Կինոաշխարհի տարվա ամփոփումը. դեմքեր, դեպքեր, ուրախ ու տխուր դրվագներ

2017-ը մոտենում է իր ավարտին, և  2018-ից մեզ հաշված ժամեր են բաժանում: Իսկական ժամանակ է ամփոփել այս տարվա կինոաշխարհի ամենահետաքրքիր իրադարձությունները և խոսել  տարվա ամենասպասված ու քննարկված ֆիլմերի մասին: Դժվար է ասել, թե մոտավորապես քանի հարյուր հազար ֆիլմ է նկարահանվել այս տարվա ընթացքում, բայց, եթե փորձենք  հավաքել տարվա ֆիլմային և իրադարձային խճանկարը, ապա մոտավորապես այսպիսի պատկեր կստացվի:

2017-ի ամենածիծաղելի կինոիրադարձություններից մեկը էնդրյու Գարֆիլդի և Ռայան Ռեյնոլդիսի կրքոտ համբույրն էր «Ոսկե գլոբուս» մրցանակաբաշխաության ժամանակ: Իսկ համբույրի պատճառը գրազն էր: Ռայան Ռեյնոլդսն առաջադրված էր «Լավագույն կատակերգական դերասան» անվանակարգում և իր կողքը նստած էնդրյուի հետ գրազ էր եկել, որ եթե ինքը չհաղթի, ապա իրենք բոլորի աչքի առաջ կհամբուրվեն: Արդյունքում հաղթեց Ռայան Գոսլինգը, իսկ Ռեյնոլդսը որոշեց իր խոսքի տերը լինել:

Հաջորդ և՛ ծիծաղելի, և՛ տխուր դեպքը տեղի ունեցավ «Օսկար» մրցանակաբաշխության ժամանակ: Լեգենդար Բոննիի ու Քլայդի դերակատարներին վստահված էր ամենապատասխանատու գործը՝  նրանք պետք հայտարարեին «Տարվա լավագույն ֆիլմը», սակայն նրանց սխալմամբ ուրիշ ծրար էին տվել և նրանք առանց վարանելու այդ անվանակարգում հաղթող ֆիլմ հայտարարեցին «Լա-Լա Լենդը», սակայն երբ ֆիլմի անձնակազմը բեմում էր և արդեն ուզում էր շնորհակալական խոսք ասել, բեմ բերեցին իսկական հաղթող ֆիլմի ծրարը:

Հեփի էնդը պատկանում էր Բարրի Ջենքինսի  «Լուսնի լույսը» ֆիլմին:

Այս տարի կինոաշխարհում եղան նաև վատ իրադարձություններ: Հոլիվուդյան հայտնի պրոդյուսեր Հարվի Վայնշթայինին մի քանի տասնյակ կին մեղադրեց սեռական ոտնձգությունների մեջ: Պրոդյուսերը, օգտագործելով իր հզոր ազդեցությունը, ստիպում էր ֆիլմերի դերասանուհիներին դերերի դիմաց սեռական հարաբերություն ունենալ իր հետ: Այդ կանանց թվում էին հայտնի դերասանուհիներ Գվինեթ Փելթրոուն, Անջելինա Ջոլին, Լեա Սեյդուն, էվա Գրինը և այլք: Սկանդալից հետո Հարվի Վայնշտայնը հեռացվել է Ամերիկյան կինոարվեստի և գիտության ակադեմիայից:

Հարվի Վայնշթայնից հետո Հոլիվուդում դոմինոյի էֆեկտի պես մեկը մյուսի հետևից սկսեցին հնչել այլ կինոգործիչների անուններ, որոնք նույնպես սեռական ոտնձգություններ են իրականացրել իրենց գործընկերների հանդեպ: Այդ «վատ տղաների» ցուցակում տեղ գտավ նաև դերասան Քևին Սփեյսին: Սկանդալից հետո Սփեյսիի կարիերան նույնպես անդունդը գլորվեց՝ կինոարտադրող ընկերությունները խզեցին իրենց պայմանագրերը դերասանի հետ, նրան հեռացրին «Խաղաքարտերի տնակը» սերիալից:

Ամառը շատ ցուրտ էր «Գահերի խաղը» հեռուստասերիալի երկրպագուների համար: Հուլիսի 16-ից մինչև օգոստոսի 27-ն ընկած ժամանակահատվածում ամեն երկուշաբթի գրեթե ողջ աշխարհը դիտում էր «Գահերի խաղը» սերիալի 7-րդ եթերաշրջանի սերիաները: Այս հեռուստասերիալն արդեն 6-րդ տարին անընդմեջ  ճանաչվել է «Տարվա ամենաշատ ներբեռնված հեռուստասերիալը»: Միայն 7-րդ եթերաշրջանի վերջին սերիան միաժամանակ ներբեռնել է 400 հազար մարդ:

Անցնող տարվա ֆինանսապես ամենահաջողված ֆիլմ է ճանաչվել «Գեղեցկուհին և հրեշը» երաժշտական  ֆիլմը: Համաշխարհային կինովարձույթում այն հավաքել է 1 մլրդ 263 մլն դոլար:

Այս տարի դերասանական իր առաջին քայլերն արեց ֆուտբոլիստ Դեյվիդ Բեքհեմը, նա նկարահանվել է բրիտանացի ռեժիսոր Գայ Ռիչիի «Կլոր սեղանի ասպետները: Արթուր թագավորը» ֆիլմում: 

2017-ի կինոաշխարհի հետաքրքիր փաստերից է նաև «Հրաշք կինը» ֆիլմը: Ֆիլմի ռեժիսորն առաջին անգամ կին է:

Այս տարի տեղի ունեցավ «Վան Գոգի կրքերը»՝ իր տեսակի մեջ միակ անիմացիոն ֆիլմի պրեմիերան: Այն համաշխարհային կինեմատոգրաֆիայի պատմության մեջ առաջին լիամետրաժ անիմացիոն ֆիլմն է, որն ամբողջությամբ նկարահանվել է յուղաներկով կտավի վրա։ Գեղանկարիչ Վինսենթ վան Գոգի կյանքի մասին պատմող ֆիլմն ստեղծվել է 115 նկարչի ջանքերով, որոնք նկարչի տեխնիկայով նկարել են ֆիլմը կազմող 65 հազար կադրերից յուրաքանչյուրը։

2017-ին հոլիվուդի Փառքի ծառուղում իրենց աստղերը ստացավ 58 հայտնի անձ, որոնց թվում՝ Շառլ Ազնավուրը, Էմի Ադամսը, Քրիս Փրատը, Ջեֆ Բրիջեսը, Դուեյն Ջոնսոնը և այլք:

Իսկ կինոաշխարհի տարվա բուն ամփոփումը դեռ առջևում է: Առաջիկայում մեզ սպասվում է 20 հայտնի մրցանակաբաշխություն: