Շիրակի մարզում քննարկվում են գյուղատնտեսական ապահովագրության պայմանները

Կառավարությունը 6 մարզերում ներդնում է գյուղատնտեսության պարտադիր, իսկ մյուս մարզերում` կամավոր ապահովագրություն: Շիրակի մարզը կամավորի ցանկում է: Պետության 50 տոկոս սուբսիդավորմամբ առաջարկվում է գյուղացիներին ապահովագրել հացահատիկի ցանքերն ու խնձորի այգիները: Հանրապետության գյուղական համայնքները բաժանված են ըստ գոտիականության, համաձայն որի`հաշվարկվում է մեկ հեկտարի վրա կատարվող ծախսը և ապահովագրավճարը: Կամավոր ապահովագրության մանրամասները ապահովագրական ընկերության ներկայացուցիչները քննարկել են Նոր Կյանք գյուղի բնակիչների հետ:

Գյուղատնտեսական տարվա մեկնարկն այս տարի ոչ միայն վառելիքի, պարարտանյութի ու սերմացուի հաշվարկով է սկսվել, այլև գյուղատնտեսական ապահովագրության գումարների: Որ տարածքում ինչքան է կազմում մեկ հեկտարի ապահովագրավճարը, այս մասին առաջիններից ծանոթանալու ցանկություն հայտնել են Նոր Կյանք գյուղի բնակիչները: Ապահովագրական ընկերության աշխատակիցները ներկայացրին, որ կամավոր ապահովագրության սակագներն արդեն հստակեցրել են:

«Ըստ կառավարության որոշման՝ ունենք 3 սակագին: Այսինքն՝ ինչքան է ծախսել տվյալ գյուղացին իր 1 հեկտար հողը ցորեն կամ գարի ցանելու համար, որոշում ենք այդ թիվը` 3 ցուցանիշներից ելնելով: Օրինակ` աշնանացանի համար նշված է 300 հազար, 350 հազար և 380 հազար դրամ»,- գյուղացիների հետ հանդիպմանն ասել է «Ռոսգոսստրախ-Արմենիա» ընկերության Գյումրիի մասնաճյուղի գործակալական խմբի ղեկավար Արման Թորոսյանը:

3 տարբեր սակագին է սահմանվել՝ հաշվի առնելով հողերի դիրքը, դրանց ոռոգելի կամ անջրդի լինելու հանգամանքները: Գյուղացին հաշվարկելու է իր ծախսերը և ընտրելու է սակագներից որևէ մեկը: Իսկ փոխհատուցումը Շիրակի մարզում միայն կարկուտի ու հրդեհի դեպքերի համար է:

Առաջին հարցը, որ հետաքրքրեց գյուղացիներին, այն էր, թե ով ու ինչպես է գնահատելու վնասը կարկտահարությունից հետո: Ապահովագրական ընկերության ղեկավարը նշեց, որ վնասը հաշվարկելու են լիցենզավորված մասնագետները և կարկուտից հետո 15 օրվա ընթացքում: Այս ժամկետը գյուղացիներին մտահոգող հաջորդ գործոնն էր: Կարկտահարությունից հետո, երբ վնասը մեծ է, սովորաբար հացահատիկի դաշտերը հնձում են որպես անասնակեր: Ապահովագրական ծրագիրը այս հնարավորությունը է՛լ չի տալիս:

Հանրապետության տարածքը 5 ռիսկային գոտիների են բաժանել: Համաձայն այդ բաժանման՝ Արթիկի տարածաշրջանը 4-րդ գոտում է: Ամեն գոտու համար էլ ապահովագրական գործակիցներ կան, որոնց կատարված ծախսի համադրությամբ ստացվում է ապահովագրավճարի չափը: 50 տոկոսը սուբսիդավորում է կառավարությունը, բայց ապահովագրական ընկերությունը համաձայնում է ապահովագրել, եթե գյուղացու վճարելիք գումարը 10 հազար դրամ և ավելին է: Սա նշանակում է, որ փոքր հողակտոր ունեցողները չեն կարողանա օգտվել ապահովագրությունից: Փոխհատուցման հաշվարկում ևս մեկ կարևոր գործոն են նշում մասնագետները: Ցանկացած վնասի դեպքում 10 տոկոսը չի փոխհատուցվում:

«Ապահովագրատեսակներից շատերը ունեն այդ ռիսկը՝ չփոխհատուցվող գումար հասկացությունը: Ռիսկը ապահովագրական ընկերությունը կիսում է սեփականատիրոջ, ֆերմերի հետ: Ֆիքսված է, աշխարհում ընդունված պրակտիկա է: Կոնկրետ այս ապահովագրատեսակի համար կազմում է 10 %»,-  ասել է Արման Թորոսյանը։

Այդուհանդերձ, գյուղատնտեսության ապահովագրությունը հնարավորություն է տալիս ծախսի մեծ մասին փոխհատուցում ստանալ: Նոր Կյանքում անցած տարի մի քանի անգամ կարկուտ է եղել, վնասի չափը 50 տոկոսը չի գերազանցել, ըստ այդմ՝ պետությունից փոխհատուցում չեն ստացել: Ապահովագրության գործընթացը նոր է սկսվել, ապահովագրվողներ արդեն կան: Իսկ վերջնաժամկետը մարտի 25-ն է: