«Գյումրի» ԲԿ-ում վերսկսվել են պլանային վիրահատությունները․ հետաձգումների պատճառը կորոնավիրուսի դեպքերն էին

«Գյումրի» բժշկական կենտրոնում վերսկսվել են պլանային վիրահատությունները,որոնք դադարեցվել էին կորոնավիրուսային հիվանդության դեպքերի աճով պայմանավորված: Արտակարգ դրության պայմաններում բժշկական կենտրոնը մինչ այդ սպասարկում էր միայն անհետաձգելի դեպքերը, իսկ բազմապրոֆիլ ուղղվածության բոլոր  պլանային վիրահատությունները հետաձգվել էին։ Հիվանդանոցը փորձում է վերադառնալ աշխատանքային բնականոն ռեժիմին։ Տեսակցությունները բացառված են, հիվանդների սնունդն ու անհրաժեշտ պարագաները փոխանցվում են  բուժաշխատողների միջոցով:

Համաճարակային իրավիճակը նոր կարգուկանոն է թելադրել բուժկենտրոնում, ամբողջ շենքը իր բոլոր   բաժանմունքներով հատուկ գունային տարբերանշաններով գոտիավորվել են` ցածր ռիսկայինից մինչև կարմիր գոտի:

«Բարձր ռիսկային գոտի կա, կարմիր գոտի կա, որտեղ ընդհանրապես արգելվում է մտնել, օրինակ՝ տրիաժ ծառայությունը։ Միջին գոտիներ կան, որտեղ արդեն պաշտպանիչ արտահագուստով է թույլատրվում մտնել, ակնոցներով ու դիմակներով»,- նշեց «Գյումրի» ԲԿ-ի տնօրեն Արմեն Իսահակյանը։

Անվտանգության կանոնները պահպանելով, բժշկական կենտրոնն արդեն 20 օր է միայն անհետաձգելի դեպքերը չէ որ սպասարկում է։ Վերսկսել են պլանային վիրահատությունները, որոնք չէին կատարում մարտ ամսից:

«Էն հիվանդները, որոնք գալիս են պլանային վիրահատությունների համար, նախապես ունենում են իրենց հետ  հանձնված կորոնավիրուսի թեստի պատասխան, ոչ ուշ, քան 48 ժամվա հնության հանձնված թեստի բացասական պատասխանով կամ տեղում են թեստավորվում»,- ընթացակարգի մանրամասները ներկայացրեց «Գյումրի» ԲԿ-ի գլխավոր բուժքույր Արուսյակ Գևորգյանը։

Կորոնավիրոուսով նոր վարակվածության դեպքերը մարզում թեև նվազում են արձանագրում,բայց  բուժկենտրոնը դեռ շարունակում է Covid-19-ով վարակված հիվանդների ընդունել, առանձնացված գործող տրիաժ ծառայությունում: Դադարեցված պլանային վիրահատությունների դադարեցման հետևանքով բուժհաստատությունում ֆինանսական խնդիրներ են առաջ եկել:

«70 տոկոս կորուստ է եղել, էդ կորուստի պատճառով մենք վարկ ենք վերցրել, պետության կողմից վճարվում է վեց տոկոսը, մյուս վեց տոկոսը մենք ենք տալիս։ Մոտ 130 միլիոն դրամի կարգի գումարի մասին է խոսքը»,- նշում է Արմեն Իսահակյանը։

Վարկերի օգնությանը դիմելու պատճառներից մեկն էլ այն է, որ մինչև տրիաժ ծառայության թույլտվությունը, բուժկենտրոնը սպասարկել է ծանր հիվանդների, որոնք վերակենդանացման բաժանմունք էին տեղափոխվում արդեն  Covid-19-ի դրական թեստով։ Նման հիվանդների բուժծառայության համար ֆինանսավորում նախատեսված չի եղել։

«Մենք ունեինք կուտակված մոտ 30-40 հիվանդների, որոնք չէին վճարվել։ Էդ ամբողջ հիվանդությունների պատմության նկարագրերը հրաման տալուց հետո պետությունը ընդունել է և ամբողջությամբ ֆինանսավորվել է՝ օրը 15 հազար դրամ»,- ասաց բուժհաստատության տնօրենը։

Առանձնացված տրիաժ բաժանմունքում այժմ 14 հիվանդ կա հոսպիտալացված, նրանցից 8-ը` ծանր թոքաբորբ ախտորոշումով, բայց թեստավորման բացասական արդյունքով։

Բաժանմունքներում ստացիոնար բուժում ստացողների թիվն ավելացել է պլանային վիրահատությունների վերսկսմամբ պայմանավորված:

Այս ընթացքում կենտրոնի բուժանձնակազմի մոտ 40 տոկոսը վարակվեց կորոնավիրուսով, մի մասը հիվանդանոցային, որոշներն էլ տնային մեկուսացման պայմաններում բուժում ստանալուց հետո վերադառնում են աշխատանքի։