Հայտնաբերվել է Ալավերդիում կատարված սպանության պատվիրատուն

Գլխավոր դատախազությունը մանրամասներ է ներկայացրել 2017 թվականի հունիսի 13-ին Ալավերդիում տեղի ունեցած սպանության մասին: Ալավերդի քաղաքի Թումանյան 20 հասցեում գործող ծաղկի վաճառքի սրահի դիմաց 1991թ.  ծնված Վլադիմիր Դավթյանն իր համաքաղաքացի, 1978թ. ծնված Կամո Փիրուզյանին սպանելու դիտավորությամբ, իր մոտ ապօրինի պահվող «Մակարով» տեսակի ատրճանակից 8 անգամ կրակել է նրա  մարմնի տարբեր մասերին: Կամո Փիրուզյանը ստացած հրազենային վնասվածքներից տեղում մահացել է:

Վլադիմիր Դավթյանը նույն պահին բռնվել էր: Դեպքի վայրի զննությամբ հայտնաբերվել էր հանցագործության գործիք հանդիսացող «Մակարով» տեսակի ատրճանակը: 

2017թ. հունիսի 13-ին Վլադիմիր Դավթյանը ձերբակալվել էր:

Նախաքննական մարմինը, հիմք ընդունելով միայն Վլադիմիր Դավթյանի ոչ արժանահավատ ցուցմունքները, հիմնավորված էր համարել, որ նա Կամո Փիրուզյանին սպանել է իրեն հետապնդելու և սպառնալիքներ տալու դրդապատճառով:

2017թ. սեպտեմբերի 15-ին քրեական գործի նախաքննությունն ավարտվել է, քրեական գործը մեղադրական եզրակացությամբ ուղարկվել է Լոռու մարզի դատախազություն՝ մեղադրական եզրակացությունը հաստատելու և գործն ըստ էության քննելու համար առաջին ատյանի դատարան ուղարկելու միջնորդությամբ: 

Լրացուցիչ քննություն կատարելու համար դատախազի տեղակալը քրեական գործը քննիչին է վերադարձրել՝ քանի որ, ըստ նրա, նախաքննության մարմնի կողմից կատարվել է թերի քննություն: Չէր կատարվել գործի հանգամանքների բազմակողմանի, լրիվ և օբյեկտիվ  հետազոտություն՝ մեղադրյալի կատարած արարքը ճիշտ որակելու, հանցագործության իրական դրդապատճառը պարզելու, ինչպես նաև հանցագործությանը մասնակցած բոլոր անձանց որպես մեղադրյալ ներգրավելու ուղղությամբ:        

Քրեական գործի նախաքննության ընթացքում ԿԱ ազգային անվտանգության ծառայության կատարած օպերատիվ հետախուզական աշխատանքների և Քննչական կոմիտեի ՀԿԳ քննության գլխավոր վարչության իրականացրած քննչական գործողությունների արդյունքում տվյալներ են ձեռք բերվել  է, որ Վլադիմիր Դավթյանը Վ.Ա.-ի կողմից ստեղծված և ղեկավարվող հանցավոր համագործակցության անդամ է և Կամո Փիրուզյանի սպանությունը կատարել է նրա պատվերով:                 

Հիմնավորվել է նաև, որ Վլադիմիր Դավթյանը Կամո Փիրուզյանի սպանությունը կատարել է շատերի կյանքի համար վտանգավոր եղանակով՝  հաշվի առնելով այն հանգամանքը, որ Ալավերդի քաղաքի տվյալ հատվածը հանդիսանում է քաղաքի առավել մարդաշատ վայրերից մեկը և դեպքի պահին էլ եղել է բազմամարդ:

2017 թվականի դեկտեմբերի 28-ին որոշում է կայացվել մեղադրյալ Վլադիմիր Դավթյանին առաջադրված մեղադրանքը փոփոխելու և լրացնելու մասին: Նրան նոր մեղադրանք է առաջադրվել: 

2018թ. հունվարի 18-ին Երևան քաղաքի՝ իր վարձակալած բնակարանից բերման է ենթարկվել Վ. Ա.-ն, ով հանցավոր համագործակցություն ստեղծելու, ղեկավարելու, Կամո Փիրուզյանի սպանությունը  կազմակերպելու կասկածանքով ձերբակալվել է:  Նույն օրը «Գինետուն» հյուրանոցային համալիրից բերման են ենթարկվել և Վ.Ա.-ի ղեկավարած հանցավոր համագործակցությանը անդամակցելու կասկածանքով ձերբակալվել են Ա. Մ.-ն, Ա. Խ.-ն և Ա. Հ.-ն: