Գյումրիում կանաչապատման աշխատանքները կարժենան 6 մլն դրամ

2020 թվականին 10 մլն ծառ տնկելու կառավարության ծրագիրն իրագործելու համար առանձնացվել է 6000 հա տարածք: Դրանք անտառային շերտերն ավելացնելու նպատակով են և նախատեսված չեն բնակավայրերի տարածքների համար։ Քաղաքները կանաչապատման ծրագրեր սկսել են համայնքային բյուջեների ֆինանսավորմամբ: Գյումրիում այս տարի նախատեսված է տնկել 2000 ծառ, 5000 վարդի թուփ և 80 հազար այլ տեսակի ծաղիկներ: Կանաչապատման ծավալներն ավելացել են, ու սա պայմանավորված է անցած տարվա փողոցաշինական մեծ ծրագրի առաջին փուլի ավարտով: Հիմնանորոգման նախագծերով փողոցներին հարող հատվածներում կանաչապատման տարածքներ են առանձնացված, որտեղ էլ կատարվում է ծառատունկը:

Գյումրիի փողոցաշինական մեծ ծրագրի առաջին փուլն անցած տարի ավարտվեց, բայց այս տարի նույն փողոցներում անելիքներ կային: Շինարարները շտկում էին թերությունները: Իսկ հիմա փողոցաշինության առաջին փուլի «վերջին շտրիխն» է: Շինարարները հեռացել են, գործը փոխանցել կանաչապատողներին: Հիմնանորոգված փողոցների երկայնքով կանաչապատման տարածքներ են առանձնացված, որտեղ հիմա ծառ ու թուփ են տնկում քաղաքապետարանի կոմունալ ծառայության աշխատակիցները:

Տիգրան Մեծ փողոցում վարդի թփեր ու այլ տեսակի ծաղիկներ են տնկվում: Բնակիչների հետ կոմունալ ծառայությունը համաձայնության է եկել, որ կիսելու են խնամելու և ջրելու պարտականությունը: Ոռոգումը խնդիր է ամբողջ քաղաքի կանաչապատ տարածքների համար: Շատ քիչ հատվածներում կա ոռոգման ցանց:

«Երկրաշարժից առաջ է գործել ոռոգման համակարգը: Հիմա ամբողջությամբ շարքից դուրս է եկել: Այնպես չէ, որ կա ցանց ու խցանված է: Փողոցները քանդվել են, դուրս է եկել: Ոռոգման ցանց չկա: Հիմնանորոգված փողոցներում, որտեղ հնարավոր է՝ գազոններ կցանենք: Ջուր շատ է պահանջվում: Այդ խնդիրը կա: Փորձում ենք ոռոգումը կազմակերպել ջրցաններով: Մոտավորապես 2000 ծառ ենք տնկել, 5000  վարդ: Ծաղիկներ էլ 80 հազար հատ տնկելու ենք: Դեռ նոր ենք սկսել: Նաև գնդաձև ակացիաներ ենք տնկել»,-SHANTNEWS-ին ասել է Գյումրիի քաղաքապետարանի կոմունալ ծառայության տնօրենի ժամանակավոր պաշտոնակատար Վարդգես Սամսոնյանը:

Ոռոգման ցանցի բացակայությունը լրացնում են ջրցանները: Տնկիների համար առաջին մի քանի օրերին առատ ոռոգումը կարևոր է: Գնդաձև ակացիաներ ու շագանակենի…սրանք այն ծառատեսակներն են, որոնք փորձված են ու աճում են Գյումրիում: Բայց մասնագետներն առաջին անգամ փորձարկում են նաև այլ տեսակներ։ Օրինակը բուլդանեժ կոչվող ծառն է: Գեղեցիկ սպիտակ ծաղիկներով բույսը զարդարելու է Գյումրիի ամենաբանուկ փողոցները: Տարբեր թաղամասերում տնկվելու են նաև պտղատու ծառեր:

Մոտ 2000 ծառ, վարդի 5000 թուփ և 80 հազար այլ ծաղիկներ…Սա Գյումրիում այս տարվա կանաչապատման աշխատանքների ծավալն է, որի համար համայնքային բյուջեից 6 մլն դրամ է հատկացվել: Այդուհանդերձ, Գյումրիում կանաչ տարածքներն էլի քիչ են:

Կանաչ տարածքները մոտ հինգ անգամ քիչ են, օդում փոշու պարունակությունն է մեծ: Փողոցաշինության առաջին փուլից հետո այս ցուցանիշը փոքր-ինչ նվազել է: Գոյություն ունեն նորմեր, համաձայն որոնց՝ կանաչապատ տարածքները բավարար են, եթե մեկ բնակչին բաժին ընկնող կանաչ տարածքը կազմում է 15-20 քառակուսի մետր, իսկ Գյումրիում այդ թիվը հազիվ 4-5 քառակուսի մետր է: