Գործարկվել է Գյումրիի դրամատիկական թատրոնի պաշտոնական կայքը

Թատրոնի միջազգային օրվա առիթով այսօր գործարկվել է Գյումրիի Վարդան Աճեմյանի անվան դրամատիկական թատրոնի պաշտոնական կայքը: Թվային հարթակում թատրոնի ներկայացվածությունը նոր հնարավորութուններ է ստեղծում և աճեմյանցիների և հանդիսատեսի համար:

Կայքը տեղեկություններ է հաղորդում թատրոնի պատմության, նախորդ թատերաշրջանների, ընթացիկ ներկայացումների մասին, ինչպես նաև տոմսերի օնլայն վաճառքի հնարավորություն է ստեղծում: Գյումրիի թատրոնն այսօրվանից հասանելի է gyumritheatre.am հղումով:

 «Ինձ համար ամենակարևոր նվերը մենք ստացել ենք այսօր, որովհետև 4-5 տարի շարունակ մենք մտածում էինք կայքէջ ունենալու մասին, բայց չէր ստացվում: Այն ինչ արել է «Brain Fors» ընկերութունը, կարծում եմ անսահման մեծ նվեր է այս թատրոնի համար »,- նշել է Գյումրիի Աճեմյանի անվան դրամատիկական թատրոնի տնօրեն Լյուդվիգ Հարությունյանը:

Կայքը թվային հարթակում հասանելի է դարձնում Գյումրիի թատրոնի պատմությունը, ընթացիկ ու նախորդ թատերաշրջանների ներկայացումները, դերասանական կազմը:  Կայքը եռալեզու է ՝ հայերեն, ռուսերեն ու անգլերեն:

Միայն մարտ ամսին աճեմյանցիները 26 ներկայացում են խաղացել: Բեմում դերասաններն, իսկ ետնաբեմում սպասարկող անձնակազմն է ապահովել բոլոր ներկայացումների հաջողությունը: Թատրոնի դերասանները, սպասարկող ու վարչական աշխատակիցներն այսօր ավանդույթը խախտեցին ու իրենք իրենց ծափահարեցին:

«Մեր խումբն է այսօր դահլիճում նստած՝ բեմի բանվորները, հսկիչները, հանդերձարանի աշխատակիցները: Բոլորին շնորհակալություն եմ ուզում հայտնել,որովհետև ես կարծում եմ, որ թատրոնի հաջողությունը պայմանավորված չէ տնօրենով կամ գեղարվեստական ղեկավարով:Նրանք ժամանակավոր են, գալիս են ու գնում: Մնայուն արժեք են աշխատակիցները՝ դերասանի գլխավորությամբ, մեր ամբողջ խումբը, որն աշխատում է »,- ասել է Գյումրիի Աճեմյանի անվան դրամատիկական թատրոնի տնօրեն Լյուդվիգ Հարությունյանը:

Օրվա առիթով Գյումրիի Աճեմյանի անվան պետական դրամատիկական թատրոնի 9 աշխատակիցներ, արդյունավետ աշխատանքային գործունեության և թատերական արվեստի զարգացման գործում ունեցած մեծ ավանդի համար, պարգևատրվեցին  Գյումրիի քաղաքապետարանի պատվոգրերով:

Ամեն տարի թատրոնի միջազգային օրվա առիթով Գյումրիում անցկացվող միջոցառումից հետո աճեմյանցիները շտապում են մայրաքաղաք՝ «Արտավազդ» մրցանակաբաշխությանը մասնակցելու: Այս տարի մրցանակաբաշխությանը Գյումրիի թատրոնը ներկայացված է ոչ թե մասնակցի, այլ ժյուրիի անդամի կարգավիճակով:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։