Նորոգված փողոցներում աղբահանության ծավալներն ավելացել են, իսկ ծախսածածկումը բնակչի համար վարձի թանկացման հաշվին է

Մեկ ամիս առաջ կառավարության հետ համատեղ սուբվենցիոն ծրագրով Գյումրիի քաղաքապետարանի ձեռք բերած 15 միավոր տեխնիկայով կոմունալ ծառայության ավտոպարկը թարմացվեց: Աղբատար, կոմբինացված ջրցան ու ձյուն մաքրող մեքենաներով քաղաքն ավելի մաքուր են պահելու, գործն էլ ավելի արագ են կազմակերպելու:

Նորոգված փողոցների հաշվին է աշխատանքը կրկնապատկվել, կոմունալ ծառայության ծախսերն էլ հետն են փոփոխություններ կրել։ Ֆինանսական հաշվարկների արդյունքն էլ եղավ այն, որ 100 դրամի փոխարեն բնակիչը աղբահանության դիմաց վճարում է 150 դրամ։

Ֆինանսական բաժնի վերլուծական տվյալների համաձայն՝ 2019 թվականին աղբահանության դիմաց կատարված վճարումներով բյուջե է մուտքագրվել 219 մլն դրամ, բայց ծախսերն ավելին են եղել՝ 379 մլն: Այս տարի նոր դրույքաչափով գանձումների արդյունքում կանխատեսում են, որ ծախս-եկամուտ տարբերությունը որոշակի փոփոխություն կկրի, բայց  դարձյալ ծախսատարությունը մեծ է լինելու, նոր աղբահան մեքենաների շահագործումն արդեն մեծ ծախսեր է պահանջում։

Աղբահանության դիմաց վարձերի  հավաքագրումը 90 տոկոսի շեմին չի հասնում, վատ ցուցանիշ չէ, բայց կոմունալ բաժինը սա թերի է գնահատում։

Տարիներով մնացած պարտքերն են դժվար հավաքում։ Գյումրիում փաստացի բնակվողների թիվը 72.300 է, նրանց մոտ 20 տոկոսը չվճարողներն են, նույնքան՝  քաղաքից բացակայողները։ Մոտ 300 աղբահավաք կետ կա ՝  850 աղբարկղով, կոմունալ ծառայությունը հատուկ ծրագրի միջոցով հետևում է աղբահավաք մեքենաների աշխատանքին։ Սա վերահսկողություն է ոչ միայն աղբատար մեքենաների երթուղու տեղաշարժին։

Տեսանկարահանող սարքեր ևս կան տեղադրված աղբամանների տարածքում, ֆիքսում են աղբամաններին մոտեցող յուրաքանչյուրի գործողությունը՝ արդյոք կենցաղային աղբը հենց աղբամանո՞ւմ էլ լցնում են, թե՞ ոչ:

Լինում են նաև այնպիսի դեպքեր, երբ անցորդները գուցե ոչ միտումնավոր, բայց  հենց այսպես են վարվում․ նետում են աղբը հեռավորությունից ու հետ չեն էլ նայում՝ աղբը աղբամանում հայտնվե՞ց, թե՞ ոչ: Տեսախցիկներով շատ են հայտնաբերել նաև դեպքեր, երբ բնակիչները շինաղբն են լցնում աղբարկղերում կամ թափում դրանց կողքին։

Դրանք անպատիժ չեն մնում: Ֆիքսած խախտումները դուրս են բերվում և վարչական վարույթներ կազմվում, բացահայտում անձի ինքնությունը ու  գործը հասնում է տուգանքին: Վարչական վարույթները  սկսվում և ավարտվում եմ միայն  քաղաքապետարանի համապատասխան հանձնաժողովում:

Տեսանկարահանող 3 սարք էլ քաղաքային աղբանոց տանող ճանապարհին է տեղադրված, տեսել ու ֆիքսել, թե քաղաքացիներն ինչպես են  մեքենաներով շինարարական աղբը բերում և լցնում ճանապարհին՝ չհասնելով աղբադաշտ։

Կոմունալ ծառայությունը նաև բնակիչների համար պաստառներ է փակցրել՝ զգուշացնելով, որ տեսանկարահանող սարքեր են տեղադրված, և որոշ տեղերում պատկերը փոխվել է։