ, իսկ 2019 թվականի մարտի համեմատ գրանցված աշխատողների թիվն ավելացել է 38.000-ով: Դրանց զգալի մասը ստվերից  դուրս բերված աշխատատեղերն են: Պետեկամուտների կոմիտեի նախագահ Էդվարդ Հովհաննիսյանը նշեց, որ հարկման բազան,  համապատասխանաբար, նույնպես ավելացել է: Վարչապետն ասաց, որ գնաճ ևս կա, թե  որքա՞ն՝  ապրիլի տվյալներ և համապատասխան վերլուծություն գործադիրի անդամներն առայժմ չունեին:

Գործադիրի նիստում վարչապետ Նիկոլ Փաշինյանն արձանագրեց՝ 2021 թվականի մարտին եկամուտ և աշխատավարձ ունեցող աշխատատեղերի թվի աճ է եղել:

«Հաշվի առնելով նախորդ տարի արդեն մարտ ամսից համավարակի առկայությունը և դրա հնարավոր ազդեցությունը՝ համեմատական վերլուծություն է իրականացվել նաև 2019թ. համեմատ՝ իրավիճակն ավելի պատկերավոր հասկանալու նպատակով: Եվ 2019թ. մարտ ամսվա համեմատ, նույն աշխատատեղերի քանակն ավելի է 38 հազարով: Հարկման բազան կազմել է ավելի քան 131 մլրդ, և այդ ցուցանիշը 2020թ. մարտի համեմատ ավելի է 7.5 մլրդ դրամով, իսկ 2019թ. համեմատ՝ 24 մլրդ-ով: Ավելի է հաշվարկվել նաև եկամտային հարկը, և՛ 2020 թվականի, և 2019 թվականի նկատմամբ՝ համապատասխանաբար կես միլիարդ և 1․3 մլրդ դրամի չափով»,- նշեց Էդվարդ Հովհաննիսյանը:

Վարչապետ Նիկոլ Փաշինյանն էլ արձագանքեց, թե առևտրաշրջանառության մասով պետք է հաշվի առնել, որ գնաճ էլ կա:

«Գնաճի գործոնը կա, ապրիլ ամսվա ցուցանիշները, սակայն, դեռ հրապարակված չեն: Շատ ավելի ուշ համապատասխան վերլուծությունը հնարավոր է իրականացնել»,-ասաց ՊԵԿ նախագահը:

Էկոնոմիկայի նախարար Վահան Քերոբյանն էլ նկատեց, թե «սա տնտեսական աճի արդյունք է»:

«Այս տեմպերով որ գնանք, կունենանք գրանցված աշխատատեղերի ռեկորդ Հայաստանի պատմության մեջ», – ասաց նախարարը: Փաշինյանն ավելացրեց, որ առաջին անգամ գրանցված աշխատատեղերի թիվը հատել է 2019 թվականի մարտի ցուցանիշը (600 հազար), այժմ օրինական դաշտում գրանցված է 622.000 աշխատող: