Գյումրիի արյան փոխներարկման կայանում հերթերը չեն պակասում

Հանրապետության տարբեր բուժհաստատություններում, արյունաբանական կենտրոններում շարունակվում է կամավոր արյունատվությունը: Երեկվանից մեծ քանակության արյուն է պահեստավորվել, և այսօր արդեն որոշում է կայացվել դրական ռեզուս ունեցողներին հերթագրելու և միայն բացասական ռեզուսով դոնորներին ընդունելու մասին: Գյումրիի արյան փոխներարկման կայանում երկու օր է՝ հերթեր են: Կամավոր դոնոր դառնալու ցանկություն հայտնում են անկախ տարիքից ու առողջական վիճակից:

Հերթը Գյումրիի արյան փոխներարկման կայանում սկսվում է բակից: Սա միակ բուժհաստատությունն է, որտեղ Շիրակի մարզի գյուղերի ու քաղաքների բնակիչները կարող են արյուն հանձնել: Այստեղ նախ ճշտում են, թե արյան ինչպիսի ռեզուս ունեն դոնորները: Դրական ռեզուս ունեցողներին հերթագրում են, իսկ առաջնահերթ դեպի արյուն հանձնելու սենյակներ ուղղորդում են միայն բացասական ռեզուս ունեցողներին:

Արմեն Ավետիսյանը բժիշկ է: Վիրահատությունն ավարտել էր, մյուս հիվանդներին խնդրել, որ սպասեն մինչև արյուն կհանձնի ու կվերադառնա: Որդին էլ է առաջնագծում, ինքն էլ թիկունքն է ամուր պահում՝ մասնագիտական պարտքը կատարելով՝ նաև դոնոր դառնալով:

«Իմ արյունը առաջին բացասական է: Մենք՝ յուրաքանչյուրս, գոնե մեկ անգամ կյանքում պետք է հանձնենք արյուն այսպիսի պահերի համար: Լայն ժամանակ, խաղաղ ժամանակ, տա Աստված՝ երբեք պետք չգա, բայց պատերազմական իրավիճակում ամեն կաթիլ արյունը պետք է, ամեն կաթիլ արյունը կարող է կյանք փրկել»,- Shantnews-ի հետ զրույցում ասել է բժիշկ Արմեն Ավետիսյանը:

Սամվել Մանուկյանը Ապրիլյան պատերազմի մասնակից է: Մինչ արյան դոնոր դառնալը, նաև կամավորագրվել է: Սպասում է, թե երբ առաջնագիծ մեկնելու հնարավորություն իրեն էլ կընձեռվի:

«Ես թոհուբոհի միջով անցած մարդ եմ, ընկերներս առաջնագծում են, սպասում եմ, թե  ես երբ եմ գնալու: Իսկ մինչ այդ դոնորությամբ, ֆինանսավորմամբ, ով ինչով կարող է պետք է օգնի: Մենք մեզ պետք է օգնենք առաջին հերթին»,- Shantnews-ին ասել է Սամվել Մանուկյանը:

Գյումրիի արյան կայանում դրական ռեզուս ունեցող ու արյան դոնոր դառնալու ցանկություն ունեցողների հսկայական ցանկ է կազմվել: Նրանց կարիքը դեռ չկա: Հանրապետությունում դրական ռեզուսով արյան պաշարները մեծ են: Դոնորներին պահանջներ էլ են առաջադրվում: Հստակ սահմանված է, թե ովքեր չեն կարող դոնոր լինել:

«Դոնոր չեն կարող լինել նրանք, ովքեր ունեն քրոնիկական հիվանդություններ, եթե տարիքը  18-ից ցածր է կամ 65-ից բարձր, և եթե քաշը չի բավարարում: Կանանց դեպքում դա 53 կգ-ն է, իսկ տղամարդկանց դեպքում՝ 63 կգ-ը: Հիմա միայն բացասական ռեզուս է պետք: Դրականը նախորդ օրը մեծ քանակությամբ պահեստավորել ենք: Այդ պատճառով այսօր չենք վերցնում: Հերթագրում ենք, անհրաժեշտության դեպքում կապ կհաստատենք, կվերցնենք»,- Shantnews-ին ասել է Գյումրիի արյան փոխներարկման կայանի տնօրեն Սուսաննա Պետրոսյանը:

Գյումրիի կայանում արյան պահեստավորման խնդիր առայժմ չկա: 3 սառնարաններն արդեն ամբողջությամբ զբաղեցված են, ու պահեստավորումը դեռ շարունակվում է: Այստեղից դոնորական արյուն այլ բուժհաստատություններ դեռ չի ուղարկվել: