Ինչ փաստաթղթեր կան կադաստրում Գյումրիի համայնքապատկան անհետացած գույքի վերաբերյալ

Գյումրիի քաղաքապետարանի հաշվեկշռից դուրս է գրվել 35 անուն գույք: Դրա մասին կա ավագանու համապատասխան որոշում:  Այն շենք-շինություններն են, որոնք տարբեր տարիներին օտարվել են, բայց շարունակել են գտնվել քաղաքապետարանի հաշվեկշռում: Գույքի մի խումբն էլ տարիներ շարունակ հաշվեկշռում է եղել, բայց պարզվել է, որ ընդհանրապես գոյություն չունի: Երբ է վերացվել ու օտարվել համայնքապատկան գույքը, ինչու այդ մասին փաստաթղթերը չեն պահպանվել: Այս հարցերն ուսումնասիրում է Շիրակի մարզի դատախազությունը: Դիմում իրավապահներին ներկայացրել է Գյումրիի ավագանու անդամ Լևոն Բարսեղյանը:

Ամեն տարի քաղաքապետարանը համայնքային գույքի ցանկը հաստատում է, որ պարզ լինի, թե ինչքան է քաղաքի ունեցվածքը: Գյումրիի ունեցվածքը ցանկով ավելի շատ է, քան իրականում կա: Այս մասին պարզ դարձավ հոկտեմբերին ավագանու հերթական նիստի ընթացքում, երբ ավագանու հաստատմանը ներկայացվեց 35 անուն գույքը համայնքային հաշվեկշռից դուրս հանելու հարցը: 35 անուն գույքը երեք խմբի են բաժանել, այսինքն՝ 3 առանձին պատճառ կա շենքերը քաղաքի հաշվեկշռից հանելու համար: Գոյություն չունեցող 22 կառույց է քաղաքապետարանի ցանկում առանձնացված: Դրանք  պահակատներ են, կաթսայատներ, ավտոտնակներ և այլ շինություններ:

Ինչ փաստաթղթեր կան պահպանված կադաստրում: Այս մասին Shantnews-ը զրուցել է կադաստրի կոմիտեի Շիրակի մարզային ստորաբաժանման ղեկավար Արայիկ Առաքելյանի հետ:

«Եթե տվյալ գույքի նկատմամբ կադաստրի պետական գրանցում եղել է, բնականաբար,  տեղեկություններ  կարող ենք տրամադրել նրանց, ովքեր իրավունք ունեն ստանալ նման տեղեկատվությւոն: Իսկ եթե գույքը պետական գրանցում չի անցել, մենք չենք տիրապետում այդ ինֆորմացիային: Կարող եմ ասել, որ «Տրոլեյբուսային պարկը» գրանցում անցել է, իմ հիշելով: Իհարկե,  դա շատ շուտ է եղել, բայց գրանցված է: Օրինակ, ասում են,  գույք կաթսայատուն, ես ինչ գիտեմ ինչ կաթսայատուն է: Այս դեպքում չենք կարող տեղեկություն տրամադրել: Դրա համար պարտադիր նույնականացում է պետք: Անի թաղամասում  մի քանի կաթսայատներ են եղել: Եթե կաթսայատան նկատմամբ իրավունքի պետական գրանցում ստացել են ու ենթադրենք, քանդվել է,  դա այլ խնդիր է, որը կապ չունի կադաստրի հետ: Մեր մոտ նման ուսումնասիրություն չի կատարվում , նման դեպքերը համայնքի կողմից պետք է ուսումնասիրվեն: Նաև այսպիսի հարց կա, եթե գրանցում ստացել է, ուրեմն ամեն տարի սեփականատերը գույքահարկ է վճարել: Իսկ եթե քանդել է, ուրեմն նախ պետք է դիմեին համայնքին, նոր քանդեին:Իսկ եթե չեն դիմել ու քանդել են, դա այլ խնդիր է»,-Shantnews-ին ասել է Արայիկ Առաքելյանը:

Ավելի վաղ Գյումրիի գլխավոր ճարտարապետը  Shantnews-ին ասել էր, որ գույքի օտարումը տեղի է ունեցել մինչև 2010 թվականը: Համայնքային գույքի օտարման ու անհետացման հարցը հիմա դատախազությունն է ուսումնասիրում: Քաղաքապետարանից արդեն պահանջել ու ստացել են բոլոր այն փաստաթղթերը, որոնք վերաբերում են նշված գույքին: Ըստ քաղաքապետարանի ցանկի`դրա ընդհանուր արժողությունը կազմում է 90 մլն դրամ: