Գյումրիի քաղաքապետարանը նույն շենքերի հատկացման մասին որոշում է կայացրել արդեն երրորդ անգամ

Հերթական անգամ փոխվել է Գյումրիի նախկին ռադիոգործարանի հանրակացարանային մասնաշենքերի պատկանելությունը: Հիշեցնենք, երկու մասնաշենքերը վթարային են, այստեղ բնակվում են փաստացի անօթևան ընտանիքներ: Հանրակացարանային մասնաշենքերը վերականգնելու համար, Գյումրիի ավագանու որոշմամբ, դրանք հատկացվել էին «Ֆրանկ Մյուլլեր» ընկերությանը: Հետո նաև «Հայաստան» համահայկական հիմնադրամն էր նույն տարածքում բնակարանաշինական ծրագիր սկսելու ցանկություն հայտնել: Ըստ այդմ՝ քաղաքապետարանը «Ֆրանկ Մյուլլեր» ընկերությունից հետ էր վերցրել շենքերն ու հատկացրել հիմնադրամին: Հետո «Հայաստան» հիմնադրամն էր հրաժարվել: Հիմա նորից քաղաքապետարանը նոր հատկացում է կատարել, բայց հասցեատերն է նախկինը: Շենքերը հատկացվել են ոչ թե «Ֆրանկ Մյուլլեր»-ին, այլ դուստր ընկերությանը:

Հանրակացարանային երկու մասնաշենքերում 8 ընտանիք է ապրում: Բոլորը նույն կարգավիճակն ունեն և նույն ճակատագրի մարդիկ են, ապրում են ծայրահեղ սոցիալական պայմաններում։ Շենքում ժամանակավոր են հաշվառված, բայց անօթևանի կարգավիճակ չունեն:

Վերանորոգման ծրագրերի բնակիչները սպասում են անցած տարվանից, երբ շենքերը շվեյցարական ընկերությանը հատկացվեցին: Բայց մեկ տարվա ընթացքում շենքերի տերերը երկու անգամ փոխվեցին։ Երբ շենքերի վերականգնման մեկ այլ ծրագիր ներկայացվեց, քաղաքապետարանը հրաժարվեց հատկացման առաջին որոշումից:

«Սկզբից տվել էինք «Ֆրանկ Մյուլլեր» ընկերությանը, որպեսզի իրենք իրականացնեին իրենց ծրագիրը: Երբ «Հայաստան» համահայկական հիմնադրամը նույնպես հայտ ներկայացրեց, մենք հետ վերցրինք «Ֆրանկ Մյուլլեր»-ից և տվեցինք հիմնադրամին: «Հայաստան» համահայկական հիմնադրամը ուսումնասիրություններ կատարեց և ավելի հարմար գտավ իր ծրագիրն իրականացնել ազատ տարածքում, այլ ոչ թե անդրադառնալ շենքերի վերանորոգմանը: Երբ հիմնադրամը վերադարձրեց շենքերը, դրանք նորից դարձան համայնքապատկան, և նորից հատկացրինք «Ֆրանկ Մյուլլեր» ընկերությանը, ավելի ճիշտ՝ դուստր ձեռնարկությանը: Ծրագիրը չբաժանելու համար «Ֆրանկ Մյուլլեր» ընկերությանը դիմել էր վերաձևակերպում կատարելու հարցով, ինչն էլ մենք կատարել ենք: Ընդամենը անունն է փոխվել»,- Shantnews-ի հետ զրույցում նշել է  Գյումրիի գլխավոր ճարտարապետ Հենրիկ Գասպարյանը:

«Ֆրանկ Մյուլլեր» ընկերության նախկին ու անփոփոխ առաջարկն է՝ տարածքում արհեստանոցներ կառուցել, նաև բնակելի հատված ունենալ: Ըստ Գյումրիի գլխավոր ճարտարապետի՝ նախագիծը դեռ կազմված չէ, ժամկետներ նշված չեն, այլ մանրամասներ հայտնի չեն: Մասնավորապես, ինչպես է լուծվելու կամ լուծվելո՞ւ է արդյոք բնակիչների հարցը:

«Անցած ծրագրի դեպքում պարտավորություն վերցրել էին, որ բնակիչներին պետք է բավարարեն, այս ծրագրի դեպքում ինչպես կլինի, չեմ կարող ասել: Ամեն դեպքում նրանց հարցը կլուծվի, եթե անօթևանության կարգավիճակ ունեն, կստուգվի, ամենքին առանձին մոտեցում կլինի»,- ասել է Հենրիկ Գասպարյանը:

Իսկ «Հայաստան» համահայկական հիմնադրամը հանրակացարաններից հրաժարվելուց հետո Մուշ 2 թաղամասում նոր տարածք է ստացել: Բնակելի թաղամաս և մանկապարտեզ է այստեղ կառուցվելու:

Նախագիծ ներկայացրել են։ Առաջին փուլում խոսքը 2 շենքի մասին է, որտեղ 36 բնակարան է կառուցվելու՝ 22-ը երկու, 14-ը՝ երեք սենյականոց: Գործն արդեն շինթույլտվությանն է հասել, որից հետո կհստակեցվեն շինարարության մեկնարկի ժամկետները։

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom  ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։