Մատուցող-ռոբոտը, Բրազիլիայի «օրինազանց» նախագահը, լողափ շտապող ամերիկացիները. կորոնավիրուսն աշխարհում

Աշխարհում կորոնավիրուսով վարակվածների թիվն արդեն գերազանցել է 5,5 միլիոնը, սակայն այս թվի աճին զուգընթաց, երկրները փորձում են մեղմացնել կարանտինային ռեժիմը:

Իսպանիա

Կորոնավիրուսից ամենաշատը տուժած եվրոպական երկրի՝ Իսպանիայի մի շարք հատվածներ անցել են մեղմացումների երկրորդ փուլին, այնինչ որոշ շրջաններում, օրինակ՝ Կատալոնիայում, Մադրիդում, Վալենսիայում, մեղմացումների առաջին փուլը դեռ նոր է սկսվում. բացվել են զբոսայգիները, բարերը, մարդիկ կարող են հանդիպել առավելագույնը 10 հոգանոց խմբերով:

The Guardian պարբերականի փոխանցմամբ՝ Իսպանիայի զբոսաշրջության նախարարը հայտարարել է, որ արտասահմանցիները կարող են Իսպանիայում իրենց արձակուրդն ամրագրել հուլիսից, քանի որ մինչ այդ երկիր մուտք գործողների համար պարտադիր 14-օրյա կարանտինը, ամենայն հավանականությամբ, կհանվի:

Ջոն Հոփկինսի համալսարանի տրամադրած վերջին տվյալների համաձայն՝ Իսպանիայում մինչև օրս արձանագրվել է կորոնավիրուսով վարակման 282.852 դեպք, որոնցից 28.752 մահացել է, 196.958-ը՝ բուժվել:

Հնդկաստան

Հնդկաստանում այսօր վերսկսվել են ներքին թռիչքները երկու ամսվա ընդմիջումից հետո: Միևնույն ժամանակ, Reuters լրատվական գործակալության փոխանցմամբ, երկրում արձանագրվել է կորոնավիրուսի գրեթե 7000 նոր դեպք, ինչը վիրուսի տարածումից ի վեր Հնդկաստանում 24 ժամում գրանցված ամենամեծ թիվն է:

Ջոն Հոփկինսի համալսարանի տրամադրած վերջին տվյալների համաձայն՝ Հնդկաստանում մինչև օրս արձանագրվել է կորոնավիրուսի 139.339 դեպք, որոնցից 4041-ը մահացել է, 58.174-ը՝ բուժվել:

Ամերիկայի Միացյալ Նահանգներ

ԱՄՆ-ն այսօր տոնում է Հիշատակի օրը, որին նախորդող շաբաթ և կիրակի օրերին, օգտվելով սահմանափակումների մեղմացումից, բազմաթիվ ամերիկացիներ այցելել են լողափեր և զբոսայգիներ, հաղորդում է CNN-ը: Ընդ որում, երկիրը շարունակում է գտնվել առաջին հորիզոնականում՝ կորոնավիրուսի դեպքերի թիվը գերազանցում է 1 մլն 600 հազարը, իսկ մահացածների թիվը մոտենում է 100 հազարի: Վարակաբանները նախազգուշացնում են, որ մարդկանց ազատ տեղաշարժի պատճառով վիրուսի նոր դեպքերի թիվը կավելանա:

Կորոնավիրուսի է՛լ ավելի տարածումը կանխելու նպատակով ԱՄՆ նախագահ Դոնալդ Թրամփն արգելել է բոլոր այն օտարերկրացիների մուտքը երկիր, ովքեր վերջին 14 օրվա ընթացքում եղել են Բրազիլիայում:

Բրազիլիա

Բրազիլիան կորոնավիրուսի դեպքերի քանակով արդեն հայտնվել է աշխարհում երկրորդ հորիզոնականում: Այնտեղ մինչև օրս արձանագրվել է 365.213 դեպք: Սա ամենևին չի խանգարել, որպեսզի Բրազիլիայի նախագահ Ժաիր Բոլսոնարուն անտեսի երկրում գործող սահմանափակումները և հերթական անգամ միանա կարանտինային ռեժիմի դեմ բողոքող ցուցարարներին: Reuters լրատվական գործակալության փոխանցմամբ՝ Բոլսոնարուն կոչ է արել վերջ դնել սահմանափակումներին և վերսկսել տնտեսական գործունեությունը:

Բողոքի ակցիաներ են տեղի ունեցել ոչ միայն մայրաքաղաք Բրազիլիայում, այլև Սան Պաուլոյում:

Իսկ մահմեդական աշխարհը տոնում է Ուրազա Բայրամը, որը նշվում է Ռամադան ամսվա ավարտի առթիվ:

Եգիպտոս

Տոնակատարությունների ֆոնին կորոնավիրուսի տարածումը կանխելու նպատակով Եգիպտոսի իշխանություններն ավելի են խստացրել տեղաշարժման սահմանափակումները: Երկրում արդեն իսկ փակ էին զբոսայգիները, ռեստորանները, զվարճանքի վայրերը և ոչ պարենային խանութները: Իշխանությունները, այդ սահմանափակումներից զատ, 5 օրով պարետային ժամ են սահմանել՝ երեկոյան ժամը 17։00-ից մինչև առավոտյան ժամը 06։00-ն, հաղորդում է Ruptly լրատվական գործակալությունը:

Սիրիա

Սիրիայի իշխանությունները նույնպես արգելել են զանգվածային աղոթքները, մարդկանց կոչ են արել տոնը նշել տանը: Դամասկոսում մզկիթները գրեթե դատարկ են եղել՝ չնայած այս օրերին դրանք սովորաբար բազմամարդ են լինում:

Նույնը չի կարելի ասել Սիրիայի Իդլիբ նահանգի մասին, որտեղ բնակիչները նշել են Ուրազա Բայրամը՝ առանց դիմակների՝ չպահպանելով սոցիալական հեռավորության կանոնները:

Նիգերիա

Նույն իրավիճակն է դիտվել նաև Նիգերիայում, որտեղ կողք-կողքի աղոթել են հարյուրավոր հավատացյալներ: Ruptly լրատվական գործակալության փոխանցմամբ՝ Նիգերիայի մեծ մասում դեռ գործում է հավաքների արգելքը, սակայն իշխանությունները մեղմացրել էին այս սահմանափակումը երկրի հյուսիսային շրջանների համար, որտեղ բնակիչների գերակշռող մասը մուսուլման է:

Իհարկե, կրոնական հավաքները թույլատրվել էին միայն սոցիալական հեռավորությունը պահպանելու և դիմակ կրելու պայմանով, որին, սակայն, քչերն են հետևել:

Իրան

Իրանում նույնպես երեք ամսվա արգելքից հետո մարդկանց թույլատրել են միասին աղոթել: Թեհրանի հրապարակներից մեկում Ռամադանի ավարտի տոնակատարությունը միասին նշել են հազարավոր հավատացյալներ:

Ռուսական պատվաստանյութ

Ինչ վերաբերում է կորոնավիրուսի դեմ պատվաստանյութի ստեղծմանը, այժմ էլ ռուսաստանցի բժիշկներն են հայտարարել հաջող փորձարկումների մասին: Ինչպես հաղորդում է TASS լրատվական գործակալությունը, Ն.Ֆ. Գամալեյայի անվան համաճարակաբանության և միկրոկենսաբանության գիտահետազոտական ազգային կենտրոնի աշխատակիցներն իրենց վրա կամավոր կերպով փորձարկել են իրենց իսկ մշակած պատվաստանյութը:

Կենտրոնի տնօրեն Ալեքսանդր Գինցբուրգը հայտնել է, որ բոլոր պատվաստված աշխատակիցների մոտ հայտնաբերվել են հակամարմիններ: Նա հույս է հայտնել, որ Ռուսաստանում նոր կորոնավիրուսի դեմ զանգվածային պատվաստումները կարող են սկսվել արդեն 2020թ. աշնանը:

Հարավային Կորեա

Իսկ մինչև պատվաստանյութի ստեղծումը մարդկանց միջև շփումը նվազեցնելու համար Հարավային Կորեայի այս սրճարանում հաճախորդներին սպասարկում են ռոբոտները: Reuters լրատվական գործակալությունը հաղորդում է, որ սուրճ պատրաստող ռոբոտը կարող է եփել 60 տեսակի սուրճ, իսկ մատուցող-ռոբոտը պատվերը տանում է սեղանների մոտ: