Դասադուլը Գյումրիի թիվ 25 հիմնական դպրոցում շարունակվել է․ծնողներն ու ուսուցիչները թույլ չեն տվել նորանշանակ տնօրենին մտնել դպրոց

Այսօր Գյումրիի թիվ 25 հիմնական դպրոցում մի քանի օր առաջ ծնողների նախաձեռնած դասադուլն այսօր շարունակվել է։ Այսօր ծնողները տեղեկանալով, որ նորանշանակ տնօրենին ներկայացնելու են ուսուցչական հանրույթին, փակել էին դպրոցի մուտքը՝ թույլ չտալով Իրինա Բաղդասարյանին մտնել   մասնաշենք։

Դպրոցի մանկավարժները, որոնք ամիսներ շարունակ վիճարկում էին, կասկածի տակ էին դնում անցած տարի սեպտեմբերի 15-ին անցկացված մրցույթի արդյունքները, այսօր էլ մարզպետարանի ներկայացուցիչներին նույն պահանջն են ներկայացրել՝ չեղարկել մրցույթի արդյունքները։

ՀՀ փոխվարչապետի առաջարկությամբ և Շիրակի մարզպետի երեկ ընդունած որոշմամբ թիվ 25 հիմնական դպրոցի տնօրեն է նշանակվել Իրինա Բաղդասարյանը։ Մարզպետի որոշման կատարումն էլ  վերապահվել էր Շիրակի  մարզպետարանի կրթության, մշակույթի և սպորտի վարչության պետին ու  աշխատակիցներին, որոնց մուտքը ևս դպրոց հեշտ չեղավ։

Վարչության աշխատակազմին ներս մտնել հաջողվեց, բայց նորանշանակ տնօրենի դեմ ծնողները  փակեցին դռները։ Վանկարկումներն ու վիճաբանությունները երկար շարունակվեցին։ Իսկ նորանշանակ տնօրենը նշեց, որ շատ լավ տրամադրությամբ է եկել դպրոց և պատրաստվում է անցնել աշխատանքի, հրաժարական տալու մտադրություն չունի։

«Ես ընդամենը դիմում եմ պատկան մարմիններին, որ ապահովեն իմ աշխատանքը, իսկ իմ աշխատանքը խոչընդոտում են, այն աշխատանքը, որը ես արդար ճանապարհով ստացել եմ, թողե՛ք աշխատեմ, ամո՛թ է։ Դե պատկերացրեք, եթե մեր ծնողները էսպես են վերաբերվում պատկան մարմիններին, էսքան կանանց մեջ ոնց կարող են ապահովեն իմ մուտքը դպրոց, ամեն ինչ կարելի է օրենքի սահմաններում լուծել»,- լրագրողների հետ զրույցում նշել է նորանշանակ տնօրեն Իրինա Բաղդասարյանը։

Շիրակի մարզպետարանի կրթության վարչության և բաժնի պետերին, մասնագետներին դպրոցի ներսում, իսկ ոստիկաններին էլ դրսում, կարգ ու կանոն ստացվեց պահպանել, բայց ամեն դեպքում Իրինա Բաղդասարյանի մուտքը դպրոց չստացվեց ապահովել։

«Եկել ենք արդեն տնօրենի նշանակման նոր որոշումով, տնօրենին ներկայացնելու և ընդունում-հանձնում կատարելու։ Ինչու մենք չենք կարող ապահովել տնօրենի մուտքը դպրոց։ Այս պահին, այս էմոցիոնալ դաշտում խուսափում ենք ծնողների հետ ավելորդ շփումից ու քաշքշուկից։ Բնականաբար, րոպեների հարց է, կապահովենք տնօրենի մուտքը դպրոց»,- լրագրողներին ասաց  Շիրակի մարզպետարանի կրթության, մշակույթի և սպորտի վարչության պետ Հրայր Կարապետյանը։

Տնօրեն Իրինա Բաղդասարյանը դպրոցի բակում, լրագրողների հետ զրույցում հավաստիացրեց, որ սա հրահրված բողոք է և չի արտահայտում բոլոր ծնողների ու մանկավարժների վերաբերմունքը։

«Ես էստեղ չեմ սպասելու, հիմա կհեռանամ, բայց հուսով եղեք հարգելիներս, որ մենք դեռ կաշխատենք  միասին։ Կանգնեք էսպես՝ երկու հոգով, երեք հոգով ․․․ ցտեսություն»,- դպրոցի մուտքի մոտ հավաքված ծնողներին այս խոսքերն ասելուց հետո նորանշանակ տնօրենը հեռացավ տարածքից։