Գյումրիի կանաչ գոտիներում գտնվող տնակներում ապրողները կարող են լինել սոցբնակարանների շահառուներ

Գյումրիի քաղաքապետարանը վերանայել է սոցիալական բնակարանների շահառուներին ներկայացվող պահանջները:

Հիշեցնենք, որ քաղաքապետարանը ԱՌԴԱ բարեգործական հիմնադրամի հետ համատեղ 2017-2019 թվականներին Գյումրիում սոցիալական 41 բնակարան կառուցեց: Դրանց շահառուները հիմնականում միայնակ տարեցներն էին, ովքեր անօթևանի կարգավիճակ ունեին և տնակներում էին ապրում:

Անցած տարեվերջին կատարված բնակբաշխումից պարզ դարձավ, որ 6 բնակարանի համար շահառու չէր դիմել, դրանք դատարկ են: Քաղաքապետարանը որոշել է փոխել բաշխման չափորոշիչները և սոցիալական բնակարաններ հատկացնել արդեն ոչ թե միայնակներին, այլ կանաչ գոտիներում ապրող այն ընտանիքներին, որտեղ անչափահասներ կան:

Նախկին բուսաբանական այգու տարածքում ընդամենը մի քանի ծառ է մնացել, որոնք հիշեցնում են տարածքի երբեմնի նշանակության մասին: 88-ից հետո այստեղ են տեղափոխել փլված շենքերի ավերակները, հետո դրանց վրա տնակներ են տեղադրվել: Տարիների ընթացքում նստվածքներ են սկսվել ու տարածքում սողանքային երևույթներ են առաջացել: 32 տարվա տնակները ոչ այնքան մաշվածությունից, որքան սողանքներից են շարքից դուրս եկել:

30 տարի տնակային թաղամաս դարձած տարածքը, Գյումրիի գլխավոր հատակագծի համաձայն, կանաչ գոտի է: Դա է պատճառը, որ բնակիչներին թույլ չեն տվել տնակը տան վերածել կամ սողանքային երևույթները կանխելու համար շինարարական աշխատանքներ կատարել:

Իսկ այստեղ տնակներում ապրողները անօթևանի կարգավիճակ, հետևաբար բնակարանային պարտք ու պահանջ չունեն: Քաղաքապետարանի բնակարանների բաշխման հանձնաժողովի նոր որոշման համաձայն՝ նման ընտանիքները կարող են դառնալ սոցիալական բնակարանների շահառուներ:

2019-ին կառուցվել է 18 սոցիալական բնակարան, դրանցից 12-ը բաշխվել են, 6-ի համար ոչ ոք չի դիմել: Նախկին չափոփոշիչներով՝ շահառու կարող էին ճանաչվել միայնակ ծերերը, որոնք ունեին անօթևանի կարգավիճակ և ապրում էին տնակներում: Ըստ Գյումրիի քաղաքապետի տեղակալի՝ անօթևանության կարգավիճակ ունեցողներին սոցիալական բնակարանները քիչ են հետաքրքրում, սպասում են պետական փոխհատուցման: Ըստ այդմ՝ որոշել են շահառու դառնալու հնարավորություն ընձեռել կանաչ գոտիներում ապրող և անօթևանի կարգավիճակ չունեցող ընտանիքներին:

«Կանաչ գոտիները զբաղված են տնակներով: Հանձնաժողովը որոշեց, որ տնակներից ձերբազատվելու հարցում պարտադիր պայման կդրվի ազատել տնակները կանաչ գոտուց: 18 բնակարանից 6-ը շահառուներ չունեցան, որովհետև պայման էր դրվել, որ պարտադիր պետք է լինի անօթևանության կարգավիճակը: Շատերը չմասնակցեցին՝ մտածելով, որ հետո կստանան սեփական բնակարաններ: Դրա համար այդ պայմանը հանեցինք, կանաչ գոտիներին շեշտը դրեցինք: 1 սենյականոցների համար պայման է դրվել, որ պետք է լինեն մինչև 4 հոգանոց ընտանիքներ, և մեկը պարտադիր պետք է լինի անչափահաս: Երկու սենյականոցների համար պետք է լինեն 4-ից ավելի անձ ունեցող ընտանիքներ, և պարտադիր պայման է, որ երկուսը լինեն անչափահաս»,- SHANTNEWS-ին ասել է Գյումրու քաղաքապետի տեղակալ Ռուբեն Սանոյանը:

6 դատարկ բնակարաններից 4-ը մեկ սենյականոցներ են, 2-ը՝ 2 սենյականոց: Քաղաքապետարանում ակնկալում են, որ շահառուներն ավելի շատ կլինեն, քան առկա բնակարաններն են: Շահառուներին ներկայացվող պահանջները փոխել են նաև բնակարանաշինության հետագա սոցիալական ծրագրերի համար, եթե այդպիսիք լինեն, իսկ առայժմ 6 դատարկ բնակարանների համար շահառուներից առաջիկա օրերին դիմումներ կընդունեն:

Ըստ հատակագծի՝ կանաչ գոտի է բուսաբանական այգու,«Չերքեզի ձոր»-ի և հայտնի Ֆանտանի տարածքը: Բարեկարգման աշխատանքներ այս հատվածներում հնարավոր են միայն տնակներից ազատվելուց հետո:

Տնակի ապամոնտաժումը ևս սոցիալական բնակարանների շահառուներին ներկայացվող կարևոր պայման է: Գյումրիի հատուկ կարգավորման գոտիներում 1000 տնակ կա: Մոտ 400-ը կանաչ գոտիներում է: