Շիրակի մարզի համայնքները հողի հարկի ու գույքահարկի պարտքեր են կուտակել

Շիրակի մարզի համայնքները սեփական եկամուտների հավաքագրումներն, անցած տարվա համեմատ, թերակատարել են 13 %-ով: Ընդհանուր առմամբ չի հավաքագրվել և որպես ապառք է ձևակերպվել 534 մլն 105 հազար դրամ:

Սահմանափակումների պատճառով արտագնա աշխատանքի Շիրակի մարզի բնակիչները չեն մեկնել, եկամուտները պակասել են, հարկերը չեն վճարել: Իսկ եթե հավաքագրումները թերի են, սա նշանակում է, որ տեղական բյուջեներում մուտքերը քիչ են, ինչն էլ վտանգում է մարզի բնակավայրերում սուբվենցիոն ծրագրերի իրականացումը, որոնց համար պարտադիր պայման է համայնքների համաֆինանսավորումը:

Ընդամենը մի քանի գյուղեր են, որ կարողացել են 100-ով սեփական եկամուտները հավաքագրել: Մեծ մասը հողի հարկի ու գույքահարկի հավաքագրումներում են  թերացել : Բնակիչը փող չունի, գյուղապետարաններն էլ չեն պարտադրել: Օբյեկտիվ պատճառները նույնն են գրեթե բոլոր գյուղերի համար: Բայց մարզպետարանի ֆինանսական ու սոցիալ-տնտեսական զարգացման վարչության պետն է նշում անհասկանալի է, թե ինչու են էականորեն տարբերվում հարևանությամբ գտնվող գյուղերի հավաքագրումները: Մեկը 100 %-անոց ցուցանիշ ունի, մյուսը՝ շատ ցածր :

«Իրար հարևան համայնքներ են: Մեկը կատարել է 100 %, մյուսը 50 % է կատարել: Այստեղ կարելի է ասել, որ համայնքի աշխատակազմի աշխատանքի արդյունքն է: Ունեցանք սեփական եկամուտների հավաքագրման 80,9 %: Թերակատարումը բոլոր հարկատեսակները միասին  կազմում է 534 մլն 105 հազ. դրամ: Թերակատարումը հիմնականում հողի հարկինն է, որը համայնքների եկամուտների գերակշիռ մասն է : Թերակատարվել է 112 մլն դրամի չափով »,-shnatnews-ին ասել է Շիրակի մարզպետարանի ֆինանսական և սոցիալ-տնտեսական զարգացման վարչության պետ Լիպարիտ Մարտիրոսյանը:

Անցած տարվանից պարտք մնացած գումարներն արդեն ձևակերպվում են որպես ապառք, որոնց չվճարված ամեն օրվա համար տուգանքներ են հաշվարկվում: Հիմա գյուղերում հավաքագրելու են պարտքերն ու ընթացիկ տարվա հարկերը: Եթե հավաքագրում չկատարվեց, համայնքը կզրկվի սուբվենցիոն ծրագրերին մասնակցելու հնարավորությունից:

« Եթե համայնքի բյուջեն չունենա միջոց , իր մոտ սուբվենցիոն ծրագրեր չեն իրականացվելու, չի կարող իրականացվել, հայտ չի ընդունվի: Պետք է ունենաս գումար, որ համաֆինանսավորման քո բաժինը կատարես, պետությունն էլ իր մասնաբաժինը ֆինանսավորի »,- ասել է Լիպարիտ Մարտիրոսյանը:

Մարզի տեղական ինքնակառավարման մարմիններում աշխատավարձերի վճարման խնդիր չեն ունեցել, քանի որ դրանք վճարվում են պետական դոտացիաներից:Եվ այս տարի դոտացիոն հատկացումները ավելացել են: Անցած տարվա համեմատ Շիրակի մարզը 1 մլրդ 108 մլն դրամ ավելի դոտացիա կստանա: Հաշվարկը կատարվում է նոր չափորոշիչներով:

Աշխատողների թվով ու աշխատավարձի չափով հաշվարկվում է նաև  պարգևատրման ֆոնդը, որի շուրջ քննադատություններն ու  աղմուկը պետական բոլոր  ոլորտներին է վերաբերում։ Շիրակի մարզպետարանի  պարգևավճարների ֆոնդը ամբողջ 2020 թվականի համար կազմել է 95 մլն դրամ: