Շատերի սպասումներին հակառակ, Հենրիխ Մխիթարյանը երեկ դուրս չեկավ խաղադաշտ և անգամ ընդգրկված չէր «Սթոք Սիթիի» հետ հանդիպման հայտացուցակում: Իսկ սպասումները կապված էին Ժոզե Մոուրինյոյի հետ, քանի որ վերջինս երկու օր առաջ նշել էր, որ Մխիթարյանը հավանաբար կմասնակցի խաղին: Երեկ երեկոյան անգլիական «Դեյլի Մեյլը» նույնիսկ մարզումներից առաջ Մխիթարյանի լուսանկարն էր հրապարակել բարձր տրամադրությամբ թիմի հետ հյուրանոց ժամանելիս: «Մանչեսթեր Յունայթեդի» գլխավոր մարզիչ Ժոզե Մոուրինյոյին խաղից առաջ հարցրել են, թե ինչու «Սթոք Սիթիի» հետ հանդիպման հայտացուցակից նա, ի վերջո, դուրս թողեց Մխիթարյանին: Մոուրինյոն հետևյալ պատասխանն է տվել:
«Կստեմ, եթե ասեմ, որ դա միայն մարտավարական որոշում էր: Ընտրեցի այն ֆուտբոլիստներին, ում մասին գիտենք, որ նրանց մտքերը 100 տոկոսով կենտրոնացված են «Մանչեսթեր Յունայթեդի» վրա: Չեմ կարծում, որ ֆուտբոլիստի համար հեշտ է խաղալ, եթե կասկածներ կան ապագայի վերաբերյալ: Դա ավելորդ ճնշում է ավելացնում, որը պետք չէ խաղացողին: Այդ պատճառով կարծում եմ՝ դա լավագույն որոշումն էր նրա և մեզ համար:»
Ինչ վերաբերում է խաղին, ապա այն ավարտվեց «Մանչեստեր Յունայթեդի» հաղթանակով՝ 3-0 հաշվով: Գոլերի հեղինակ դարձան Վալենսիան, Մարսիալը և Լուկակուն:
