Երեկ տեղացած ուժեղ կարկուտը վնասել է Շիրակի մարզի ցանքատարածությունները․ որոշ գյուղերում բերքը հավասարվել է հողին

Երեկ երեկոյան հորդառատ անձրևից առաջացած սելավաջրերը կրկին ողողել են Գյումրիի փողոցներն ու ցածրադիր թաղամասերը։ Հեղեղաջրերը լցվել են տների նկուղներն ու տնակները։ Մարզի բարձրադիր հատվածներում մոտ կես ժամ տեղացած կարկուտը մեծ վնասներ է հասցրել հացահատիկի ցանքատարածքներին, բանջարաբոստանային կուլտուրաներին ու մրգատու այգիներին։

Տուժել են հիմնականում Մարմաշեն խոշորացված համայնքի Ջաջուռ, Մեծ Սարիար բնակավայրերը, Ախուրյանի տարածաշրջանի մի քանի գյուղեր։

Հուլիսյան կարկտահարության վնասների հետևանքները դեռ չվերացված՝ մարզի մի քանի գյուղերում հերթական կարկուտն է տեղացել։ Վերջին շաբաթներին պարբերաբար տեղատարափ անձրևները ուղեկցվում են կարկտով։ Երեկ՝ ժամը 17-ի սահմաններում, ուժեղ կարկուտը վնասել է Ջաջուռ գյուղի ցանքատարածքները։ Գյուղացիները պատկերավոր նկարագրում էին կարկտի չափն ու հասցրած վնասները։

«Մոտ հինգ րոպե սառույց եկավ, դրանից հետո դարձավ սովորական կարկուտ»,- նկարագրում է ջաջուռցի հողագործներից մեկը:

Ցորենի ու հացահատիկային մյուս մշակաբույսերի դաշտերի վնասներն այնքան մեծ են, որ տնամերձների տուժած կուլտուրաները հողատերերի աչքին չեն երևում։ Վնասված ցանքատարածքները հիմնականում սահմանակից են Մեծ Սարիար գյուղին, որի մշակաբույսերը ևս տուժել են։

«Հատիկը փռված է գետնով մեկ, դաշտում արդեն խոտը հետն է ջարդած, հենց տակի հատվածից է ջարդել, ըսիգ ցույց կուդա, որ 50 տոկոսից ավելի է վնասել կարկուտը»,- ցորենի հասկը ձեռքին ցույց էր տալիս գյուղացիներից մյուսը:

Ցածրադիր հողերում արդեն պետք է բերքը հավաքած լինեին,  բայց ջաջուռցիները հասած արտերում հացքաղն ուշացրել էին անձրևների ու կոմբայնների պակասի պատճառով։

«Ինչխ քաղեմ, եթե հիմա բերեմ քաղելու բերեմ, չի կարող, կոտրված հասկերը շեղբը չի բռնի»,- նկարագրում էր գյուղացիներից մեկը:

Բերքահավաքի ընթացքում տեղումների հաճախանակությունն ավելանում է, կարկտաբեր ամպերը սովորաբար տարածք են մտնում Թուրքիայի հյուսիսարևտյան հատվածից։ Ցանքատարածքներն այդ ուղղությամբ լիարժեք պաշտպանված չեն։ Ջաջուռի վարչական տարածքում ոչ մի հակակարկտային կայան տեղադրված չէ։

Կարտաբեր ամպերի վտանգավորությունը չեզոքացնելու համար երեկ մարզի գրեթե բոլոր հակակարկտայիններն աշխատել են գերծանրաբեռնված։ Ըստ Լոռու ռադիոլոկացիոն կայանի պետի տեղակալ Սուրեն Ղազարյանի՝ հուլիս ամսին էլ արձակված ամպեր ցրող կրակոցները մի քանի անգամ գերազանցել են նախորդ տարվա ցուցանիշները։

«Հուլիսին 120 հազարից ավելի կրակոց է կատարվել, իսկ անցած տարի չորային եղանակ էր, մոտ 20-30 հազար կրակոց է եղել ամբողջ հուլիս ամսին, իսկ երեկ մեկ օրվա ընթացքում մոտ 40 հազար կրակոց է արվել 118 կայաններից»,- նշում է Լոռու ռադիոլոկացիոն կայանի պետի տեղակալ Սուրեն Ղազարյանը։

Կայանններից կրակոցները ուղղել են Թուրքիայի տարածքից մոտեցող 4-րդ աստիճանի վտանգավորության ամպի վրա, բայց ուժգնությունը չեզոքացնել չի ստացվել։

Թուրքիային սահմանակից հյուսիսարևմտյան  հատվածում պաշտպանիչ շերտն ամրացնելու համար դեռ մի քանի տասնյակ կայաններ են անհրաժեշտ։ Նախորդ տարվա 99 -ի փոխարեն մարզում այս պահին գործում են 134 զենիթային կայաններ, բայց նորից բավարար չեն տարածքում գտնվող հողերը պաշտպանելու համար։

Երեկ տեղացած  հորդառատ անձրևից հեղեղաջրերը նորից ողողել էին քաղաքի կենտրոնական փողոցներն ու թաղամասերը։ Արդեն որերորդ անգամ հորդ անձրևներն անվնաս չեն թողնում բնակելի հատվածներն ու փողոցները, որոնց մեծ մասում սելավատար համակարգ չկա, իսկ ջրահեռացման ցանցը կա՛մ չի հասցնում նման անձրևահոսքին դիմակայել, կա՛մ մի մասը խցանված է։