Գյումրիում հանրային տրանսպորտը աշխատանքը սկսել է ոչ ամբողջական շարժակազմով

Պարետատան որոշմամբ՝ այսօրվանից վերսկսվել է հանրային տրանսպորտի աշխատանքը: Միկրոավտոբուսներն ու ավտոբուսներն աշխատում են անվտանգության որոշակի կանոններ պահպանելու պահանջով: Սա վերաբերում է և՛ վարորդներին, և՛ ուղևորներին: Վարորդները դիմակներով ու ձեռնոցներով են, ինչը պահանջվում է նաև ուղևորներից: Վարորդները նաև վերահսկելու են, որ տրանսպորտային միջոց առանց պաշտպանիչ միջոցների ուղևորներ չբարձրանան: Ավտոբուսներն ու միկրոավտոբուսները օրական երկու անգամ ախտահանվելու են: Կանգառներում հանրային տրանսպորտի աշխատանքը վերահսկում են ոստիկանական կարգախմբերը:

Գյումրիի կենտրոնական փողոցների կանգառներում ավտոբուսների ու միկրոավտոբուսների ծանրաբեռնվածությունը, վարորդների ու ուղևորների կողմից պաշտպանիչ միջոցների պարտադիր կիրառությունը ստուգում են ոստիկանական կարգախմբերը: Տրանսպորտային միջոցներում կանգնած ուղևորներ չպետք է լինեն ու բոլորը՝ վարորդ և ուղևոր պետք է կրեն դիմակներ ու ձեռնոցներ:

Հանրային տրանսպորտի վերագործարկման մասին պարետի որոշումից հետո Գյումրիի ավտոբուսային ու միկրոավտոբուսային երթուղիները սպասարկող ընկերությունները տրանսպորտային միջոցներում ապահովել են արտակարգ դրության պայմաններում աշխատելու պարագաները:

«Բոլոր երթուղիներում աշխատող ավտոբուսներում ու միկրոավտոբուսներում տեղադրված են ախտահանիչ միջոցներ, վարորդները կրում են դիմակներ ու ձեռնոցներ: Բայց նաև ահազանգեր ունենք, որ ուղևորները չեն կրում դիմակ: Վարորդներին ասել ենք, որ չվերցնեն նման ուղևորների: Պետք է նրանց հետ ոչ թե վիճել, այլ պետք է բացատրեն, որ դիմակն ու ձեռնոցները պարտադիր են: Առանց դրանց չի կարելի տրանսպորտ նստել: Շարժակազմը լրիվությամբ դուրս չի եկել այսօրվանից աշխատանքի, քանի որ մոտ մեկուկես ամիս չի աշխատել տրանսպորտը, և առաջիկա երկու-երեք օրվա ուղևորահոսքից պարզ կլինի, թե որ երթուղում քանի մեքենա է պետք, որպեսզի կարողանանք ռացիոնալ օգտագործել մեքենաների քանակը»,- SHANTNEWS.am-ի հետ զրույցում ասել է Գյումրիի քաղաքապետարանի տրանսպորտի բաժնի պետ Արտյոմ Սարգսյանը:

Դիմակներ ու ձեռնոցներ վարորդը պարտավոր է կրել, միևնույն ժամանակ վերահսկել, որ միկրոավտոբուս ու ավտոբուս բարձրացող ուղևորը ևս պաշտպանիչ միջոցներով լինի: Վարորդներն են նշում՝ վերահսկելը հեշտ չէ, հնարավոր է՝ չնկատեն նման ուղևորի բարձրանալը: Դիմակ չունենալու որևէ պատճառաբանություն չի արդարացնում կարգի խախտումը: Ինքնաշեն դիմակն էլ այս դեպքում թույլատրելի է:

Հանրային տրանսպորտում թղթադրամների ու մետաղադրամների հետ շփումը ևս հնարավորինս նվազագույնի է հասցվում: Ուղևորը գումարը ոչ թե վարորդին է տալիս, այլ դնում է հատուկ արկղի մեջ: Իսկ դրա համար անհրաժեշտ է, որ ուղևորը տրանսպորտ նստի 100 դրամանոցը ձեռքին:

Առայժմ Գյումրիի հանրային տրանսպորտն աշխատում է ոչ ամբողջական շարժակազմով: Վերագործարկումից հետո Գյումրիի հանրային տրանսպորտի երթուղիներում նաև փոփոխություններ են եղել: 14 համարի միկրոավտոբուսային երթուղին էլ չի աշխատում, փոխարենը նոր ուղղություն է շահագործվում:

Երթուղիների ու շարժակազմի քանակը կախված է ուղևորահոսքից: Տրանսպորտի վերագործարկման առաջին օրը Գյումրիում ուղևորները շատ չէին: Մարդիկ դեռ պահպանում են մեկուսացման ռեժիմը ու տնից դուրս են գալիս անհրաժեշտության դեպքում: