Գյումրիի ավագանին ընդունել է բյուջեում և հաստիքացուցակներում փոփոխություն կատարելու նախագծերը

Փոփոխություններ են կատարվել Գյումրիի այս տարվա համայնքային բյուջեում, կառուցապատված հողատարածքների գործառնական նշանակությունում և քաղաքապետարանի ենթակայության կառույցների հաստիքացուցակներում: Փոփոխությունների մասին նախագծերն այսօր հաստատվել են ավագանու հերթական նիստում:

2021-ի համայնքային բյուջեն փոփոխվել է ու ավելացել 137 մլն դրամով: Ճիշտ այսքան է կազմում այն գումարը, որն ավելացել է եկամուտների հոդվածում: Իսկ ավելացումը հարկերի բարձրացման արդյունքում է: Գույքահարկն ու հողի հարկն են թանկացել:

«Բյուջեի մեջ փոփոխություններ ենք կատարում, որովհետև հողի հարկի և գույքահարկի մեջ փոփոխություններ են կատարվել: Հողի հարկն ու գույքահարկը միավորվել են, դարձել մեկ հարկատեսակ: Հարկերի չափն ավելացել է 137 մլն դրամով: 2021 թվականի բյուջեն կազմում էր 5 մլրդ 237 մլն 150 հազար դրամ, դարձել է 5 մլրդ 374 մլն 536 դրամ»,- զեկուցել է Գյումրիի քաղաքապետարանի ֆինանսատնտեսագիտական բաժնի պետ Լենա Ջիլավյանը:

Իսկ ինչքան է կազմում քաղաքի ունեցվածքը, խոսքը՝ շենք-շինությունների ու այլ անշարժ գույքի մասին է, որը համայնքապատկան է: Քաղաքապետարանը ամենամյա հաշվառում է կատարում: Համայնքային ունեցվածքի ոչ թե քանակը, այլ արժեքն է վիճելի: Ավագանու անդամներն առաջարկել են անկախ փորձագետներ հրավիրել և պարզել համայնքապատկան գույքի իրական արժեքը:

Փոփոխվել է նաև քաղաքապետարանի ենթակայության կառույցների հաստիքացուցակը: Աշխատողների թիվը կրճատվել է: Մասնավորապես, քաղաքապետարանի ենթակայությունից դուրս են գալիս «Գյումրի 1» և «Գյումրի 2» սոցիալական տարածքային ծառայությունները, ինչի հետևանքով աշխատողների հետ կնքված պայմանագրերը լուծարվում են:

«Աշխատակիցների թվաքանակը 227-ից դարձել է 199-ը: Դիմել ենք կառավարության լիազոր մարմնին համայնքային ծառայողների ցանկում համապատասխան փոփոխություններ կատարելու խնդրանքով: Այն վերաբերում է պաշտոնների անվանացանկում փոփոխություններին, որն իր մեջ ներառում է սոցիալական աջակցության «Գյումրի 1» և «Գյումրի 2» տարածքային բաժինների կրճատման ենթակա համայնքային ծառայողների 28 պաշտոնների անունները»,- հայտնել է Գյումրիի քաղաքապետարանի աշխատակազմի կառավարման բաժնի պետ Սյուզաննա Վարդևանյանը:

Սոցծառայություններն աշխատելու են մեկ պատուհանի սկզբունքով և աշխատանքն արդեն ոչ թե քաղաքապետարանը, այլ ՀՀ աշխատանքի ու սոցիալական հարցերի նախարարությունն է համակարգելու: «Գյումրի 2» սոցիալական ծառայության տնօրենին քաղաքապետարանն այլ պաշտոն է առաջարկել: Էդվարդ Բաղրամյանն ավագանու որոշմամբ այսօր նշանակվեց «Հավերժ հիշատակ» ընկերության տնօրենի ժամանակավոր պաշտոնակատար:

Քննարկվեցին նաև սուբվենցիոն ծրագրերը, որոնք քաղաքապետարանը ներկայացրել է: Դրանք փողոցաշինությանն ու միկրոավտոբուսների ձեռք բերմանն են վերաբերում: Մինչ կառավարությունում քննարկում են սուբվենցիոն հայտերը, քաղաքապետարանը ավտոպարկի և նոր տրանսպորտային միջոցների շահագործման հարցերն է լուծելու:

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։