Գյումրիում բացվեց Հայաստանում առաջին ինժեներական դպրոց-լաբորատորիան

Այսօր Գյումրիում բացվեց Հայաստանում առաջին ինժեներական դպրոց-լաբորատորիան։ Կրթական ծրագիրն իրականացվում է Հայ կրթական հիմնարկության աջակցությամբ և Գյումրիի տեղեկատվական տեխնոլոգիաների կենտրոնի նախաձեռնությամբ։

Ինժեներական դպրոց-լաբորատորիան տեղեկատվական տեխնոլոգիաների ոլորտում մտավոր ներուժի բացահայտման հնարավորություններն ստեղծելու և գաղափարները մեկտեղելու ինքնադրսևորման հասանելի մի հարթակ է դառնում  ավագ դպրոցի աշակերտության համար։

«Ոչ միայն Գյումրիի համար է նորամուծություն, այլև Հայաստանում նման լաբորատորիա մենք դեռևս չունեինք։ Ծրագրի գաղափարը ծնվեց հետպատերազմյան բարդ իրավիճակում, երբ որ Հայ կրթության հիմնարկության հետ  քննարկում էինք Ջի-Այ-Թի -Սի-ի հետ համագործակցության հնարավորությունները և մեր ինժեներների օգնությամբ պատրաստեցինք ծրագրի առաջարկ, քննարկեցինք և միանգամից ծրագիրը հավանության արժանացավ»,- SHANTNEWS-ի հետ զրույցում նշել է Գյումրիի տեղեկատվական տեխնոլոգիաների կենտրոնի գործադիր տնօրեն Ամալյա Եղոյանը։

Ավագ դպրոցում անցումը ինժեներական լաբորատորիայի, իրականացվում է  Հայաստանի ազգային պոլիտեխնիկական համալսարանի Գյումրիի մասնաճյուղում, այն բուհում, որտեղ տասնամյակներով  ճարտարագետներ են կրթվել, ստացել այնպիսի մասնագիտական որակավորումներ, որոնք խիստ անհրաժեշտ էին երբեմնի արդյունաբերական քաղաքին։

Այժմ նոր լաբորատորիայում նոր մասնագիտական ու նոր տեխնոլոգիաների ուսուցմամբ ինժեներներ են պատրաստելու։ Դպրոցում աշակերտները  կուսումնասիրեն էլեկտրական կառավարման համակարգերի նախագծում, ծրագրային ճարտարագիտություն, մեքենաշինություն, 3D մոդելավորում, ճշգրիտ մեքենաների գործարկում, էլեկտրատեխնիկա: Ստեղծարար գաղափարներով աշակերտներին ինժեներական դպրոցում կդասավանդեն ոլորտի լավագույն մասնագետները։

Ինժեներական դպրոցում սովորելու են 11-րդ դասարանի աշակերտները։ Այժմ դպրոցն ունի 50 աշակերտ, նրանք ընտրվել են 144 հայտատու-դպրոցականներից։ Քննություն են հանձնել մաթեմատիկա առարկայից ու տրամաբանությունից։ Նրանցից շատերը ինժեներական տեխնոլոգիաների և ծրագրավորման ոլորտում առաջին քայլերն են անելու, իսկ մի քանիսն արդեն ունեն ծրագրավորման հմտություններ։

Հիմնական ուղղությունները, որոնք զարգացման հեռանկարում են՝ ինժեներական մեքենաշինությունն ու ռազմարդյունաբերությունն են լինելու։ Աշակերտները տեխնիկապես հագեցած լսարաններում, տեսական  դասընթացներից բացի, կներգրավվեն նաև գործնական պարապմունքներում։

«Երեխաները էն երեխաներն են, որոնք կառուցելու են իմ և ձեր վաղվա օրը, այսինքն՝ էդ երեխաները ունեն հրաշք գաղափարներ, այնքան համարձակ են, այնքան մտքի թռիչք ունեն, որ ես մտածում եմ՝ արդյո՞ք իրենց տարիքում ես այդպես էի մտածում։ Հիմա մենք գոնե Գյումրիի շրջանակներում կարողացել ենք տալ մի հարթակ ավագ դպրոցի աշակերտներին, որպեսզի նրանք ավելի տեխնոլոգիապես մտածեն»,- նշել է Հայ կրթական հիմնարկության հայաստանյան մասնաճյուղի տնօրեն Արմինե Հարոյանը։

Ինժեներական դպրոցում կրթությունն անվճար է՝ տևողությունը երկու տարի է, որից հետո շրջանավարտները կներկայացնեն իրենց անհատական նախագծերը ճարտարագիտության և մեքենաշինության ոլորտներում։ Լավագույն շրջանավարտները հետագայում արտոնյալ պայմաններով ուսումը բուհերում շարունակելու հնարավորություն կստանան, իսկ լավագույն առաջադիմությամբ աշակերտների  համար  Հայ կրթական հիմնարկությունը կսահմանի նաև կրթաթոշակ։

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։