Ընդդիմադիր 2 գործչի համաներում շնորհելը պառակտել է վրացական հասարակությունը

Վրաստանի նախագահ Սալոմե Զուրաբիշվիլիի կողմից ընդդիմադիր դաշտի 2 կարևոր խաղացողներին համաներմամբ բանտից ազատելը, որը տեղի ունեցավ նախագահի հրամանագրի հրապարակումից ժամեր անց, միանշանակ չի ընդունվել ո՛չ իշխող քաղաքական դաշտում և ո՛չ էլ հանրության կողմից:

Ընդդիմությունը ցնծությամբ է ողջունել իր 2 կարկառուն ներկայացուցիչների (Սաակաշվիլիի իշխանության տարիների պաշտոնավարած պաշտպանության նախարարի և Թբիլիսիի քաղաքապետի)  ազատ արձակումն ու վերադարձը քաղաքական դաշտ, սակայն հաղթանակը  չի համարել լիարժեք և նոր պայմաններ է թելադրել:

«Մենք կշարունակենք աշխատել ՝ ապահովելու, որ մարտի 8-ի համաձայնագիրն ամբողջությամբ կատարվի: Մնում է Գիորգի Ռուրուայի բանտից ազատման հարցը: … Միայն այդ հարցի լուծումը կբացի քաղաքական գործընթացների դուռը: Ի թիվս այլ բաների՝ դա թույլ կտա ընդդիմությանը մասնակցել նիստին և քվեարկել սահմանադրական փոփոխությունների օգտին»,-ասել է «Եվրոպաական Վրաստան» ընդդիմադիր կուսակցության  անդամ, ԱԳ նախկին նախարար, ապա նաև խրհրդարանի խոսնակ Դավիթ Բաքրաձեն։

«Այս երկու հանցագործներին համաներում շնորհելով՝ Սալոմե Զուրաբիշվիլին, հավանաբար, առաջնորդվել է ազնվական նպատակով: Միգուցե նա իսկապես հավատում է, որ խորհրդարանի շենք ներխուժել ցանկացող բյուջետային գողի և Ռուսաստանի հատուկ ծառայությունների գործակալի ազատ արձակումն այս փուլում կնպաստի քաղաքական և ընտրական միջավայրի ապաբևեռացմանը»,-իր հերթին ասել է «Վրացական երազանքի» գործադիր քարտուղար Իրակլի Կոբախիձե:

Թբիլիսիի քաղաքապետ Կախա Կալաձեն իր խոսքում նշել է.« Ընդդիմությունը ստում է ՝ ասելով, որ համաձայնագրի մի մասը եղել է կոնկրետ հանցագործների ազատ արձակումը: Դա իրականությանը չի համապատասխանում… քանի որ ո՛չ կառավարությունը, ո՛չ էլ խորհրդարանը չեն կարող ունենալ հնարավորություն կամ լծակ՝ ազատելու այդ կոնկրետ մարդկանց: Միակ մարդը, ով ունի այդպիսի հնարավորություն և մանդատ, նախագահն է»։ Այս մասին փոխանցում է interpressnews.ge-ն։

Խնդրի շուրջ համատեղ հայտարարություն  են տարածել նաև քաղաքական ուժերի երկխոսությանը մասնակից Վրաստանում հավատարմագրված դիվանագետները։

«Մենք հստակ կոչ ենք անում բոլոր կողմերին ամբողջությամբ իրագործել համաձայնագիրը ՝ դրա բովանդակությանը և ոգուն համապատասխան, և իրենց դերակատարումն ունենալ աշնանն ազատ և արդար ընտրությունների համար սահմանադրական փոփոխությունների և ընտրական բարեփոխումների հաջող ընդունման գործում»,- ասված է հատարարության մեջ:

Մարտի 8-ին իշխանություններն ու ընդդիմությունը համաձայնագիր ստորագրեցին սահմանադրական փոփոխությունների վերաբերյալ: Պայմանագիրը նախատեսում էր ազատ արձակել քաղբանտարկյալներին, բայց իշխանությունները հետագայում հայտարարեցին, որ երկրում քաղբանտարկյալներ չկան, և իրենք չեն պատրաստվում որևէ մեկին ազատ արձակել: Այս կապակցությամբ ԱՄՆ սենատորներն ու խորհրդարանականները հանդես եկան հայտարարություններով ՝ կոչ անելով վրացական իշխանություններին անհապաղ իրականացնել համաձայնագրերը և ազատ արձակել քաղբանտարկյալներին: Ներման միակ որոշումը կայացնողը նախագահն է: