Քաղաքային ավանից գյուղական բնակավայրի կարգավիճակ ստացած Լենգեսավանում տարիներով չլուծված՝ տանիքների նորոգման խնդիրը լուծում է ստանում

Պետական սուբվենցիոն ծրագրերը հնարավորություն ստեղծեցին շատ բնակավայրերի շատ խնդիրներ, որոնք տասնամյակներով անտեսված էին մնում, լուծում ստանան։ Նախկին քաղաքային ավանը՝ Լենգեսը, որն արդեն 10 տարուց ավելի է՝ գյուղական թաղամասի կարգավիճակ ունի, սուբվենցիոն ծրագրերի ցանկում է հայտնվել։ Երկու շենքի տանիք է նորոգվում։ Եվս երկուսի տանիքներն էլ վերանորոգվել էին անցած տարի՝ դարձյալ սուբվենցիոն ծրագրով։

Լենգես ավանի այս շենքերը կառուցվել են 1992 թվականին: Բայց տարածքը բնակեցնել սկսել են 1926 թվականից, երբ սկսել է կառուցվել Լենգես հէկը։ Հիմա էլ ավանատիպ բնակավայրում շարունակում են ապրել հէկի աշխատակիցների ընտանիքները։ Լենգեսն ավան է մնում, բայց վարչական ենթակայությունն է փոխվել, նախկինում քաղաքի ենթակայության էր, 2008 թվականից արդեն Վահրամաբերդ գյուղի թաղամաս է:

«Մենք պատկանում էինք քաղաքին, հետո ինչ-ինչ պատճառներով քնանք-ելանք, էղանք գյուղացի, գյուղացի դառնալով էղանք Վահրամաբերդ համայնքի թաղամաս, բայց ո՛չ մեզ հող տվեցին, ո՛չ էլ գյուղի տարածքից օգտվեցինք»,- պատմում է Լենգեսավան թաղամասի բնակիչ Սեդա Ավետիսյանը։

Մինչև 2000-ականները դպրոց էլ ունեին, հիմա լենգեսցի երեխաները գնում են 2 կմ հեռու գտնվող Վահրամաբերդ գյուղի դպրոց։ Ավան թաղամասում հաշվառված է 40 ընտանիք, այժմ բնակվում են 18-ը: Ապրողների դիմումներն  են պատճառ դարձել, որ շենքերի տանիքներն ընդգրկվել են նորոգման ծրագրում։

«Կա տեխնիկական վիճակի մասին եզրակացություն։ Եթե նայեք՝ տանիքի  ներսում կան դույլեր դրված, միշտ կաթոցներ են եղել, բնակիչների կողմից եղել են ահազանգեր ու էս աշխատանքն էլ կատարվում է հիմնականում բնակիչների առաջարկություններով՝ որպես առաջնահերթ խնդիր»,- ասում է Մարմաշեն համայնքի ղեկավարի տեղակալ Արտաշ Դրմեյանը։

1992 թվականին շենքերը տանիքապատել են ազբոշիֆերով, որոնք 30 տարում այնքան են քայքայվել ու վնասվել, որ տանիքի որոշ հատվածներ անգամ առանց ծածկի են մնացել։ Բաց տանիքի վնասներն ու հետևանքները երրորդից մինչև առաջին հարկի բնակարաններում են։

Սկսված նորոգումները միայն ազբոշիֆերը թիթեղներով փոխարինելուն չեն վերաբերում, փոխում են նաև փայտյա կառուցատարրերը։ Դրանց ամրությանը ևս վնաս է հասել։

«Փայտերը, որոնք փտած են, կհանենք, նորը կտեղադրենք, ջրատարների «ժեշտերից» կան, որոնք առողջ օգտագործելի են, կմնա տեղը, մյուսները կփոխենք, նորը կդնենք, ջրահեռացման «տրուբեքը» ամբողջությամբ կփոխենք»,- աշխատանքն է ներկայացնում շինարար Սպարտակ Մելքոնյանը։

Երկու շենքի տանիքների նորոգումները շինարարը նախատեսում է ժամկետներից շուտ ավարտել, քանի դեռ աշնանային տեղումները չեն սկսվել։ Աշխատանքների տեմպերը կախված են շինարարներից։ Երկու շենքի տանիքների նորոգման ընթացքին ու որակին հետևում է միաժամանակ երկու կառույց՝ տեխնիկական և հեղինակային վերահսկողական ընկերությունները։