Աղետից 32 տարի անց քանի տնակ դեռ կա Գյումրիում

Աղետից 32 տարի անց Շիրակի մարզում դեռ 3600 տնակ կա, որից 2800-ը՝ Գյումրիում։ Այս թվային տվյալները ստացվել են կառավարության որոշմամբ ձևավորված աշխատանքային խմբի ուսումնասիրման ու քարտեզագրման արդյունքում։

Հաշվառվել են ոչ թե ընտանիքներն, այլ ժամանակավոր կացարանները, որոնց մի մասն էլ բնակեցված չէ, կամ տարիների ընթացքում մի քանի սեփականատեր է փոխել։ Այդ տնակներում ապրում են նրանք, որոնք երկրաշարժից անօթևան են, բնակարան ստացել են, վաճառել, բնակարան ունեն ու շարունակում են ապրել տնակում։

Անօթևանության խնդիրը 3 տասնամյակ անց ինչու չի լուծվում։ Այս թեմայով քննարկմանը մասնակցել են համայնքային ու մարզային իշխանությունների ներկայացուցիչները, որոնք մի քանի պատճառներ են նշել՝ տնտեսական վատ վիճակը, անօթևանության խնդրի կարգավորման հարցում ոչ պատշաճ մոտեցումը, կոռուպցիոն դրսևորումները և տնակային հոգեբանությունը, որ ձևավորվել է խնդրի ձգձգման պատճառով։

Գյումրիի երբեմնի մեծ տնակային թաղամասերում ժամանակավոր կացարանները հիմա ցաք ու ցրիվ են։ Տարիներ առաջ ավելի խիտ էին տնակային թաղերը։ Ֆանտաններ, Ավտոկայանի բանավան, Մանուշյան․․․ քաղաքի այդ հատվածներում դոմիկները համարակալված էին։ Ժամանակավոր կացարաններին մշտական հասցե պետք չէր:

Հիմա այդ համարակալումների հերթականությունը խախտվել է: Շատ տնակներ քանդվել են, մնացածների տերերն են փոխվել, և ոչ մեկ անգամ: Անցած երեք տասնամյակների ընթացքում անօթևանների մի քանի հաշվառում է եղել, որոնք հասցրել են  փաստաթղթեր ներկայացրել և հայտնվել են հերթացուցակում, իսկ ով ուշացել է, զրկվել է բնակարան ստանալու իրավունքից: Կառավարությունը հաշվառեց ու քարտեզագրեց, թե Շիրակի, Լոռու և Արագածոտնի մարզերում քանի ժամանակավոր կացարան կա:

«Երեք մարզերում հաշվառված ժամանակավոր կացարանների թիվը 7000 է: Աշխատանքային խմբի նվաճումներից մեկն այն է, որ վերջապես հնարավոր եղավ այդ 3 մարզերում քարտեզագրել, ճշգրտել ժամանակավոր կացարաններում և ոչ հիմնական շինություններում ապրողների ցանկը, թվակազմը, այդտեղ հայտնվելու պատճառները, կացարանի տեսակը և այլն: Վերջապես գոնե այդ ցանկը կա, բայց անօթևանների ցանկն անհամեմատ մեծ է»,- նշում  է Գյումրիի ավագանու անդամ Լևոն Բարսեղյանը:

Երեք մարզերում  հաշվառված 7000 ժամանակավոր կացարանից միայն 2800-ը Գյումրիում է, որից 500-ն էլ բնակեցված չէ: Անօթևանների թիվն, ըստ Գյումրիի ավագանու անդամի, ավելի մեծ է, քանի որ այս հաշվառման մեջ ընդգրկված չեն արտերկրում ապրող այն ընտանիքները, որոնք բնակարան են կորցրել ու չեն փոխհատուցվել, ընդգրկված չեն նաև վթարային շենքերի բնակիչները: Այնինչ, տարիներ առաջ 4-րդ աստիճանի վթարայնության շենքերի բնակիչներն անօթևանի կարգավիճակ էին ստանում:

«Այս տարի կար ծրագիր, որով Տիգրան Մեծի 5 վթարային շենքի մեկ մուտքը պետք է ամրացվեր, Իսահակյան 9, Ղուկասյան 29, Անտառավան 26 շենքերի բնակիչներին էլ բնակարանի գնման վկայագրեր պետք է տրվեին: Բայց Իսահակյան 9 շենքի բնակիչները վկայագրերից հրաժարվեցին, իսկ երկրում ստեղծված իրավիճակով պայմանավորված, ծրագիրը տեղափոխվեց հաջորդ տարի»,- ասում է Շիրակի մարզպետարանի ճարտարապետաշինարարական բաժնի պետի ժպ Մկրտիչ Ասատրյանը:

Ըստ բանախոսների՝ կառավարությունը մինչև 2021-ի հունիսի 30-ը հստակեցնելու է ժամանակացույցը, թե հաշվառված տնակներում ապրողների փոխհատուցումն ինչպես է լինելու, այս ընթացքում նաև հաշվարկ է կատարվելու, թե ինչ կարժենա այս ամենը պետբյուջեի համար: