Արդյո՞ք կենտրոնացված ջեռուցման նախկին դիտահորերը կդառնան ջրամատակարարման նոր ցանցի խրամուղիներ

Գյումրիի Անի թաղամասի կենտրոնացված ջեռուցումը կար մինչև 2006 թվականը, այսինքն՝ թաղամասի կառուցումից հետո 15 տարի Մայիսյանի կաթսայատնից ջեռուցում ստացավ մեծ թաղամասը: Այնուհետև կենտրոնացված ջեռուցումից  հրաժարվելու պատճառներ սկսեցին բերել տեղական իշխանությունները, որ այն ծախսատար է, բնակիչները ջեռուցման դիմաց վճարումներ չեն կատարում: Պատճառներն այլ գործողությունների հանգեցրին, ապամոնտաժվեցին կաթսայատները, եղած գույքը վաճառվեց մաս-մաս:

Կենտրոնացված ջեռուցման համակարգի եղած 4 պատերն ու խողովակաշարերի դիտահորերը մնացին անպետք ու վաճառքի ոչ ենթակա գույք: Մինչև 3 մետր խորության դիտահորերը թաղամասի յուրաքանչյուր շենքի բակում մեկը կամ երկուսը չեն: Թվում է՝ անվտանգ են, քանի որ փակ են կափարիչներով, բայց փակ ու անտեսանելի տարածքում ու խոր փոսերում ոչ միայն կենցաղային աղբ, այլև ջրեր են կուտակվում: Երկուսն էլ միասին խցանում են առաջացնում, որի հետևանքները բնակիչներն են քաշում:

Թաղամասի դիտահորերում հավաքվող ջուրը  հավաքվում է շենքերի նկուղներում: Որ կուտակվող ջրերը գալիս են նախկին ջերմամատակարարման դիտահորերից, համատիրությունները ոչ մի կասկած չունեն, ուսումնասիրել են ու շենքերի ներսում ջրահեռացման, ջրամատակարարման ցանցերի վթարներ չեն հայտնաբերել:

Դիտահոր լցվող ջուրն էլ, հավանաբար, մաքուր խմելու ջուր է: Իսկ սա էլ ապացուցելու համար համատիրության ղեկավարը ջրմուղի մասնագետների է կանչել, լաբորատոր հետազոտության են տարել, որպեսզի համոզվեն՝ իսկապես խմելու ջուրն է անտեղի կորչում:

Ջրի հոսքի տեղը գտնելու խնդիրը ջրմուղինն է, իսկ նախկին ջերմատարների դիտահորերի խցանումները մաքրելու հետ կապ չունեն, գործն արդեն քաղաքի կոմունալ բաժնինն է:

Նախ՝ քաղաքապետարանի կոմունալ բաժնի պետի համար դիտահորերի խցանումների, կուտակվող ջրերի խնդիրները նոր բան էին: Այս  թաղամասի ջրամատակարարման ցանցն էլ  վթարների պակաս չունի,  պոմպերով հաճախ են դիտահորերից ջուրը քաշում, բայց սա հարցի ժամանակավոր լուծումն  է, քանի դեռ կենտրոնացված ջեռուցման համակարգի խողովակատարները չեն հանվել, իսկ խրամուղիները չեն  ապամոնտաժվել:

«Առայժմ մենք ձեռնպահ ենք մնում դրանք լցնելուց կամ փակելուց։ Քանի որ Անի թաղամասում նոր ջրագծերի ցանց է անցկացվելու, կարծում ենք, որ դրանք հնարավոր է օգտակար լինեն՝ որպես ջրագծերի խրամուղիներ, եթե ջրաշինարարները դրանք չօգտագործեցին, նոր մենք դրանք  կփակենք»,- ասել է Գյումրիի քաղաքապետարանի կոմունալ բաժնի պետ Կնյազ Մանասյանը։

Անի թաղամասի ջրամատակարարման ընդամենը 30 տարվա ցանցն արդեն մաշված է, ու մեծ վթարներն էլ՝ հաճախակի են։ Ջրամատակարարման ցանցի նորացման ծրագիր այս թաղամասի համար ևս կար, որը պետք է ավարտված լիներ մոտ երկու տարի առաջ:

Հետաձգված այս ծրագրից է կախված այժմ նաև փողոցաշինական 2-րդ տրանշի մեկնարկը, որով պայմանավորված՝ պատասխանատուները ենթադրում են, որ Անի թաղամասը կշրջանցի այս տարի: