Արցախցիների երկրորդ խումբը Գյումրիից Ստեփանակերտ է վերադարձել

Շիրակի մարզից Արցախ է վերադարձել 123 փախստական: Նրանց հերթական խումբը Գյումրիի կենտրոնական հրապարակից Ստեփանակերտ է ուղևորվել այսօր: Շիրակի մարզպետարանը հաշվառել է բոլոր վերադառնալ ցանկացողներին և նրանց համար կազմակերպվում են անվճար ուղևորափոխադրումներ:

Այսօր Արցախ են վերադարձել Ստեփանակերտի, Մարտակերտի, Ասկերանի և անգամ Հադրութի շրջանների բնակիչները: Ում տները կանգուն են, վերադառնում են ամեն ինչ նորից սկսելու, իսկ թշնամու վերահսկողության տակ գտնվող բնակավայրերի բնակիչները ժամանակավոր օթևանելու են Արցախի մայրաքաղաքում, մի օր իրենց տները վերադառնալու հույսով:

Վաղ առավոտյան Գյումրիի կենտրոնական հրապարակում արցախցիներն էին հավաքվել: Տուն վերադարձի տրամադրություններով պայմանավորված՝ իրարանցում էր: Ստուգում էին՝ ամեն ինչ վերցրել են, թե ոչ, ճամպրուկներն արդյոք կտեղավորվեն ավտոբուսում: 2 ամիս է՝ Գյումրիում էին ապրում: Հիմա ճամպրուկները կապել են, տուն են շտապում: Արցախ վերադարձողների մեծ մասը ստեփանակերտցիներն են: Արցախի մայրաքաղաքը վերադարձել է խաղաղ կյանքին:

Հողը պաշտպանելու են ապրելով ու շենացնելով: Սա է արցախցիների համոզմունքը: Հայաստանում գտնվելու առաջին օրից սպասում էին Արցախ վերադառնալուն: Շատերի տները կանգուն են: Բացի Ստեփանակերտից, Գյումրիից այսօր տուն էին վերադառնում Ասկերանի ու Մարտակերտի շրջանների բնակիչները:

Մայիլյանների ընտանիքը Հադրութի շրջանի Այգեստան գյուղից է, այնտեղ վերադառնալ չեն կարող: Հադրութի շրջանը թշնամու վերահսկողության տակ է: Ասում են՝ արցախցին պետք է իր հողում ապրի: Ժամանակավոր ապրելու են Ստեփանակերտում, բայց Հադրութ վերադառնալու համոզմունքով:

«Հադրութի Այգեստան գյուղից ենք: Գնում ենք Ստեփանակերտ: Այնտեղ կմնանք, տուն կգտնենք, մինչև մեր Հադրութն էլ ազատեն ու վերադառնանք մեր տուն: Եթե անգամ մեր տունը կանգուն էլ չէ, ոչինչ, միայն թե մեր հողում, իմ տանը ապրեմ»,- SHANTNEWS-ին ասել է Սպարտակ Մայիլյանը:

Այսօր փախստականների երկրորդ խումբը Գյումրիից վերադարձավ Արցախ: Մի քանի օր առաջ 65, իսկ այսօր 58 արցախցի է տուն վերադարձել: Շիրակի մարզ տեղափոխված Արցախի շատ քաղաքացիներ կան: Մարզպետարանը հաշվառել է նրանց, որոնք վերադառնալու տեղ և ցանկություն ունեն: Ցուցակագրվածների թվից է կախված Գյումրի-Ստեփանակերտ ուղևորափոխադրումների պարբերականությունը:

«Կան մարդիկ, որոնք ցանկություն ունեն այսօր վերադառնալ Արցախ: Կան մարդիկ, որ 3 օր հետո են ուզում գնալ, կան այնպիսիք էլ, որ  մեկ շաբաթից են գնալու: Մենք պատրաստ ենք բոլորին ուղեկցել իրենց բնակավայրեր: Կազմվել է ցուցակ-ցանկ, մարզպետի կողմից գրությամբ վավերացված է, հաստատվել ու կնքվել է: Տվյալները հայտնում ենք տարածքային կառավարման նախարարություն: Շարժվելուց արդեն գիտեն, որ այս պետհամարանիշով մեքենան պետք է հասնի մինչև Ստեփանակերտ: Ուղեկցում են ռուսական խաղաղապահները: Առանց խնդրի, նախորդ անգամ մեր տրանսպորտային միջոցները հասել են Ստեփանակերտ»,- SHANTNEWS-ին ասել է Շիրակի մարզպետարանի տրանսպորտի և ճանապարհաշինության բաժնի պետ Խաչատուր Խնձրցյանը:

Գորիս-Բերձոր ճանապարհով ապահովված է նաև արցախցիների անվտանգ տեղափոխությունը: Տրանսպորտային միջոցների և տեղափոխվող քաղաքացիների տեղեկությունները փոխանցվում են տարածքային կառավարման նախարարություն և ռուս խաղաղապահ զորքերին:

Գյումրիից Ստեփանակերտ ուղևորափոխադրումները կշարունակվեն այնքան ժամանակ, քանի դեռ կլինեն վերադառնալու ցանկություն ունեցող արցախցիներ: Մինչ օրս Հայաստանից Արցախ է վերադարձել 25 հազարից ավելի արցախցի: