Ռուսաստանը գիտի սահմանային կոռուպցիայի մասին, բայց փաստեր չունի

Հայ-ռուսական տնտեսական հարաբերությունների և առևտրաշրջանառության մասին է այսօր խոսել Հայաստանում Ռուսաստանի առևտրային ներկայացուցչության ղեկավար Անդրեյ Բաբկոյը: Բանախոսը նշել է, որ 2016-ի համեմատ 2017-ին զգալի ավելացել են ռուսական ներդրումները:

Անդրեյ Բաբկոյն առանձնացրել է հատկապես էլեկտրաէներգիայի ոլորտում կատարվող աշխատանքները: Ռուսաստանի առևտրային ներկայացուցչության ղեկավարը շեշտել է, որ իրենք մեծածավալ աշխատանք են կատարում Մեծամորի ատոմակայանի արդիականացման ուղղությամբ, թեև լավ կլիներ, որ նոր ատոմակայանի կառուցման համար հայկական կողմը կարողանար փող գտնել:

«Հորիզոն»-ի հարցին՝ չի՞ պատրաստվում արդյոք Ռուսաստանի կառավարությունն իր միջոցներով՝ մոտ 5 մլրդ դոլարով ռազմավարական գործընկեր երկրում կառուցել նոր, ժամանակակից ատոմակայան այն դեպքում, երբ Թուրքիայում սկսել է գերհզոր ատոմակայան կառուցել ամբողջությամբ ռուսական ֆինանսավորմամբ՝ 21 մլրդ դոլարով:

«Ռուսաստանն ամենուր ներդրումներ անել չի կարող, հասկանում եք: Առանց այն էլ Հայաստանում շատերը դժգոհում են, որ Ռուսաստանն արդեն չափից շատ է այստեղ ներդրումներ անում, դա ձեզ պետք չէ: Դրա համար մենք անում ենք այն, ինչ պետք է Հայաստանի տնտեսությանը, ինչ որոշում է Հայաստանի կառավարությունը: Ռուսաստանը երբեք ստիպողաբար ոչինչ չի անում: Եթե նոր ատոմակայանը ձեզ պետք է, եկեք քննարկենք, գուցե նաև կարողանանք ներդրումներ անել»,- արձագանքել է Բաբկոյը:

Փոխարենը Ռուսաստանը, Բաբկոյի խոսքով, հատուկ տեղ է հատկացնում արդյունաբերական և գյուղատնտեսական արտադրանքին: Եվրասիական տնտեսական միության ձևավորումից հետո երկու երկրների առևտրաշրջանառությունը տարեցտարի աճում է՝ մեծացնելով նաև հայկական ապրանքի՝ Ռուսաստան արտահանման ծավալները:

Լրագրողների հարցին, թե ինչ գիտի Բաբկոյը Վերին Լարսի անցակետի և այնտեղ հայ բեռնափոխադրողներից պարբերաբար պահանջվող կաշառքի մասին, ռուս պաշտոնյան չի հերքել.

«Խնդիրը կա: Թե որքան խորն է, չգիտեմ, բայց կարող եմ ասել՝ որպեսզի սահմանային կոռուպցիայի այդ դեպքերը չլինեն, պետք է կառուցել ուղիղ ճանապարհ: Ցավոք, Ռուսաստանի և Հայաստանի տրանսպորտային հաղորդակցությունը որոշ դժվարություններ ունի, մենք պետք է անցնենք Վրաստանի տարածքով»:

Թե ինչ կապ ունի Վրաստանը ռուս սահմանապահների կաշառակերության դեպքերի հետ, Բաբկոյը չի պատասխանել, սակայն շեշտել է, որ հնարավոր է՝ Աբխազիայի տարածքով վերագործարկվի գնացքը: Բայց փաստը, որ հայկական արտադրանքը Ռուսաստանում մեծ պահանջարկ ունի, վկայում է այն մասին, որ պետք է բոլոր ուղիներն օգտագործել՝ մեծացնելու առևտրային կապերը, մանավանդ, ըստ բանախոսի, դրա համար պետք է ընդամենը ունենալ ապրանքի ծագման հավաստագիր:

«Հայկական արտադրանքն իր որակի շնորհիվ ռուսական շուկայում առանձնահատուկ տեղ ունի, օրինակ՝ լոլիկը: Երբ մեր շուկայում մեծ պահանջարկ ունեցող հայկական լոլիկը վերջանում է, պատահում է՝ այլ երկրներից ներկրողներ իրենց լոլիկը հայկականի անվան տակ են վաճառում»,- մասնավորապես նշել է ռուս պաշտոնյան:

Անդրեյ Բաբկոյը վստահեցրել է՝ իրեն հանձնարարված է անել ամեն ինչ հայ արտադրողի համար Ռուսաստանի շուկա հասնելու պայմաններ ստեղծելու համար: Եթե կան խնդիրներ, անհրաժեշտ է ընդամենը դիմել Հայաստանում Ռուսաստանի առևտրային ներկայացուցչություն, և ոչ միայն կլուծվեն խնդիրները, այլև կպատժվեն հայ գործարարից կաշառք պահանջող ռուս սահմանապահներն ու պաշտոնյաները: