Գյումրիի կենտրոնական գրադարանը կգործի քաղաքապետարանի հիմնանորոգված կիսանկուղային հարկում․19-րդ դարի հին մասնաշենքը կվերականգնվի

Մկրտիչ Արմենի անվան կենտրոնական գրադարանը տեղափոխվում է նոր հասցե ։  Քաղաքապետարանի կիսանկուղային հարկը, որը վերանորոգվել է  սուբվենցիոն ծրագրով , վերածվել է  մշակութային կենտրոնի,որտեղ գրադարանից բացի կբացվեն  Գյումրիի պատմության թանգարան  ու  արվեստի  ցուցասրահ։Նոր շենքում վերջապես քաղաքային գրադարանը հնարավորություն կունենա ընթերցողներին ներկայացնել ֆոնդերում պահվող ամբողջ գրականությունը։

Կենտրոնական գրադարանի մոտ 27 հազար կտոր գրականությունը   նոր ու հարմարավետ  գրադարակներում է  դասավորվում :Գրքերի մեծ մասն առաջին անգամ են աշխատակիցները  պահոցներից  դուրս բերել։ Նախկին շենքում  ամբողջ գրքային ֆոնդը   ներկայացնելու  հնարավորություն  չեն ունեցել:

Նոր տարածքում  գրքերի պահպանման   անհրաժեշտ ջերմաստիճան կապահովվի ։    Քաղաքային գրադարանն   առաջին անգամ կունենա  ընդարձակ ընթերցասրահ։ Եզակի ու հատընտիր  գրականությունը , որն արգելված է  դուրս տանել, ընթերցողներին հնարավորություն կտրվի տեղում կարդալու ,ուսումնասիրելու ։

Մոտ 25 տարի գրադարանը տեղակայված էր  Համբարձումյան 35 հասցեում։ Շենքը  Կումայրի արգելոց թանգարանի պատմամշակութային  կառույցներից մեկն է ։Սև քարով ու  ալեքպոլյան ոճին բնորոշ զարդաքանդակներով շինությունը  կառուցվել է 1875 թվականին։  19-րդ դարի կեսերի կառույցը որոշ պատմությունների , եղել է   քաղաքում հայտնի բժիշկ Մխիթարյանի առանձնատունը,այնուհետ  վերածվել է մանկապարտեզի:

Շենքի հաստ պատերի ու երկու մետրի հասնող  հիմքերի ամրությունը սակայն հարյուրամյակների ընթացքում խախտվել է ։Պատշաճ պահապանություն չի տարվել , խոնավության պատճառով որոշ հատվածներում   քարաթափումներ են եղել, փայտաշեն ծածկը  քայքայվել է։

Հանրապետական նշանակության հուշարձան -շինությունը  նախատեսվում  է վերականգնել ՝անփոփոխ թողնելով ալեքպոլյան  արտաքին ճարտարապետական տեսքը ։Կառույցը կունենա  մշակութային ուղղվածություն ,մի քանի առաջարկներ քաղաքապետարանն արդեն ստացել է։

«Մեր մեծ նկարիչներից մեկի գործերը կարող են  ցուցադրվել,քանդակագործներից նաև առաջարկ կա էդտեղ օգտագործել որպես սրահ:Տարբեր առաջարկներ կան,հաստատ  շենքը  լինելու է մշակութային  կենտրոն»,-նշեց Գյումրիի քաղաքապետի տեղակալ  Ռուբեն Սանոյանը:

Մինչ վերականգնման աշխատանքների համար  միջոցներ գտնելը քաղաքապետարանը զբաղված է նաև կառույցն ամբողջությամբ տնօրինելու հարցերի կարգավորումով ։  Համայնքային ենթակայության շենքի մի հատվածը  բնակեցված է,երկրաշարժից հետո  այստեղ  ապրող  ընտանիքը տարածքն ազատել  հրաժարվում է :

«Շենքը համայնքապատկան է,բայց էնտեղ նաև մասնավոր կա:Մենք հիմա դատական պրոցեսների մեջ ենք,մի հատվածը էնտեղ մասնավորը  զբաղեցրել  և չի ուզում ազատել տարածքը:Հիմա այդ պրոցեսների մեջ ենք,տեսնենք ինչ է լինելու »,-ասաց  Ռուբեն Սանոյանը։

Կառույցի տնօրինման  հարցը  մի քանի տարի  է վիճարկվում է դատարանում ։ Գործընթացն տարիներով ձգձգվում է փաստաթղթային անհամապատասխանությունների պատճառով ։ Դրանց օրինականությունը ևս վիճարկելի  է ։