Շիրակի մարզի Վահրամաբերդ գյուղում այրված տնակի բնակիչները փոխհատուցում են պահանջում

Քաղաքաշինության պետական կոմիտեն հաշվառել է ժամանակավոր կացարանները ոչ միայն Գյումրիում, այլև Շիրակի մարզի գյուղական բնակավայրերում, որտեղ քիչ չեն ընտանիքները, որոնք տնակներում են ապրում, բայց անօթևանի կարգավիճակ չունեն, հետևաբար պետությունը նրանց նկատմամբ պարտավորություն չունի:

Օրինակը Վահրամաբերդ գյուղում բնակվող Սարգսյանների ընտանիքն է: Անօթևան չեն, բայց նրանց դեպքում բնակարանային աջակցության հարցը հրատապ է: 2019թ. դեկտեմբերի 31-ին տնակն այրվել է ամբողջությամբ, և անօթևանի կարգավիճակ չունենալը ընտանիքին զրկել է փոխհատուցման որևէ տարբերակից:

Հրդեհային տեխնիկական անվտանգության քննության վարչությունն է ուսումնասիրություններ կատարել: Հրդեհի առաջացման պատճառները պարզել են ու վնասի չափը գնահատել: Այս մասին տանտերերը համապատասխան փաստաթուղթ ունեն:

«Ըստ հրդեհային տեխնիկական անվտանգության քննության վարչության` հրդեհը բռնկվել է հոսանքալարերի կարճ միացման պատճառով, ինչի հետևանքով պատճառվել է 500 հազար դրամի նյութական վնաս, որից 200 հազարը շինության համար է, իսկ 300 հազարը գույքի վնասն է: Այդքան են գնահատել, իսկ համայնքապետարանը հարցը դրել է ավագանու նիստին ու ավագանին որոշել է, որ 50 հազար դրամ աջակցություն հատկացնեն: Այս 50 հազարով ի՞նչ կարող ենք անել: Մարզպետարան ենք դիմել, որտեղ ասացին, որ տնակ չեն կարող տրամադրել, որովհետև ապամոնտաժում են տնակները: Մենք էլ առաջարկել ենք, որ գոնե դրամական օգնություն տան, մենք մեր ուժերով գնենք. բերենք տնակ տեղադրենք»,- SHANTNEWS.am-ի հետ զրույցում ասել են Արմեն և Նարինե Սարգսյան ամուսինները:

Տնակի միայն քարապատ հատվածն է կանգուն մնացել: Թիթեղյա կոնստրուկցիաների, տանիքի ու կահույքի նյութական վնասը 500 հազար դրամ է կազմել, իսկ աջակցության չափը, որը Մարմաշեն խոշորացված համայնքի ավագանին է հաստատել, տասն անգամ պակաս է եղել:

Սարգսյանների ընտանիքը անօթևան չէ: Բնակարանային պայմանների բարելավման տարբերակը նրանց համար եղել է տնակը: Սարգսյանները բազմանդամ են, Արմեն Սարգսյանն էլ հայրական տնից դուրս է եկել ու տնակում բնակվել: Տնակը հասցեավորում ունի գյուղում, ունեն փաստացի գրանցում, բայց պետությունը բնակարանային պարտավորություն չունի ընտանիքի նկատմամբ: Դատարկ ժամանակավոր կացարաններ Մարմաշեն համայնքի այլ բնակավայրերում չկան, որ կարողանան տրամադրել Սարգսյաններին: Եվս մեկ դիմում են ներկայացրել համայքի ղեկավարին, այս անգամ դրամական աջակցություն են խնդրել, որ կարողանան թեկուզ մեկ տնակ գնել: Դիմումն ընդունել են, ավագանու նիստին են ներկայացնելու, բայց նշում են՝ կարճ ժամկետում գումար չեն կարող տրամադրել ընտանիքին:

«Տարին նոր է սկսվել, հնարավորություն չունենք մեծ գումարներ տրամադրել բյուջեից: Կարծում եմ` առաջիկայում կներկայացվի ավագանուն և այս եռամսյակում կաջակցենք, որ ընտանիքը դրսում չմնա»,-SHANTNEWS.am-ին ասել է Մարմաշենի համայնքապետարանի առաջատար մասնագետ Մկրտիչ Գասպարյանը:

Սարգսյանները հայրական տուն են վերադարձել, մինչև կկարողանան նոր տնակ գնել: Իսկ Մարմաշենի համայնքապետարանը հաշվառում է գյուղերում ժամանակավոր կացարանները: Կառավարութւյունը հետո է որոշելու, թե ինչ է լինելու տնակում ապրող, բայց անօթևանի կարգավիճակ չունեցողների բնակարանային հարցը: Մարմաշեն խոշորացված համայնքի բնակավայրերում այս տարի բնակարանի գնման վկայագրեր տրամադրվեցին շահառու ճանաչված ընտանիքներին: