ԼՂ հակամարտությունը կարող է լուծվել միայն բանակցությունների միջոցով․ Քերի Քավանո

Լեռնային Ղարաբաղում հակամարտությունը ռազմական լուծում չունի և կարող է կարգավորվել միայն բանակցությունների միջոցով։ ТАСС լրատվական գործակալության հետ զրույցում նման կարծիք է հայտնել ամերիկացի դեսպան և եվրասիական հակամարտությունների հատուկ բանակցող Քերի Քավանոն, ով 1999-2001 թվականներին ԵԱՀԿ Մինսկի խմբում զբաղեցրել է համանախագահի պաշտոնը։

«Այնտեղ ռազմական գործողությունները ոչ մեկի շահերից չեն բխում: Հակամարտության լուծման միակ ճանապարհը բանակցություններն են։ Դա դժվար ճանապարհ է։ Եթե հարց տանք՝ արդյո՞ք Ղարաբաղի վերաբերյալ համաձայնագիր մշակելու հնարավորություն կա, ապա պատասխանն է՝ այո՛։ Բայց դրան հասնելու համար երկու կողմերը պետք է բանակցելու պատրաստակամություն դրսևորեն և իրենց երկրների հանրային կարծիքը նախապատրաստեն այդպիսի համաձայնության ընդունմանը։ Ռազմական գործողությունների պայմաններում դրան հասնելը չափազանց դժվար է», – ասել է Քավանոն։

Քերի Քավանոյի կարծիքով՝ ԵԱՀԿ Մինսկի խմբի շրջանակում ձեռնարկվող կարգավորման ջանքերը նախկինի պես անհրաժեշտ են։  Քավանոն շեշտել է, որ երկու կողմերը «պետք է որոնեն փոխընդունելի փոխզիջման մշակման հնարավորությունը»։

«Հիմա երկու կողմն էլ առավելագույնս կոշտ դիրքորոշում ունի: Երկու կողմն էլ այն պաշտպանում է հանրային տիրույթում, սակայն նրանք պետք է նստեն բանակցային սեղանի շուրջ և փոխզիջման պլան մշակեն։ Կարծում եմ՝ լուծում հնարավոր է գտնել», – շարունակել է ամերիկացի դեսպանը։

Քերի Քավանոյի կարծիքով՝ Մինսկի խմբի համանախագահող երկրները՝ ԱՄՆ-ն, Ռուսաստանը և Ֆրանսիան, պետք է այսուհետ ևս բանակցություններում հանդես գան միջնորդի դերում։

«Դուք տեսաք, թե որքան դժվար էր հասնել հրադադարի մասին համաձայնագրին։ Հիմա հակամարտող երկու կողմերի դեմ առ դեմ բանակցությունները ոչ մի բանի չեն հանգեցնի։ Այս պահին լուծում գտնելու համար նրանք միջնորդների կարիք ունեն, բայց նրանք միջնորդության պետք է դիմեն՝ ունենալով փոխզիջման պատրաստակամություն», – ասել է Քավանոն։

Անդրադառնալով Լեռնային Ղարաբաղում հակամարտության կարգավորման որոնումներում ԱՄՆ-ի դերին վերաբերող հարցին՝ դեսպանը նշել է, որ «վերջին տարիներին այդ դերն ավելի պակաս ակտիվ է եղել», բայց դրա հետ մեկտեղ նա չի բացառել, որ նոյեմբերի 3-ին կայանալիք նախագահական ընտրություններից հետո ԱՄՆ-ն, հնարավոր է, այս հարցում ավելի ակտիվ քաղաքականություն կվարի։