Մանրամասներ ԱՄՆ-ում տեղի ունեցող բողոքի ակցիաներից

ԱՄՆ նախագահական ընտրություններում՝ ձայների շարունակական հաշվարկի ֆոնին, ըստ տեղական հրատարակությունների և հեռուստաընկերությունների, բողոքի ալիք է տարածվել ամերիկյան քաղաքներում:
Star Tribune-ի փոխանցմամբ ՝ Մինեսոտա նահանգի Մինեապոլիս քաղաքում հարյուրավոր ցուցարարներ փակել են 94 համարի դաշնային մայրուղին: Նրանք դեմ են Դոնալդ Թրամփի նախագահությանը և ընտրությունների արդյունքները բողոքարկելու նրա սպառնալիքներին:

Ակցիան սկսվել է տեղական ժամանակով մոտ 19:45-ին (Մոսկվայի ժամանակով 3:45-ին՝ նոյեմբերի 5-ին): Ոստիկանությունը արգելափակել է երկու գոտիները և վարորդներին խնդրել շրջանցել տարածքը: Երթևեկությունը դադարեցվել է երկու ուղղություններով: Մի քանի հարյուր մարդ բերման է ենթարկվել: Այդ գործընթացը տևել է ավելի քան երկու ժամ: Ցուցարարներին հրամայել են նստել ասֆալտին և սպասել, բայց ոմանք սկսել են նվագել և պարել: Այնուհետև ոստիկանությունը բարձրախոսով հայտարարել է, որ նրանք, ովքեր համագործակցում են, արձանագրություններ կազմելուց  հետո ազատ կարձակվեն: Երեխաներ ունեցող ծնողներին  թույլատրվել է հեռանալ՝ մինչև գրանցվելը: Հաղորդվում է, որ վիրավորներ չկան:

Այնուհետև ոստիկաններն ու պարեկները ձիով և ավտոբուսներով շրջապատել  և բերման են  ենթարկել ցուցարարներին: Վերջինները մեղադրվում են ապօրինի մուտքի և ապօրինի հավաքների մեջ:

Մեկ այլ ակցիա էլ տեղի է ունեցել Չիկագոյում: Ըստ Chicago Sun Times-ի՝ առնվազն 1000 ցուցարար հավաքվել է քաղաքի կենտրոնում՝ պահանջելով հաշվել յուրաքանչյուր ձայն:

Բողոքի ցույցը տեղի է ունեցել Դեյլի հրապարակում: Կազմակերպիչները բաժանել են պաստառներ՝ «Վերջ Թրամփին» և «Թրամփ/Փենս, անհապաղ հեռացիր» գրություններով: Ելույթ ունեցողները դիմել են հավաքվածներին: Ցուցարարներն այնուհետև շրջել են Միչիգանի պողոտայով և Ուոքեր Դրայվով:

Բողոքի ցույցեր են տեղի ունեցել նաև Փենսիլվանիա նահանգի Ֆիլադելֆիա քաղաքում: Ցուցարարները հավաքվել են քաղաքի կենտրոնում՝ համոզվելու համար, որ յուրաքանչյուր ձայն հաշվարկված է, հայտնում է CBS Philly-ն: Ցույցին միացել են նաև նրանք, ովքեր բողոքում էին ոստիկանության կողմից աֆրոամերիկացի Ուոլթեր Ուոլեսի սպանությունից:

Բացի դրանից՝ հաղորդվել է, որ Օրեգոնի Պորտլենդ քաղաքում բողոքի ցույցերը վերածվել են անկարգությունների: Fox News- ի փոխանցմամբ՝ ցուցարարները նետել են մոլոտովյան կոկտեյլներ և ապակե շշեր: Նրանցից մեկի մոտ զենք է եղել: Ոստիկանությունը անկարգությունները որակել է՝ որպես խռովություն, բերման է ենթարկվել ավելի քան տասը մարդ: Պետական ​​մարմինները որոշել են ազգային գվարդիան օգտագործել հասարակական կարգը պահպանելու համար:

ԱՄՆ նախագահական ընտրություններն անցկացվել են նոյեմբերի 3-ին, սակայն հաղթողի անունը դեռ չի հայտարարվել: Որոշ նահանգներում հաշվարկները դեռ շարունակվում են: Վերջին տվյալների համաձայն, առաջատարն է դեմոկրատների թեկնածու Ջո Բայդենը, որի վերջնական հաղթանակի համար այս պահին անհրաժեշտ է ստանալ վեց ընտրիչի ձայն: Գործող նախագահ Դոնալդ Թրամփը հայտարարել է իր հաղթանակի մասին և մեղադրել դեմոկրատներին «ընտրությունները գողանալու» փորձի մեջ: Նրա նախընտրական շտաբը մտադիր է վերահաշվարկ պահանջել: