Ի՞նչ քայլեր է ձեռնարկում ՌԴ-ն ռազմագերիների խնդրի լուծման գործում. Լավրովը պատասխանել է SHANTNEWS-ի թղթակցի հարցին

Գլխավոր հարցը, որը հուզում է հայկական հասարակությանը, իրավիճակն է կապված գերիների հետ, որոնք գտնվում են Բաքվում, և այդ հարցը չի լուծվում, ինչպես մենք հասկանում ենք, Ադրբեջանը փորձում է մանիպուլյացիաներ իրականացնել գերիների միջոցով։ SHANTNEWS-ի թղթակիցը ՌԴ արտգործնախարար Սերգեյ Լավրովից հետաքրքրվեց, թե ինչ է անում այդ հարցի ուղղությամբ ռուսական կողմը։

«Ինչ վերաբերում է ռազմագերիներին, ապա այդ հարցը քննարկվել է նոյեմբերի 9-ի լույս 10-ի գիշերը ստորագրված համաձայնագրերում։ Հարցն այնուհետև քննարկվել է ՌԴ նախագահի, վարչապետ Փաշինյանի և նախագահ Ալիևի հետ, իմ, Ադրբեջանի և Հայաստանի ԱԳ նախարարների հետ հեռախոսազրույցների ժամանակ։

Դա բավական երկար քննարկումների մի մաս էր, երբ Ադրբեջանի նախագահը և Հայաստանի վարչապետը ժամանել էին Մոսկվա հունվարի 11-ին։ Եթե ամփոփենք այն, ինչ կատարվել է՝ սկզբում իսկապես ավելի շատ խնդիրներ ունեին հայերը, որովհետև անհրաժեշտ էր ձևավորել մարդկանց ցուցակները, որոնք կորած էին, և որոնց նրանք ցանկանում էին վերադարձնել գերությունից։ Ադրբեջանն այդ ցուցակները տվել էր, և ադրբեջանական ցուցակում նշվածները ոչ միանգամից, բայց վերադարձվել էին։ Այլևս ոչ մի իրավիճակ կորածների, գերիների և պահվող մարդկանց մասին ադրբեջանական կողմից չի առաջացել։

Հայկական կողմը ցուցակները ներկայացրել է ոչ միանգամից և ոչ ամբողջությամբ։ Տեղի ունեցավ  այն մարդկանց փոխանակումը, որոնք նոյեմբերի 9-ին ավարտված գործընթացների մաս էին։ Այժմ կարևորը այն հարցն է, որը ծագել է դեկտեմբերի սկզբին Հադրութի շրջանում, երբ հայ զինծառայողների մեծ խումբ (62 հոգի) ուղարկվել էր այնտեղ։ Նրանք գերեվարվել էին դեկտեմբերի սկզբին։

Ադրբեջանական կողմը հայտարարել էր, որ, քանի որ այդ մարդիկ հայտնվել էին  հրադադարի ժամանակաշրջանում և ռազմական գործողությունների ավարտից հետո, ապա նրանց պետք է դիտարկել առանձին։ Այնուամենայնիվ, նախագահ Պուտինն իր շփումների ժամանակ առաջ է քաշում այդ հարցը քննարկելու անհրաժեշտությունը։

Ես խոսել եմ Հայաստանի ԱԳ նախաարարի հետ՝ փորձելով ճշտել վերջնական ցուցակները, որոնք այժմ բացակայում են. պարզվել է, որ գերեվարված մարդկանց թիվը 62-ից ավելին է։

Այժմ մեր զինվորականները հայ զինվորականների հետ կապի մեջ են և փորձում են գտնել այդ մարդկանց գտնվելու վայրը։ Եթե չլինեին մեր խաղաղապահները, այդ հարցը, թերևս, ավելի դժվար լուծվեր»,- ասել է Լավրովը։