Շիրակի մարզում ոռոգման ջրի նվազագույն կարիքները բավարարված կլինեն. Տիգրան Պետրոսյան

Շիրակի մարզի ջրամբարների սակավ ջուրը պետք է ճիշտ կառավարել ոռոգման սեզոնին խնդիրներ չունենալու համար: Քննարկման արդյունքում նման եզրակացության են եկել ջրօգտագործող ընկերությունը, մարզպետարանը և Ջրային պետական կոմիտեն:

Օրեր առաջ մարզի ֆերմերները, ջրամբարների լցվածության մակարդակով մտահոգ, դիմել էին մարզպետարան ու պարզաբանումներ պահանջել, թե ինչպես է նախատեսվում ապահովել ոռոգման ջրի պահանջարկը: Ֆերմերների բողոքին հաջորդել է քննարկումը Ջրային պետական կոմիտեում, որտեղ էլ դիտարկվել են Արփի լճում, պատվարի վերանորոգումներին զուգահեռ, որոշակի լցվածություն ապահովելու հնարավորությունները:

Կառնուտի գյուղամեջն է: Քանի դեռ գյուղատնտեսական աշխատանքների մեկնարկը տրված չէ, գյուղացիները օրվա մեծ մասն անգործ են ու ժամանակը հատկացնում են քննարկումներին, իսկ քննարկման թեման ու առարկան բացառապես ոռոգման ջուրն է: Կառնուտի ջրամբարն աչքի առաջ է` ամեն օր դիտարկում են, աչքաչափով փորձում հասկանալ, թե արդյոք ավելացել է ջրամբարի լցվածությունը: Դրանից է կախված գյուղատնտեսական տարվա պլանավորումը:

Կառնուտի համար դոտացիոն է Արփիի ջրամբարը, բայց այս տարի Արփիում էլ կուտակված ծավալները շատ չեն: Պատվարի վերանորոգման պատճառով Արփիից աշնանը ջրթող կատարվեց: Ինչպե՞ս պատվարը վերանորոգել ու միևնույն ժամանակ ջուր կուտակել: Հարցը Շիրակի մարզպետը քննարկել է Ջրային պետական կոմիտեում: Եզրակացությունն էլ այսպիսին է, որ երկուսը միաժամանակ հնարավոր է:

«Արփիի ջրամբարը լցվում է: Այս պահին ոչինչ չի խանգարում աշխատանքները մեկնարկելուն և զուգահեռ լցվելուն: Մենակ բնապահպանական թողք ունենք, ջրամբարից ջուր դուրս չի գալիս, բացի բնապահպանական թողքից: Հիմա կուտակման ռեժիմ է: Բավական լավ ակնկալիքներ ունենք թե´ ձնհալից, թե´ տեղումներից:

Ակնկալում ենք, որ մոտ 10 օրից կսկսվի պատնեշի վերականգնումը: Ջրամբարը սկսել է լցվել, օրական տարբերությունները սկսել են նշմարվել, ձնհալը սկսվել է: Կառնուտի ջրամբարում վստահ ենք, որ առնվազն 10-15 մլն խորանարդ մետր կունենանք  այդ աշխատանքների արդյունքում` պլյուս կուտակումները: Այս պահին ֆիքսում ենք, որ մինիմում կարիքները բավարարված կլինեն»,- SHANTNEWS.am-ի հետ զրույցում ասել է Շիրակի մարզպետ Տիգրան Պետրոսյանը:

Շիրակի մարզպետի խոսքով` հենց եղանակները թույլ տան, պատվարի նորոգման աշխատանքները կսկսեն: Մասնագետների եզրակացությունն ունեն, որ վերանորոգումից հետո Արփիում 5 մլն խորանարդ մետր ջուր ավելի կկարողանան կուտակել: Սա կորուստների չափն էր, որը մինչ այս կար Արփիում:

Իսկ Կառնուտի ջրամբարում մուտքեր ամեն տարի ապրիլից ապահովում են Շիրջրանցքով՝ Ախուրյան գետից: Այս տարի այս գործընթացը շուտ են սկսելու: Տեղումները Աշոցքում ու Ամասիայում ձմռան ընթացքում քիչ չեն եղել: Ըստ այդմ էլ ակնկալում են, որ ոռոգման ջրի որոշակի պաշար ձնհալն է ապահովելու: Համոզմունքն ապացուցում են Արփի լճի լցվածության ամենօրյա չափումներով:

Գարնան անձրևները կարող են էականորեն փոխել ջրամբարների լցվածության մակարդակը: Կառնուտ գյուղի ջրբաժանն է ասում` եղել են տարիներ, երբ ձնհալի ջրի սակավությունը անձրևներն են լրացրել: Այդուհանդերձ, ջրօգտագործող ընկերությունը գյուղացիների հետ դեռ պայմանագրեր չի կնքում:

Ջրային պետական կոմիտեում քննարկման արդյունքում հաշվարկներ են կատարել, համաձայն որի` անգամ գարնանային սակավ տեղումների դեպքում Շիրակի մարզի ոռոգման նվազագույն պահանջարկը կկարողանան ապահովել:

Ջրօգտագործող ընկերությունը պարտավորվել է մինչև մարտի 20-ը ջրանցքները մաքրել ու պատրաստ պահել ոռոգման սեզոնին: