«Սասնա ծռեր» հայկական  էպոսի երաժշտական բեմադրություն՝ ֆրանսերենով․ֆրանսիական թատերախումբն այցելել է Գյումրի

Հյուրախաղերով, ֆրանկոֆոնիայի շաբաթվա շրջանակներում, Հայաստանում է «Սաթէ-Աթղը» ֆրանսիական թատերական միությունը: «Սաթէ-Աթղը» 8 տարի առաջ է հիմնվել Վիեն քաղաքում, հիմնադիրները Սաթէ Խաչատրյան և Էդգար Մանուկյան ամուսիններն են։ Հայկական արժեքներն ու մշակույթը օտար երկրում տարածելն է թատերական միության գործունեության հիմքում։

Թատերախումբը երեկ Գյումրիի «Տիրամայր Հայաստան» արհեստի դպրոցի դահլիճում խաղացել է «Սասնա ծռեր» հայկական ժողովրդական էպոսի հիման վրա բեմադրված երաժշտական ներկայացում՝ ֆրանսերենով, բայց հայերեն ենթագրերով։ Երաժշտական հետաքրքիր լուծումներով և օտարազգի դերասանների մասնակցությամբ թատերախումբը  խոսել է  հայկական էպոսի  համամարդկային արժեքի մասին:

էպոսի երեք ճյուղերը Սաթէն բեմադրել է այնպես, որ հանդիսատեսին ֆրանսերենի չիմացությունը բնավ չխանգարի հասկանալու դերասանների երկխոսությունն ու գործողությունների զարգացումը: Իսկ ամենահետաքրքիրը դերասանական կազմի ընտրությունն է, բեմում օտարազգի դերասաններ են՝ աֆրիկացին մարմնավորում է Մեծ Մհերին և Սասունցի Դավթին, գվադելուպացին`Ձենով Օհանին:

Ռոբբա Բիասի և Յաննիկ Լուի Յաօյի համար  բարդ չի եղել էպոսի հերոսներին մարմնավորելը, ասում են՝ դերասանի համար կերպարի մարմանավորումը ազգություն չի ճանաչում։

«Աֆրիկյան շատ էպոսներ կան, որոնցում  ներկայացված են մեր ժողովրդի ծագումն ու պատմությունը: Հայկական այս էպոսի առանցքային կերպար Դավթի նման հերոսներ մեր երկրի պատմության մեջ էլ ունենք: Այս պատմությունները մեկ անգամ ևս ցույց են տալիս  ժողովուրդների հզոր լինելը,հայրենիքին  նվիրվածությունը: Հետևաբար, ինձ համար խաղալ հայ էպոսի հզոր կերպարը հպարտություն է։ Այս  կերպարի միջոցով ես նաև իմ ազգային արժեքներն եմ գնահատում»,- SHANTNEWS.am-ի հետ զրույցում ասել է աֆրիկացի դերասան Ռոբբա Բիասին։

«Պետությունը, որտեղից ես եկել եմ Գվադելուպեն է, Հայաստանի նման փոքր պետություն է, բայց ոչ պակաս պատմություն ունի, մենք էլ ձեզ նման պայքարում ենք մեր ինքնորոշման, ազգապահպանման համար, սա շատ կարևոր է, քանի որ աշխարհի հզոր պետությունները մեզ փորձում են իրենց ենթական դարձնել, բայց պետք է կարողանալ պահպանել ազգային այն արժեքները, որոնք դարերով կերտել են այս էպոսների հերոսները հաջորդ սերունդների համար: Հայերդ հին ազգ եք և պատմամշակութային հզոր ժառանգություն ունեք, որոնք օտարեկրացիներիս ևս հետաքրքիր են»,-ասել է դերասան Յաննիկ Լուի Յաօն։

Հայկական ժողովրդական երգին աֆրիկյան երաժշտական մշակույթն է միաձուլված, յուրաքանչյուր դերասան իր ազգային արժեքներն է համեմել էպոսին։ Բեմական դեկորներն ու հագուստները ևս հատուկ են կարվել, դրանք բոլոր դերասանների ազգային տարազներով են մոդելավորվել:

«Սաթէ-Աթղը» ֆրանսիական թատերական միության ներկայացման ևս  երկու ցուցադրություն ունեն՝ Գորիսում և Երևանում: Ֆրանսահայ բեմադրիչը  խաղացանկը նոր ներկայացումներով է համալրելու՝ հայ դասականների գործերով, որոնց ցուցադրությունը Հայաստանում չի ուշանա։

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։