Շիրակի մարզում ջերմոցային տնտեսությունների քանակն ավելացել է

Կառավարությունը գյուղատնտեսներին, գյուղատնտեսությամբ զբաղվող փոքր ու միջին ձեռներեցներին ու անասնապահներին գյուղատնտեսության աջակցության ծրագրեր է առաջարկում, որոնք միտված են տարբեր ճյուղերի զարգացմանը: Խոսքը հացահատիկի մշակության, անասնապահության, ջերմատների ու խելացի անասնագոմերի կառուցման, ինչպես նաև սուբսիդավորվող գյուղվարկերի տրամադրման մասին է։

Շիրակի մարզում առավել շատ մասնակցության հայտեր գյուղատնտեսությամբ զբաղվողները ներկայացրել են վարկավորման ծրագրերից օգտվելու համար: Համավարակով պայմանավորված, կառավարությունը գյուղվարկեր տրամադրում է 0% տոկոսադրույքով:

Մայիսյան գյուղի ցանքերի մի հատվածը մշակվում է տարին բոլոր: 4000 քառակուսի մետր տարածք է, որտեղ երիտասարդ գյուղատնտես Գարիկը 3 տարի առաջ ջերմոցային տնտեսություն է հիմնել: Այստեղ միշտ ջերմաստիճանը բարձր է, իսկ օդի միջին խոնավությունը 80%, ապահովված է օդափոխությամբ:

Փոշոտումն ապահովում են հոլանդական մեղուները, ոռոգումը կաթիլային համակարգով է, ջեռուցումը՝ բնական գազով: Սկսնակ գործարարը դեռ միայն ծախսերն է հաշվարկում: Գյուղատնտեսության մեջ, ասում է՝ այդպես է՝ նախ պետք է ներդնես, աշխատես, հետո նոր պտուղները վայելես: Անտոկոս վարկերը գյուղատնտեսին օգնել են համավարակի ընթացքում անհրաժեշտ ծախսերը կատարել:

«Որոշեցինք օգտվել վարկերի սուբսիդավորման ծրագրից: Նախ վերցրինք վարկ 5 % տոկոսադրույքով, իսկ անցած տարի, համավարակով պայմանավորված, կառավարությունը որոշեց 0%-ով տրամադրել: Այդ վարկից էլ ենք օգտվել ու կարողացել ենք անհրաժեշտ ծախսերը կատարել՝ գազի վարձավճար մուծել և այլ ծախսեր անել»,- SHANTNEWS-ին ասել է գյուղատնտես Գարիկ Համբարյանը:

Գյուղատնտեսության աջակցության պետական 15 ծրագիր է առաջարկվում: Ամենաշատը Շիրակի մարզում օգտվում են վարկավորումից: Մարզի 3169 շահառու է ցածր տոկոսներով կամ անտոկոս վարկ ստացել: Վարկավորման ընդհանուր չափը կազմել է 4 մլրդ 600 մլն դրամ: Բայց այս վարկերն էլ հասանելի են ոչ բոլոր գյուղացիներին: Բանկերը պահանջներ ունեն, որոնց պետք է բավարարեն:

Վարկավորումից հետո եռամսյա ժամկետում ուսումնասիրություն է կատարվում: Եթե վարկառուն խախտում է պայմանը և գումարն օգտագործում է ոչ գյուղատնտեսական նպատակներով, ապա վարկավորման արտոնյալ պայմանները վերացվում են և վարկառուն պարտավորվում է մայր գումարն ու ավելի մեծ տոկոսադրույքներ վերադարձնել:

«Բոլոր բանկերն ունեն իրենց պայմանները: Պետք է լինի երաշխավոր, գրավի առարկա: Ինչքան մեծ է գումարի չափը, այնքան շատ երաշխավորներ են պետք և գրավի առարկա: Հիմնականում մերժումներ են ստանում այն հողօգտագործողները, որոնք չունեն գրավի առարկա»,- SHANTNEWS-ին ասել է Շիրակի մարզպետարանի գյուղատնտեսության բաժնի պետ Անդրանիկ Նալբանդյանը:

Գյուղաջակցության պետական ծրագրերով Շիրակի մարզում անցած տարի 36 լիզինգային հայտ է բավարարվել ու 98 միավոր տեխնիկա է ձեռք բերվել, ջերմատների կառուցման 17 հայտ է ընդունվել, 4 խելացի անասնագոմ կառուցվել ու 500 հեկտար վարելահող է ապահովագրվել: Գյուղատնտեսության աջակցության պետական ծրագրերի շարքում է նաև սերմարտադրության ծրագիրը: Աշնանացանի սերմացու գյուղացիները ստացել են, այս տարվա հայտերով սկսվել է նաև գարու սերմացուի մատակարարումը: Զուգահեռաբար մարզպետարաններն ընդունում են գյուղաջակցության ծրագրերի մասնակցության նոր հայտեր:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։