Գյումրի-Բավրա միջպետական նշանակության ավտոճանապարհին ընթացիկ նորոգման աշխատանքներ են տարվում

Ձյան հալվելուց հետո ճանապարհի մեծ ու փոքր բազմաթիվ փոսերը նորից բացվել են ու ավելի խորացել: Խոսքը Գյումրի-Բավրա միջպետական նշանակության մայրուղու մասին է, որի քայքայմանը նպաստում է նաև ծանր բեռնատարների երթևեկությունը: Գյումրի-Բավրա միջպետական  մայրուղու 30,7 կմ երկարության հատվածում ճանապարհի պահպանման աշխատանքներ են սկսվել:

«Աշոցքի ճանշին» ընկերության տնօրեն Մարսել Կարապետյանը SHANTNEWS.am-ի թղթակցի հետ զրույցում ասել է, որ այն, ինչ ընկերությունն անում է, ոչ թե հիմնային, այլ փոսային նորոգումներ են:

«Գարնանն ավելի շատ են աշխատանքները, գիտեք, որ միջպետական նշանակության ճանապարհ է, չսպասարկել հնարավոր չէ, ավելի շատ կքայքայվի, եթե ոչինչ չանենք: Այն, ինչ անում ենք, մեր ամեն տարվա ընթացիկ աշխատանքներն են, փորձում ենք ճանապարհը գոնե երթևեկելի պահել, որ վարորդներից դժգոհություններ չլինեն: Գյումրի-Բավրա ավտոճանապարհի մի հատվածը հիմնանորոգված է, սա մեզ համար մեծ նշանակություն ունի, ավելի հեշտ է սպասարկելը: Սպասարկման աշխատանքները շարունակական են լինելու, շուտով ամառ է, ու չի բացառվում, որ երթևեկությունն ինտենսիվ դառնա»,- մեր թղթակցի հետ զրուցում ասել է «Աշոցքի ճանշին» ընկերության տնօրենը:

Աշոցքի և Ամասիայի սպասարկող ճանապարհաշինություն իրականացնող ընկերությունը 30 տարի է՝ նույնն է, ընկերության աշխատակիցները  լավ գիտեն, թե միջպետական ճանապարհի որ հատվածն է ավելի շուտ շարքից դուրս գալիս, ու թե որ հատվածում ինչ տիպի նորոգումները կարող են ժամանակավոր լուծում հանդիսանալ: Անցած տարի, օրինակ, Գյումրի-Բավրա միջպետական մայրուղու Թորս-Աշոցք տարածքի ութուկես կմ երկարության հատվածն ամբողջության վերանորոգվեց, քանի որ այն այլևս ոչ միայն երթևեկելի չէր, այլև սպասարկել հնարավոր չէր:

«Աշոցքի ճանշին» ընկերության տնօրենը նշեց, որ այս տարի ևս միջպետական ճանապարհի հիմնանորոգման աշխատանքներ են նախատեսված:

«Չեմ կարող ասել, թե կոնկրետ երբ կմեկնարկեն աշխատանքները, բայց նախատեսվում է 5 կմ երկարության հատված ևս հիմնանորոգել պետական ծրագրով, ունենք հատվածներ, որտեղ փոսալցումները ամեն տարի արվում են գարուն-ամառ-աշուն տևողությամբ, միշտ սպասարկվում է, բայց եթե հիմնանորոգվի, ավելի լավ կլինի»,- ասել է Մարսել Կարապետյանը:

Շիրակի մարզպետարանի տրանսպորտի և ճանապարհաշինության բաժնի պետ Խաչատուր Խնձրցյանի խոսքերով՝ Շիրակի մարզի ճանապարհները սպասարկում է չորս ընկերություն, որոնց տարեկան սպասարկման համար 800 մլն դրամ է հատկացվում։ Ընկերությունները կառավարության հետ հինգ տարի ժամկետով պայմանագրեր ունեն կնքած։ Այժմ 4 ընկերություններն էլ սկսել են իրենց պայմանագրով նախատեսված պարտականությունները՝ ճանապարհների ամառային սպասարկումները:

«Ոչ միայն Գյումրի-Բավրա միջպետական նշանակության ճանապարհին են փոսային նորոգման աշխատանքներ, այլ նաև մարզի հանրապետական նշանակության հատվածներում: Փոսալցումներից բացի, նաև ճամփեզրերը մաքրում են կուտակված աղբից, կողային առուներն են մաքրում, ճանապարհային երթևեկության նշաններն են անհրաժեշտության դեպքում փոխում կամ թարմացնում, այսինքն՝ ընթացիկ աշխատանքներ են, որոնք պարտադիր պետք է կատարվեն»,- SHANTNEWS.am-ի հետ զրույցում ասել է Խաչատուր Խնձրցյանը:

Խաչատուր Խնձրցյանի խոսքերով՝ այս տարի  Գյումրի-Բավրա միջպետական ճանապարհի որոշ հատվածի հիմնանորոգումից բացի, կհիմնանորոգվի Արմավիր-Իսահակյան-Գյումրին, կբարեկարգվեն նաև Գուսանագյուղի և Քեթի-Գյումրի ճանապարհները:

Ճանապարհաշինական ծրագրերում նախատեսված են նաև միջհամայնքային ու ներհամայնքային ճանապարհները, որոնց հիմնանորոգումը հիմնականում սուբվենցիոն հայտերով է։