Արհեստավոր դարձած արվեստագետները. Շուշիի թատրոնի աշխատակիցները զինվորների համար գլխարկներ են կարում

Շուշիի Մկրտիչ Խանդամիրյանի անվան պետական թատրոնի աշխատակիցները Արցախից Գյումրի են տեղափոխվել: Մի քանի տիկնիկային ներկայացումներ են կազմակերպել արցախցի փոքրիկների համար, բայց այսքանով չեն սահմանափակվել: Ձևող ու կարող բանվորուհիների խումբ են կազմել ու տաք գլխարկներ են կարում առաջնագծում կանգնած զինվորների համար: Հաղթանակը մոտեցնելու և նորից Շուշի վերադառնալու ցանկությունը մեծ է, իսկ դրան հասնելու համար ցանկացած նախաձեռնություն կարևոր է:

Շուշիի պետական թատրոնի աշխատակիցներն իրենց հարազատների հետ Գյումրիի հյուրատներից մեկում են իջևանել: Հյուրատան ճաշասենյակը փոքրիկ արտադրամասի են վերածել: Հումքը բերում են ու սկսվում է աշխատանքի բաժանումը՝ Աշխենն ու Լիլիթը ձևում են, տիկին Լիրան կարում է, Լուսինեն ու Լաուրան վերջին շտրիխներն են ուղղում։ Արվեստագետները ժամանակավորապես դարձել են նաև արհեստավորներ:

«Մշակույթը, իհարկե, մի կողմ չենք դրել: Պարզապես արհեստն արվեստի հետ միասին աշխատում ենք, որովհետև երբեմն հանպատրաստից նաև ներկայացումներ ենք ցուցադրում: Ինչ վիճակում էլ մեզ դնեն, մենք արարելու ենք: Սա ենք ուզում ասել»,- shantnews-ի հետ զրույցում ասում է Շուշիի պետական թատրոնի տնօրեն Աշխեն Հարությունյանը:

Տիկին Լիրան խմբի ամենափորձառու դերձակն է: Երկար տարիներ Ստեփանակերտի կարի ֆաբրիկայում է աշխատել: Աշխատանքը, տունն ու տեղը ժամանակավոր է թողել: Վստահ է՝ շուտով վերադառնալու է, իսկ մինչ այդ, փոքրիկ արտադրամասի միակ կարի մեքենան նրան է վստահված:

«Եկել եմ Շուշիից, բայց աշխատում եմ Ստեփանակերտի կարի ֆաբրիկայում՝ իտալական վերարկուներ էինք կարում: Եկել ենք այստեղ՝ Գյումրի: Մեզ շատ լավ են ընդունել: Մենք էլ որոշեցինք ինչ-որ բանով օգտակար լինել մեր զինվորներին: Մեր հայրենիքը, հողը, տունը, մշակույթը, ամեն ինչ այնտեղ է»,- shantnews-ին պատմում է Շուշիի բնակիչ Լիրա Գայամյանը:

Լիլիթը գյումրեցի է, 7 տարի առաջ է Շուշի տեղափոխվել, աշխատանքային առաջարկն է ստիպել: Տուն է վերադարձել, բայց ժամանակավոր: Այստեղ էլ գործընկերների հետ նաև պահածոներ է պատրաստել՝ արցախցի հյուրերի համար ձմռան պաշարն է:

«Շուշիում էլ 70 հատ պահածո պատրաստել ու թողել եմ: Ես ինքս գյումրեցի եմ, տուն եմ վերադարձել, բայց շատ լավ հասկանում եմ շուշեցիներին: Նրանք օր առաջ ուզում են վերադառնալ իրենց տները: Վերադառնալու ենք անպայման: Էլի գնալու ենք Շուշի՝ մեր թատրոնը, նորից ու ավելի լավ ծրագրերով ենք աշխատելու»,- նշում է Շուշիի պետական թատրոնի պրոդյուսեր Լիլիթ Մկրտչյանը:

Շուշիի ռմբակոծված մշակույթի տանն են մնացել նաև թատրոնի տիկնիկները: Դրանք Գյումրիում նորերով են փոխարինել:

Այստեղ արցախցի երեխաների համար տիկնիկային երեք ներկայացում են խաղացել: Առաջին անգամ Շուշիի թատրոնի տիկնիկները խոսում են միաժամանակ Արցախի և Գյումրվա բարբառներով:

Ներկայացումները լիարժեք չեն կարող լինել նաև այն պատճառով, որ թատրոնի դերասանների մեծ մասն այսօր առաջնագծում է: Նրանց հետ ամենօրյա հեռախոսազրույցների ընթացքում թատրոնի տնօրենը նաև հետագա աշխատանքն ու ծրագրերն է քննարկում: Հաղթանակից հետո Շուշի են վերադառնալու, նոր ներկայացումներ են բեմադրելու ու խոստանում են Գյումրի գալ արդեն հյուրախաղերով: