Հորդառատ անձրևները Գյումրիում ակտիվացրել են տնակային թաղամասի սողանքները

Հուլիսի սկզբից պարբերական դարձած հորդառատ անձրևները ի հայտ բերեցին Գյումրիի բազմաբնակարանների, վթարային դարձած սեփական տների և հատկապես տնակների խնդիրները: Քաղաքում 2000-ից ավելի տնակներ կան և գրեթե բոլորում ամեն անձրևի ժամանակ կաթոցներ են: Բացառություն չէ նաև նախկին բուսաբանական այգու տարածքի տնակային ավանը: Այստեղ տնակների մաշվածքին գումարվել է նաև սողանքի վտանգը: Տարածքում մի քանի տարի է` սողանքային երևույթներ են: Հորդառատ անձրևները սողանքի հոսքն արագացրել են, տնակները թեքվել են, հիմքերն ու պատերը` խարխլվել:

Քաղաքի ծայրամասում գտնվող ամենամեծ  կանաչ գոտին է: Նախկին անվանումն էլ է հուշում, որ տարածքը կանաչապատ է եղել: Բուսաբանական այգու տարածք 88-ից հետո տեղափոխվել են փլված շենքերի փլատակները: Հետո այդ շինաղբի վրա տնակներ են տեղադրվել: Ժամանակավոր՝ մեկ, երկու տարի ապրելու համար նախատեսված տնակների տարածք ընտրելիս երկար չեն մտածել: Հիմա էլ դրա հետևանքներին են բախվել: Շինաղբը սկսել է նստվածք տալ, տարածքում սողանքային երևույթներ են ի հայտ եկել:

«Երկրաշարժից հետո բետոն, շինարարական աղբ, ամբողջն էստեղ էր լցված: Մենք էլ այս տարածքում տնակներ ենք տեղադրել, բետոնել ենք, բայց հնար չկա: Տարիների ընթացքում արագացել է սողանքը: Առաջ տարին մեկ անգամ էր արագանում, հիմա արդեն` ամիսը մեկ: Հորդառատ անձրևներն էլ նպաստեցին, սեղմեց տնակները, թեքեց դեպի վար»,- Shantnews-ին ասել են բուսաբանական այգու տնակային ավանի բնակիչները:

Անձրևից հետո ակտիվացած սողանքի հետևանքները տնակներում առաջացած ճաքերն են: Վերանորոգումներն անօգուտ են՝ տնակի տակ եղած գրունտը սահում է, ժամանակավոր կացարաններն էլ հետը:

Բուսաբանական այգին քարտեզագրում չունի: Ուսումնասիրություններով մի քանի գոտի է առանձնացվել՝ հնագիտական, եկեղեցապատկան, կանաչ և սողանքային: Սողանքային գոտին էլ իր հերթին է երկու հատվածի բաժանված: Մայր Հայաստան հուշահամալիրին հարող տարածքում, որտեղ սողանքային երևույթներ վաղուց են եղել, հաստաբուն ծառեր կան: Տարիներ առաջ սողանքից պաշտպանվելու համար են տնկել և հիմա այդ հատվածում սողանքի ակտիվացումը մեծ չէ: Իսկ այն տարածքում, որտեղ վերջին տարիներին է սողանքը սկսվել, ծառերը դեռ փոքր են, արմատները հողի հոսքը պահել չեն կարող:

«Անընդհատ վերանորոգում ենք, բայց անարդյունք: Լուծումն այն է, որ բնակարան հատկացնեն մեզ: Թե չէ, մեր ուժերով անընդհատ նորոգում ենք, բայց սողանքի պատճառով էլի նույն վիճակն է ստեղծվում»,- ասել են տարածքի բնակիչները:

Լուծումը տարածքի ազատումն ու բնակարանային փոխհատուցումն է, բայց սողանքային տարածքում ապրող տնակներից ոչ մեկի բնակիչը անօթևանի կարգավիճակ չունի, բնակարանի պարտք ու պահանջ ունենալ չեն կարող: Տարեսկզբին, երբ քաղաքապետարանը հայտարարեց, որ ազատ մնացած սոցիալական բնակարանների շահառու կարող են դառնալ կանաչ գոտում տեղադրված տնակների բնակիչները, դիմեցին, բայց բնակարանները հատկացվեցին հուլիսի 13-ին Գյումրիում հեղեղից տուժած ավտոկայանի բանավանի 6 տնակների բնակիչներին:

Հիմա սողանքային հատվածի տնակների բնակիչները այն 250-ից ավելի ընտանիքների ցանկում են, որոնք տնակը վերանորոգելու համար աջակցության խնդրանքով են դիմել քաղաքապետարան: Կտուրի, հատակի ու պատերի ամրացման աշխատանքները կարող են ժամանակավորապես ապահովագրել տնակները, մինչև սողանքի նոր ակտիվացումը: