Գարնանը թունաքիմիկատների թանկացում է սպասվում

Հայաստանում գարնանը թունաքիմիկատների գնի կտրուկ աճ է սպասվում: Այս մասին տեղեկությունը ShantNews-ի հետ զրույցում հաստատեցին ագրոքիմիկատներ ու պարարտանյութեր ներմուծող երկու ընկերությունների՝ «Հրաշք այգի» և «Արտագրո» ՍՊԸ-ի ներկայացուցիչները:

Բանն այն է, որ Հայաստան ներկրվող բուսական քիմիկատների հիմնական մասը բերվում է Չինաստանից, որտեղ քիմիական նյութերի արտադրությունը մեծ մասշտաբների է հասնում, սա էլ իր հերթին հանգեցնում է այդ երկրում օդի չափազանց աղտոտման:

Բնապահպանական ռիսկերից խուսափելու նպատակով Չինաստանի իշխանությունները նախորդ տարեվերջին խստացումներ են մտցրել թունաքիմիկատների արտադրության ոլորտում: Արդյունքում՝ շատ ընկերություններ փակվել են, իսկ դրանց մյուս մասը վերազինման ու նոր տեխնոլոգիաների ներդրման արդյունքում հայտարարել է արտադրանքի մոտ 20 տոկոսանոց թանկացման մասին:

Թունաքիմիկատներ ու պարարտանյութեր ներկրող երկու ընկերություններից էլ հայտնեցին, որ գնաճն անակնկալ է եղել նաև ներկրող ընկերությունների համար, սակայն, արտադրանքն արդեն պատվիրված է:

«Մեզ համար էլ էր սա անսպասելի, քանի որ նախորդ տարիներին թանկացումներ չէին գրանցվել: Երբ տեղեկանալուց հետո ուսումնասիրեցինք համաշխարհային շուկան, հասկացանք, որ գնային տատանումները միայն մեզ մոտ չեն գրանցվելու, գնային փոփոխություններ կլինեն Չինաստանի հետ այս ոլորտում առևտրային հարաբերություններ ունեցող բոլոր երկրներում»,- ասաց «Արտագրո» ընկերության տնօրեն Արթուր Կտրակյանը:

Հարցին, թե ինչ չափանիշներով է որոշվում ներկրվող ապրանքի գնային սանդղակն ու 20 տոկոս գնաճի դեպքում որքանով կարող է բարձրանալ թունաքիմիկատների գինը Հայաստանում, Կտրակյանն ասաց, որ գնային քաղաքականությունը հիմնականում կախված է արտադրանքի տեսակից ու ինքնարժեքից:

«Սահմանված գների կտրուկ բարձրացումը կարող է անմիջական ազդեցություն ունենալ ոչ միայն գյուղատնտեսների գնողունակության, այլև ներկրող ընկերության կողմից արտադրանքի սպառման վրա, այս դեպքում մեր երկրի շուկայական չափանիշներին հարմարվելու խնդիր է առաջանում: Իսկ սանդղակը սահմանվում է ինքնարժեքից մոտ 15-20 տոկոս շահութային եկամտով: Ըստ այդմ, կարծում եմ, որ այս գարնանը թունաքիմիկատները հնարավոր կլինի ձեռք բերել նախկինից մոտ 20 տոկոս ավելի բարձր գնով»,- ասաց մասնագետը:

Ի տարբերություն չինական արտադրանքի՝ եվրոպական ընկերություններից ներկրվող թունաքիմիկատների շուկայում թանկացման միտում չի նկատվում:

Այս մասին ShantNews-ին հայտնեցին եվրոպական Linitek ընկերության հետ համագործակցող «Բույսերի աշխարհ» ագրո և թունաքիմիկատների խանութների ցանցից:

Թանկացումներից, սակայն, չեն խուսափի արտերկրից ներմուծվող պարարտանյութերի որոշ տեսակներ: Սա պայմանավորված է նրանով, որ դրանք որոշ չափով պարունակում են գնային փոփոխության ենթարկված այդ նույն քիմիկատներից: Նշենք, որ թանկացումներ կան նաև Ռուսաստանից ներկրվող պարարտանյութերի շուկայում: