Կորոնավիրուսը գոյատևել է հեռախոսի ապակու և թղթադրամի վրա 28 օր, սակայն մթության մեջ

SARS-Cov-2 կորոնավիրուսը, որը COVID-19 հիվանդության հարուցիչն է հանդիսանում, լաբորատոր պայմաններում 28 օր պահպանվել է այնպիսի մակերեսների վրա, ինչպիսիք են թղթե և պոլիմերային թղթադրամները, ապակին, հեռախոսի էկրանները և չժանգոտող պողպատը: BBC-ի փոխանցմամբ՝ այս մասին են վկայում Ավստրալիայի պետական գիտական գործակալության կողմից կատարված հետազոտությունները:

Լրատվամիջոցը նշում է, որ հետազոտությունը կատարվել է մթության մեջ, իսկ ինչպես արդեն հայտնի է, ուլտրամանուշակագույն ճառագայթները կարող են սպանել վիրուսը:

Ըստ ավելի վաղ կատարված հետազոտություների՝ SARS-Cov-2-ը թղթադրամների և ապակու վրա կարող է պահպանվել 2-3 օր, իսկ պլաստմասսի և չժանգոտվող պողպատի վրա՝ մինչև 6 օր:

Ավստրալիացի գիտնականները պարզել են, որ ըստ Ցելսիուսի 20 աստիճանում և մթության մեջ վիրուսը հարթ մակերեսների, օրինակ՝ հեռախոսի ապակու և թղթադրամի վրա կարող է պահպանվել 28 օր: Համեմատության համար նշվում է, որ գրիպի վիրուսը նույն պայմաններում կարող է պահպանվել 17 օր:

Հետազոտության ընթացքում պարզվել է, որ վիրուսը ավելի շուտ է մահանում տաք ջերմաստիճանում, քան ցուրտ պայմաններում: 40 աստիճանից բարձր ջերմաստիճանում վիրուսը դադարել է վարակիչ լինել 24 ժամում: Բացի այդ, SARS-Cov-2-ը հարթ մակերեսների վրա ավելի երկար է մնացել, քան ծակոտկեն մակերեսների, օրինակ՝ կտորի վրա:

BBC-ն նշում է, որ Քարդիֆի համալսարանի մրսածության ուսումնասիրության կենտրոնի նախկին տնօրեն, պրոֆեսոր Ռոն Էկլեսը քննադատել է այս հետազոտությունը՝ նշելով, որ սա «անհարկի վախ է առաջացնում հանրության շրջանում»: Նա ասել է, որ վիրուսը մակերեսի վրա է հայտնվում լորձի միջոցով, երբ մարդը փռշտում է, հազում կամ կեղտոտ ձեռքերով դիպչում մակերեսին, սակայն այս հետազոտությունում մարդու լորձը չի օգտագործվել՝ որպես վիրուսի տարածման միջոց:

Ավստրալիացի մասնագետները գտնում են, որ իրենց հետազոտությունը կարևոր է, քանի որ մակերեսների վրա վիրուսի կենսունակության որոշումը հնարավորություն է տալիս ավելի ճշգրտորեն կանխատեսել և կանխել դրա տարածումը:

Հետազոտության հեղինակների կարծիքով՝ չժանգոտվող մակերեսներին և ցածր ջերմաստիճանում վիրուսի երկար պահպանումը բացատրում է կորոնավիրուսի բռնկումները մսի վերամշակման և սառեցման գործարաններում:

Ըստ հետազոտողների՝ իրենց հետազոտությունը ևս մեկ անգամ հաստատում է նախկին հետազոտություններն այն մասին, որ նոր կորոնավիրուսը կարող է պահպանվել թարմ սառեցված մթերքի վրա: