ՊԵԿ-ն օնլայն հանրային քննարկում է անցկացրել Գյումրիում

Պետական եկամուտների կոմիտեն նախատեսում է Գյումրիում շուրջ 21 հեկտարի վրա կառուցել արտաքին տնտեսական գործունեության միասնական կենտրոն: Առաջին փուլով կառուցապատվելու է 5.8 հեկտարը, որտեղ լինելու է վարչական շենքը, ավտոկայանատեղիներ և տնտեսական մասնաշենք: Արտաքին տնտեսական գործունեության կենտրոնի համար հատկացում կատարվել է Գյումրիի Խրիմյան Հայրիկ փողոցում, նախկին տանկային զորամասի տարածքում: Այստեղ անցած տարվանից կատարվում է մեքենաների մաքսազերծումը: Նոր շինարարությունն ինչպիսի ազդեցություն կունենա արտաքին միջավայրի վրա․ այս մասին առցանց ռեժիմով հանրային քննարկում են անցկացրել շրջակա միջավայրի նախարարության և Պետական եկամուտների կոմիտեի ներկայացուցիչները:

Շրջակա միջավայրի նախարարության, ՊԵԿ-ի և կառուցապատող ընկերության մեկական ներկայացուցիչ և  քաղաքապետարանի աշխատակազմի քարտուղար․ այն անձանց շրջանակն էր, որոնք ներկա էին հանրային քննարկմանը: Իսկ թեման Գյումրիի արտաքին տնտեսական գործունեության միասնական կենտրոնի շինարարությունն էր: Սա երկարաժամկետ ծրագիր է, որի մեկնարկը ՊԵԿ-ն անցած տարի է տվել: Կառուցվեցին այն շինությունները, որոնք անհրաժեշտ էին ավտոմաքսազերծման գործընթաց կատարելու համար: Այս տարի շինարարությունը շարունակվելու է: Մասնագետները հստակ նշեցին, թե ինչքան տարածք է կառուցապատվելու և ինչ է կառուցվելու:

«Առաջին  փուլում կառուցապատվելու է 21,5 հեկտարից 5,8 -ը: Պետք է ունենանք 3800 քառակուսի տարածքով վարչական մասնաշենք, որտեղ տեղակայվելու են մաքսային հսկողության պետական մարմինները՝, մաքսային ծառայություն, հսկողության հետ առնչվող այլ մարմիններ՝ ապահովագրական ընկերություններ, բանկեր, ոստիկանություն և այլն: Ծրագրի մեջ ներառել ենք կենտրոնին հարակից Խրիմյան Հայրիկ փողոցի վերանորոգման աշխատանքները, որն արդեն նախաձեռնում ենք սկսել: Առաջին մասի շինարարական աշխատանքները նախատեսված է ավարտել 2020-ի հուլիսին, իսկ երկրորդ մասի՝ հիմնական շինարարությունը, նախատեսում ենք իրականացնել 3 տարվա ընթացքում»,- ասել է ՊԵԿ շինարարական ծրագրերի համակարգման բաժնի պետ Նորիկ Մնոյանը:

Շինարարության ժամկետներին, տարածքի ընտրությանը, արտաքին միջավայրի վրա ազդեցությանը վերաբերող հարցերն առցանց ռեժիմով SHANTNEWS-ն էր հասցեագրել բանախոսներին: Այլ հարցեր, այլ շահագրգիռ կառույցներից չկային: ՊԵԿ ներկայացուցիչը նախ նշեց, որ այս տարի ծրագրի առաջին փուլն է մեկնարկելու: Ժամկետները հստակ են:

Արտաքին տնտեսական գործունեության սպասարկման միասնական կենտրոնը մեկ վայրից, մեկ պատուհանի սկզբունքով է դարձնելու հյուսիսային մաքսատնից ներմուծվող ու արտահանվող ապրանքների մաքսազերծումը: Կենտրոնի կառուցման համար մինչ այս ծախսվել է 3 մլրդ դրամ, ևս 1,4 մլրդ դրամ էլ այս տարվա աշխատանքների արժեքն է կազմելու: Կառուցվելու է ոչ միայն կենտրոնը, այլև ենթակառուցվածքները:

Մինչ շինաշխատանքների մեկնարկը նախագիծը փորձաքննություն է անցնելու: Մասնավորապես` մասնագետները պարզելու են, թե շրջակա միջավայրի վրա ինչպիսի ազդեցություն կունենա շինարարությունը: Միանգամից էլ նշում են՝ տարածքը, որը հատկացվել է, կանաչ գոտի չէ:

«Ըստ հայտի՝ նախկին տանկային գնդի տարածք է, որի մակերեսը 21,57 հեկտար է: Համաձայն հայտի՝ կանաչապատ տարածքներ չկան, հողի բուսաշերտը բացակայում է, կենսաբազմազանությունը ևս: Շինարարական աշխատանքների ազդեցությունը շրջակա միջավայրի վրա լինելու են օդային ավազան փոշու արտանետումների ձևով, աղմուկի մակարդակը հնարավոր է բարձրանա, հնարավոր է նաև ճանապարհների ծանրաբեռնվածություն»,- ասել է շրջակա միջավայրի նախարարության շրջակա միջավայրի վրա ազդեցության փորձագիտական կենտրոնի գլխավոր մասնագետ Թամարա Միրիջանյանը:

Շինարարության ընթացքում տարածքից հանվելու է 20 հազար խորանարդ մետր հող, որը հետո հետլիցք է կատարվելու: Բնապահպանական մյուս ազդեցությունները նույնն են, ինչ բոլոր խոշոր շինարարությունների դեպքում է: 30 օրվա ընթացքում փորձագետները շրջակա միջավայրի ազդեցության մասին փորձաքննության եզրակացություն են ներկայացնելու: Այս ընթացքում պատրաստ են լսել բնապահպանների գրավոր առաջարկները, եթե այդպիսիք լինեն: