Brexit-ի հաստատումը ԵԽ-ի կողմից, հրաժեշտի երգը, արցունքներն ու դրոշները. ինչպե՞ս անցավ Brexit-ի պայմանների շուրջ քվեարկությունը

Եվրոպական միություն-Մեծ Բրիտանիա ապահարզանի գործարքը կարելի է կայացած համարել: 621 կողմ, 49 դեմ և 13 ձեռնպահ ձայներով Եվրոպական խորհրդարանը վավերացրեց դեռ հոկտեմբերին Լոնդոնի և Բրյուսելի միջև կնքված գործարքը Brexit-ի պայմանների շուրջ: Հունվարի 31-ից Մեծ Բրիտանիան այլևս Եվրամիության անդամ պետություն չի լինի:

Քվեարկության օրը Եվրոպական օրենսդիրները բավականին զգացմունքային էին. ոմանք չէին կարողանում զսպել արցունքները, մյուսները հրաժեշտի հուզիչ խոսքեր էին ասում:

«Կառույցը լքում է այն երկիրը, որը երկու անգամ ազատագրել է մեզ, երկու անգամ արյուն է թափել Եվրոպան ազատագրելու համար: Միայն մեկ բան կարող եմ ասել՝ մենք ձեզ կկարոտենք»,- իր խոսքում նշեց Եվրոպական խորհրդարանի՝ Brexit-ի հարցով համակարգող Գի Վերհոֆշդադը:

Բրիտանական «Brexit-ի կուսակցության» առաջնորդ Նայջել Ֆարաջը, կարծես, զղջումներ չուներ:

«Գուցե, դուք ատում եք պոպուլիզմը, բայց հետաքրքիր մի բան ասեմ՝ այն շատ պոպուլյար է դառնում: Այս ամենը մեծ առավելություններ ունի՝ այլևս ոչ մի ֆինանսական ներդրում, այլևս ոչ մի Եվրոպական դատարան, ոչ մի ընդհանուր քաղաքականություն ձկնորսության հարցում, ոչ մի ծաղրուծանակ, ոչ մի Գի Վերհոֆշդադ: Դժգոհելու ոչինչ չկա: Գիտեմ, որ մեզ կկարոտեք, գիտեմ, որ ուզում եք արգելել մեր դրոշները, բայց մենք ձեզ հաջողություն կմաղթենք և անհամբեր կսպասենք ձեզ հետ համագործակցության՝ որպես ինքնիշխան երկիր»,- նշեց Ֆարաջը:

Ֆարաջի խոսքերից հետո բրիտանացի պատգամավորները բացականչություններով սկսեցին թափահարել Մեծ Բրիտանիայի դրոշները, ինչին արձագանքեց Եվրոպական խորհրդարանի փոխնախագահ Մեյրիդ ՄաքԳինեսը:

«Խնդրում եմ, նստե՛ք: Գրավե՛ք ձեր տեղերը և մի կո՛ղմ դրեք ձեր դրոշները, դուք գնում եք: Իսկ եթե հիմա եք գնում, դրոշները ձեզ հետ տարեք»,- ասաց ՄաքԳինեսը:

Իսկ Եվրոպական հանձնաժողովի նախագահ Ուրսուլա ֆոն դեր Լեյենը մեծ Բրիտանիային հրաժեշտ տվեց հայտնի բրիտանացի պոետ Ջորջ Էլիոթի խոսքերով:

«Միայն բաժանման տառապանքի մեջ ենք տեսնում սիրո խորությունը: Մենք միշտ կսիրենք ձեզ և երբեք հեռու չենք լինի: Կեցցե՛ Եվրոպան»,- ասաց Եվրոպական հանձնաժողովի նախագահը:

Որպես վերջնական հրաժեշտ՝ Եվրամիության օրենսդիրները Մեծ Բրիտանիայի պատվին երգեցին շոտլանդական ավանդական հրաժեշտի երգը:

Չնայած հրաժեշտի երգին և խոսքերին` Եվրոպական միությունն ու Մեծ Բրիտանիան դեռ երկար ճանապարհ ունեն անցնելու: Առաջիկա 11 ամիսների ընթացքում կողմերը պետք է բանակցություններ վարեն հետագա առևտրատնտեսական հարաբերությունները համաձայնեցնելու շուրջ:

Անցումային շրջանում՝ մինչև այս տարվա դեկտեմբերի 31-ը, Մեծ Բրիտանիան կշարունակի մնալ Եվրոպական Միության մաքսային տարածքում և միասնական շուկայում: Կողմերի հիմնական խնդիրն է այնպիսի առևտրային համաձայնագիր կնքել, որ Մեծ Բրիտանիան կարողանա շարունակել առևտուր անել ԵՄ-ի հետ՝ առանց մաքսատուրքերի և պատնեշների:

Այնուամենայնիվ, ազատ առևտրի մասին համաձայնագիրը չի բացառի Մեծ Բրիտանիայի և Եվրամիության միջև անցակետերը: Եթե կողմերին չհաջողվի ազատ առևտրի մասին համաձայնագիր կնքել, ապա բրիտանական ապրանքների մեծ մասը կենթարկվի մաքսատուրքերի: Նախկին կանոնները կարող են կիրառվել միայն Հյուսիսային Իռլանդիայի դեպքում: